ފަސޭހައިން ރާއްޖޭގައި އުފެއްދޭނެކަމުގެ ޔަޤީންކަން އޮތް ބާވަތްތަކުގެ އިމްޕޯޓް ޑިއުޓީ ބޮޑުކުރަނީ
ދަނޑުވެރިންނާއި ގާތުން މަސައްކަތްކުރުމަށް ސަރުކާރުން ވަނީ އެގްރޯ ނޭޝަނަލްގެ ނަމުގައި އިދާރާއެއް އުފައްދާފައި
ދަނޑުވެރިކަމަށް ފީލްޑް އޮފިސަރުން ތަމްރީނު ކުރުން
ފަސޭހައިން ރާއްޖޭގައި އުފެއްދޭނެކަމުގެ ޔަޤީންކަން އޮތް ބާވަތްތަކުގެ އިމްޕޯޓް ޑިއުޓީ މަތި ކުރުމަށް ނިންމަވާފައިވާކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙު ވިދާޅުވެއްޖެއެވެ.
ރިޔާސީ ބަޔާން އިއްވަވަމުން ރައީސް ވިދާޅުވީ، ދިވެހި އިޤްތިޞާދު ސިންދަފާތު ކުރުމުގެ ލިސްޓްގެ އެންމެ ކުރިއަށް ސަރުކާރުން ލާފައިވަނީ ދަނޑުވެރިކަން ކަމަށެވެ. އެކަމަށްޓަކައި އެގްރޯނެޓްގެ ނަމުގައި ސަރުކާރުން ކުންފުންޏެއް އުފައްދާފައިވާއިރު، އެގްރޯނެޓްގެ ފަރާތުން ރާއްޖޭގެ 68 ރަށެއްގެ 704 ދަނޑުވެރިއަކާއެކު ސޮއިކުރެވިގެން ކޮންޓްރެކްޓް ފާމިންގެ މަސައްކަތް ހިނގަމުންދާކަމަށް ރައީސް ވިދާޅުވިއެވެ.
ރައީސް ވިދާޅުވީ، އޭގެ ތެރެއިން 163 ދަނޑުވެރިއެއްގެ އުފެއްދުންތައް ގަނެ މިހާރުވެސް މާރކެޓަށް ނެރެމުންދާ ކަމަށެވެ. އަދި މިއީ ފަށައިގަތުމެއް ކަމަށް ފާހަގަކުރައްވައި ރައީސް ވަނީ، ކާމިޔާބު މަސައްކަތަކަށް މިކަންވެ އޭގެ ނަތީޖާ ރާއްޖޭގެ ހުރިހާ ދަނޑުވެރިންނަށް ލިއްބައިދެވޭނެ ކަމުގެ އުއްމީދު އާވެފައިވާކަމަށް ވިދާޅުވެފައެވެ.
ރައީސް ވިދާޅުވީ، އެސް.އެމް.އީ ބޭންކް މެދުވެރިކޮށް ދަނޑުވެރިކަމަށް މިހާތަނަށް 16.3 މިލިއަން ރުފިޔާގެ ލޯނު ދޫކުރެވިފައިވާ ކަމަށެވެ. އަދި ފަސޭހައިން ރާއްޖޭގައި އުފެއްދޭނެކަމުގެ ޔަޤީންކަން ލިބޭ ބާވަތްތަކުގެ އިމްޕޯޓް ޑިއުޓީ ކުރިއަށް އޮތްތަނުގައި މަތިކުރެވޭނެކަން ރައީސް ފާހަގަކުރެއްވިއެވެ. އެކަމުގެ ބޭނުމަކީ ދިވެހި އުފެއްދުން އިތުރުކޮށް، ނަފާ ހޯދުމުގެ ފުރުޞަތު ދިވެހި ދަނޑުވެރިންނަށް ލިއްބައިދިނުންކަން ރައީސް ވިދާޅުވިއެވެ.
ދަނޑުވެރިންނާއި ގާތުން މަސައްކަތްކުރުމަށް ސަރުކާރުން ވަނީ އެގްރޯ ނޭޝަނަލްގެ ނަމުގައި އިދާރާއެއް އުފައްދާފައެވެ. މިއިދާރާގެ މައިގަނޑު މަސައްކަތަކީ ދަނޑުވެރިންނާއި ގާތުން މަސައްކަތް ކުރުމެވެ. މިގޮތުން ދަނޑުވެރިކަން ފަށައިގަންނަން ބޭނުންވާ މީހުންނަށް އެފުރުސަތު ފަހިކޮށްދިނުމާއި، ދަނޑުވެރިކަން ފަށައިގަތުމަށް އެމީހުންނަށް ބޭނުންވާ އެހީތެރިކަން ފޯރުކޮށްދިނުން ހިމެނެއެވެ. އަދި އެއަށްފަހުވެސް ދަނޑުވެރިންގެ ކަންކަން ގާތުން ބަލައި މޮނިޓަރ ކުރުން ހިމެނެއެވެ.
އެގްރޯނެޓުން މިކަން ކުރިއަށް ގެންދިއުމަށް ދަނޑުވެރިންނާއެކު 2 އަހަރު ދުވަހުގެ އެއްބަސްވުމެއް އެކުލަވާލައެވެ. މިއެއްބަސްވުމަށް ދެވޭ ހިސާބުން ދަނޑުވެރިޔާގެ ކަންކަން ބެލުމަކީ އެގްރޯނެޓްގެ ޒިންމާއެކެވެ. އެގްރޯނެޓުން އެޒިންމާ ނަގައި، ދަނޑު ހެއްދުމަށް ދަނޑުވެރިޔާއަށް ބޭނުންވާ ހުރިހާ އެއްޗެއް ފޯރުކޮށްދިނުމާއި، ހައްދާނެ ބާވަތްތައް ދަނޑުވެރިންނަށް ފޯރުކޮށްދިނުން ހިމެނެއެވެ. އަދި ދަނޑުވެރިޔާ ހައްދާ ބާވަތެއް ބާޒާރަށް ނެރުމަކީވެސް އެގްރޯނެޓުން ކުރާނެ މަސައްކަތެކެވެ. އެގްރޯނެޓްގެ ފުރިހަމަ އެއްބާރުލުން އެއްބަސްވުން ދެމިއޮތްހާ ހިނދަކު ދަނޑުވެރިންނަށް ލިބޭނެއެވެ. އަދި އެއްބަސްވުމުގެ މުއްދަތު ހަމަވުމުން އައު އެއްބަސްވުމެއް ހެދުމުގެ ފުރުސަތުވެސް ލިބިގެންދާނެއެވެ.
