ދަނޑުވެރިކަމުގެ ސިނާއަތަކީ ޒަމާނުއްސުރެވެސް އާމްދަނީ ހޯދުމަށް ދިވެހިން ކޮށް އުޅުނު ބުރަ މަސައްކަތެކެވެ. މިއީ ރާއްޖެއަށް ބޮޑެތި ސިނާއަތްތައް ތައާރަފްވުމުގެ މާކުރިން ދިވެހިން ކޮށް އުޅުނު މަސައްކަތެކެވެ. ބަދަލުވި ޒަމާނާއެކު ދިވެހިންގެ ތެރެއަށް އިތުރު ސިނާއަތްތައް ތައާރަފުވެފައިވީނަމަވެސް ދިވެހިންގެ ލެއާ ގުޅިފައިވާ ސިނާއަތެއް ފަދައިން ދަނޑުވެރިކަމުގެ ސިނާއަތް އަދިވެސް ދިވެހިންގެ ތެރޭގައި އެބައޮތެވެ.

މިގޮތުން ދަނޑުވެރިކަމަށް ބަލާލާއިރު، ރާއްޖޭގައި ދަނޑުވެރިކަމާ ގުޅުންހުރި މަސައްކަތެއް ނުކުރާ ރަށެއް ނެތޭ ބުނެވިދާނެއެވެ. އެހެންނަމަވެސް މީގެ ކުރިން މިކަން ކޮށްފައިވާ މިންވަރަށް ދަނޑުވެރިކަން ކުރެވިފައި ނެތީއެވެ. ފާއިތުވި އަހަރުތަކުގައި މި ސިނާއަތަށް އިސްކަން ދެވުނު މިންވަރު ކުޑަވި ނަމަވެސް މި ސަރުކާރުން އެއްވެސް ދާއިރާއެއް ފަހަތަށް ޖެހުނަ ނުދިނުމަށް ކުރާ މަސައްކަތުގެ ތެރެއިން މި ސިނާއަތް ކޮޅަށްޖެހުމަށްވެސް ގިނަ މަސައްކަތްތަކެއް ވަނީ ކޮށްފައެވެ. މި ސިނާއަތް ޚިޔާރުކުރާ މީހުން އިތުރުކުރުމަށް މަސައްކަތްކޮށް ދަނޑުވެރިންނަށް ފަހި ފުރުސަތުތަކެއް ހޯދައިދިނުމަށް މި ސަރުކާރުން އަމާޒު ހިފިއެވެ. އަދި ސަރުކާރަށް ތިން އަހަރު ވީއިރު ދަނޑުވެރިންނަށް ލިބިފައިހުރި ފުރުސަތުތައް ވަރަށްވެސް ގިނައެވެ.

މިގޮތުން ދަނޑުވެރިންނާ ގާތުން މަސައްކަތްކުރުމަށް ސަރުކާރުން ވަނީ އެގްރޯ ނޭޝަނަލްގެ ނަމުގައި އިދާރާއެއް އުފައްދާފައެވެ. މި އިދާރާގެ މައިގަނޑު މަސައްކަތަކީ ދަނޑުވެރިންނާ ގާތުން މަސައްކަތް ކުރުމެވެ. މިގޮތުން ދަނޑުވެރިކަން ފަށައިގަންނަން ބޭނުންވާ މީހުންނަށް އެ ފުރުސަތު ފަހިކޮށްދިނުމާއި، ދަނޑުވެރިކަން ފަށައިގަތުމަށް އެމީހުންނަށް ބޭނުންވާ އެހީތެރިކަން ފޯރުކޮށްދިނުން ހިމެނެއެވެ. އަދި އެއަށްފަހުވެސް ދަނޑުވެރިންގެ ކަންކަން ގާތުން ބަލައި މޮނިޓަރ ކުރުން ހިމެނެއެވެ.

އެގްރޯނެޓުން މިކަން ކުރިއަށްގެންދިއުމަށް ދަނޑުވެރިންނާއެކު އެއްބަސްވުމަކަށް ދެއެވެ. އެއީ 2 އަހަރުދުވަހުގެ އެއްބަސްވުމެކެވެ. އެއްބަސްވުމަށް ދެވޭ ހިސާބުން ދަނޑުވެރިޔާގެ ކަންކަން ބެލުމަކީ އެގްރޯނެޓްގެ ޒިންމާއެކެވެ. އެގްރޯނެޓުން އެ ޒިންމާ ނަގައި، ދަނޑު ހެއްދުމަށް ދަނޑުވެރިޔާއަށް ބޭނުންވާ ހުރިހާ އެއްޗެއް ފޯރުކޮށްދިނުމާއި، ހައްދާނެ ބާވަތްތައް ދަނޑުވެރިންނަށް ފޯރުކޮށްދިނުން ހިމެނެއެވެ. އަދި ދަނޑުވެރިޔާ ހައްދާ ބާވަތެއް ބާޒާރަށް ނެރުމަކީވެސް އެގްރޯނެޓުން ކުރާނެ މަސައްކަތެކެވެ. އެގްރޯނެޓްގެ ފުރިހަމަ އެއްބާރުލުން އެއްބަސްވުން ދެމިއޮތްހާ ހިނދަކު ދަނޑުވެރިންނަށް ލިބޭނެއެވެ. އަދި އެއްބަސްވުމުގެ މުއްދަތު ހަމަވުމުން އައު އެއްބަސްވުމެއް ހެދުމުގެ ފުރުސަތުވެސް ލިބިގެންދާނެއެވެ.

އެގްރޯނެޓުން މަދު ދުވަސްކޮޅެއްގެ ތެރޭގައި ކޮށްފައިވާ މުހިންމު މަސައްކަތްތަކުން ދަނޑުވެރިންނަށް ކުރިމަތިލާންޖެހިފައިވާ ގިނަ ގޮންޖެހުންތަކަކަށް ވަނީ ހައްލު ހޯދައިދެވިފައެވެ. އެގްރޯނެޓުން ދަނޑުވެރިންނާ ގުޅިގެން ކުރަން ފެށި މުހިންމު މަސައްކަތްތަކުގެ ސަބަބުން ދަނޑުވެރިން ކުރަމުންއައި ޝަކުވާތައް ވަނީ މަދުވެފައެވެ. މިކަން އެގްރޯނެޓުން ވެސް ވަނީ ފާހަގަކޮށްފައެވެ. މިގޮތުން ދަނޑުވެރިންނަށް ބޭނުންވާ ވަސީލަތްތައް ނުލިބުމާއި، ދަނޑުވެރިން ހައްދާ ތަކެތި ވިއްކޭނެ މާކެޓެއް ނެތުމާއި، ވިއްސާރައިގައި ދަނޑުވެރިންގެ ތަކެތި ހަލާކުވުމަކީ މީގެ ކުރިން އެމީހުން ކުރަމުން އައި ޝަކުވާތަކެއް ކަމަށް އެގްރޯނެޓުން ބުނެއެވެ. އެހެންނަމަވެސް މި ސަރުކާރުން ފެށި މި މަސައްކަތްތަކާއެކު މި ޝަކުވާތައް މަދުވީއެެވެ.

އެހެންނަމަވެސް އަދިވެސް ހައްލު ނުވެ އޮތް މައްސަލައަކީ ދަނޑުވެރިންނަށް ބޭނުންވާ ބިން ނުލިބުމުގެ މައްސަލައެވެ. މި މައްސަލަ ހައްލުކުރުމަށް މި ސަރުކާރުން ގެންގުޅޭ ވިސްނުމަކީ ޒަމާނީ ޓެކްނޮލޮޖީގެ އެހީގައި މިކަން ކުރުމެވެ. މިގޮތުން ދުނިޔޭގެ އެކި ގައުމުތަކުގައި ބޭނުންކުރާ ވަރޓިކަލް ފަރމިންގއާއި ހައިޑްރޮފޯނިކްސް ބޭނުންކޮށްގެން ބިމުގެ ދަތިކަމަށް ހައްލެއް ހޯދުމުގެ މަސައްކަތް ފެށުމަށް މި ސަރުކާރުން ދަނީ ތައްޔާރުވަމުންނެވެ. މި ސަރުކާރުގެ އަމާޒަކީ ރާއްޖޭގެ ދަނޑުވެރިކަމުގެ ސިނާއަތަކީ މިއަށްވުރެ ފުޅާ އަދި ފައްކާވެފައިވާ ސިނާއަތަކަށް ހެދުމެވެ.