މޫސުމަށް އަންނަ ބަދަލުތަކާ ގުޅިގެން ދަނޑުވެރިކަމަށް ވެސް އެކިކަހަލަ ގޮންޖެހުންތަކާ ކުރިމަތިލާން ޖެހިފައިވާ ކަމަށް މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރުން ބުނެފިއެވެ.

ދެމެހެއްޓެނިވި ގޮތެއްގައި ދަނޑުވެރިކަން ތަރައްގީކޮށް ކުރިއެރުވުމަށް ރާއްޖެ ފަދަ ކުދި ޖަޒީރާ ގައުމުތަކުގައި ދަނޑުވެރިކަމުގައި ބޭނުންކުރަން އެކަށީގެންވާ ފެންދޭ ނިޒާމްގެ މައުލޫމާތު ހޯދައި, ރާއްޖޭގެ ރަށްރަށަށް ތައާރަފް ކުރުމަށް މިނިސްޓްރީން ކުރިއަށްގެންދާ އިރިގޭޝަން ޕްރޮގްރާމް އަންގާރަ ދުވަހު ގދ. ހޯނޑެއްދޫގައި ކުރިއަށް ގެންގޮސްފައިވެއެވެ.

ދަނޑުވެރިކަމާބެހޭ މިނިސްޓްރީން ބުނީ ދަނޑުވެރިކަމުގައި ބޭނުންކުރުމަށް ލިބިފައިވާ ބިމުގެ ސަބަބުންނާއި މޫސުމަށް އަންނަ ބަދަލުތަކާއި ގުޅިގެން ރާއްޖޭގެ ދަނޑުވެރިކަމަށް ވެސް އެކިކަހަލަ ގޮންޖެހުންތަކާ ކުރިމަތިލާން ޖެހިފައިވާ ކަމަށެވެ. އެގޮތުން އިރުވައި މޫސުން ދިގުވެ ގަސްތަކަށް ފެންދިނުމަށް ގިނަ އަދަދަކަށް ބިމުން ފެން ނެގުމުގެ ސަބަބުން ބައެއް ރަށްރަށުގެ މީރުފެން ފަށަލަ ލޮނުވެ، ދަނޑުވެރިކަމުގައާއި އާންމު ދިރިއުޅުގައި ބޭނުން ކުރަން އެކަށީގެންވާ ވަރަށް ފެން ނުލިބުމުގެ ދަތިކަން ރަށްރަށަށް ކުރިމަތިވާ މިންވަރު އަހަރުން އަހަރަށް އިތުރުވާކަން ފާހަގަކުރެވިފައިވާ ކަމަށެވެ.

އިރިގޭޝަން ޕްރޮގްރާމަކީ ދެމެހެއްޓެނިވި ގޮތެއްގައި ދަނޑުވެރިކަން ކުރުމަށް، ރައްކާކުރެވިފައި ހުންނަ ފެންފޮދު ވީހާވެސް އިސްރާފުކުޑަ ގޮތެއްގައި ބޭނުން ކުރެވޭނެ ނިޒާމެއް ގާއިމްކޮށްދިނުމަށާއި ފެންބޭނުން ކުރުމުގައި ދަނޑުވެރިން ކުރިއަށްވުރެ ބޮޑަށް ހޭލުންތެރިކަން އިތުރު ކުރުމުގެ ގޮތުން ކުރިއަށްގެންދިޔަ ޕްރޮގްރާމެކެވެ.

ޕްރޮގްރާމްގައި ޑެމޮންސްޓްރޭޓް ކުރުމަށް 10 ދަނޑެއްގައި އިރިގޭޝަން ސިސްޓަމް ގާއިމްކޮށްދީފައިވެއެވެ. އަދި ރަށުގެ ގިނަ ދަނޑުވެރިންނާއި ޝައުގުވެރިވާ ފަރާތްތައް ހިމެނޭގޮތަށް, އަދި އިރިގޭޝަން ޕްރޮގްރާމްގައި ބައިވެރިވެފައިވާ 10 ފަރާތް ހިމެނޭގޮތަށް, ކަމާގުޅޭ މައުލޫމާތު ސެޝަންތައް ހިންގިފައިވެއެވެ. މި ސެޝަންތައް ހިންގާފައިވަނީ "ދަނޑުވެރިކަމުގެ އަސާސީ ތަމްރީން ޕްރޮގްރާމްގެ" ނަމުގައެވެ. މި ތަމްރީން ޕްރޮގްރާމްގައި ދަނޑުވެރިކަމުގެ އާންމު މައުލޫމާތާއި ގަސްހެއްދުމުގައި ދިމާވާ ތަފާތު ގޮންޖެހުންތައް ހައްލުކުރެވިދާނެ ގޮތުގެ މައުލޫމާތު ދެވިފައިވެއެވެ. ދަނޑުވެރިކަމުގެ އަސާސީ މައުލޫމަތުތައް ދެވުނު މި ސެޝަންތަކުގައި ޖުމްލަ 47 ފަރާތަކުން ބައިވެރިވެ, 42 މީހަކު ތަމްރީން ފުރިހަމަކޮށްފައިވެއެވެ.

މިނިސްޓްރީގެ ޕީއެސްއައިޕީ ޕްރޮގްރާމްގެ ތެރެއިން ހިންގޭ އިރިގޭޝަން ޕްރޮގްރާމްގެ މަގުސަދުތަކުގެ ތެރޭގައި, ޒަމާނީ ޓެކްނޮލޮޖީ ބޭނުންކޮށް ނަމޫނާ ދައްކައިދީގެން މިފަދަ ނިޒާމުތަކަށް ދަނޑުވެރިން އަހުލުވެރިކޮށް ޝައުގުވެރިކުރުވުން ހިމެނެއެވެ. މީގެ ސަބަބުން ދަނޑުވެރިކަމުގެ މަސައްކަތްތަކުގެ ތެރޭގައި އިސްރާފު ވެގެންދާ ފެނާއި ކާނާގެ މިންވަރު ކުޑަ ކުރެވި، ދެމެހެއްޓެނިވި ގޮތެއްގައި ދަނޑުވެރިކަން ކުރުމަށް ކުރެވޭ މަސައްކަތަށް އިތުރު ކުރިއެރުމެއް ލިބޭނެއެވެ.