ކޮންޓްރެކްޓް ފާރމިންގ ތަރައްގީކޮށް, ބަރޯސާވެވޭ އިގުތިސާދީ ސިނާއަތެއްގެ ގޮތުގައި ދަނޑުވެރިކަން ތަރައްގީކުރުމަކީ އަމާޒު ކަމަށް އެގްރޯ ނެޝަނަލް ކޯޕަރޭޝަން (އެގްރޯނެޓް)އިން ބުނެފިއެވެ.

ކޮންޓްރެކްޓް ފާރމިންގއަކީ މުޑުވައްކުރާ ހިސާބުން ފެށިގެން ތަކެތި ކެނޑުމާ ހަމައަށް, އިންތިޒާމުކުރެވިގެން ބެލެހެއްޓިގެން ކުރެވޭ ދަނޑުވެރިކަމަށްވާއިރު, މިއީ ދިވެހިރާއްޖެއަށް އަލަށް ތައާރުފުކުރާ އަދި ތަޖުރިބާކުރަމުން ގެންދާ މޮޑެލްއެއްގެ ދަނޑުވެރިކަމަކަށް ވާތީ، މި ބާވަތުގެ ޒަމާނީ ދަނޑުވެރިކަމުގެ މޮޑެލްއެއް ކާމިޔާބުކުރުމަށްޓަކައި ވަރަށް މުހިންމު މަސައްކަތްތަކެއް ކުރެވެމުންދާ ކަމަށް ވަނީ ބުނެފައެވެ.

ވޭތުވެދިޔަ އަހަރަކީ ވެސް އެގްރޯނެޓުގެ މަސައްކަތްތަކުގެ ތެރެއިން މުހިންމު ލަނޑުދަނޑިތަކެއް ހާސިލުކުރެވިފައިވާ އަހަރެއްކަން ފާހަގަކޮށް އެގްރޯނެޓުން ބުނީ, ދަނޑުވެރިކަމުގެ އަމަލީ މަސައްކަތް ފެށުމަށްޓަކައި މާލީ އެހީގެ ގޮތުގައި 276 ފަރާތަކަށް 3 މިލިއަން ރުފިޔާގެ ތަކެތި ދޫކުރެވިފައިވާ ކަމަށެވެ. އަދި ދަނޑުވެރިންނަށް މިތަކެތި ދެވިފައިވަނީ ބާޒާރުގެ އަގުތަކަށް ވުރެން 20 އިންސައްތަ ހެޔޮ އަގުގައި ކަމަށެވެ.  

އެގްރޯނެޓާ ގުޅިގެން ދަނޑުވެރިކަން ކުރުމުގެ ޝައުވެރިކަން ފާޅުކޮށްފައިވާ 2000 ދަނޑުވެރިންގެ ތެރެއިން 717 ފަރާތަކާއެކު ކޮންޓްރެކްޓް ހަދާފައިވާއިރު, އެގްރޯނެޓުގެ ފަންނީ އެހީއާއި، ހިލޭ ދެވޭ މުޑުވަކާއި، ސްޓާޓަރ ޕެކްތަކާއެކު, ގިނަ ފަރާތްތަކަކުން މިހާރު ދަނީ ދަނޑުވެރިކަން ކުރަމުން ކަމަށް ވެސް ބުންޏެވެ. އަދި، ކޮވިޑް-19ގެ ހާލަތުން ލުއިކަން ލިބި, ދަނޑުވެރިކަމުގެ އުފެއްދުންތެރިކަން އިތުރުވުމުގެ ހެޔޮ ނަތީޖާއެއްގެ ގޮތުން, ވޭތުވެދިޔަ 5 މަސްދުވަހުގެ ތެރޭގައި 150 ޓަނުގެ ތަރުކާރީއާއި މޭވާގެ ބާވަތް ބާޒާރަށް ވަނީ ނެރެވިފައެވެ. އަދި އެތަކެތީގެ އަގުގެ ގޮތުގައި 2 މިލިޔަނަށް ވުރެން ގިނަ ރުފިޔާ ދަނޑުވެރިންނަށް ދޫކުރެވިފައިވާކަމަށް އެގްރޯނެޓުން ބުނެއެވެ.

އެގްރޯނެޓުގެ ދަނޑުވެރިންނަށް ބޭނުންވާ ފަންނީ އެހީތެރިކަމާއި ތަމްރީންތައް ހިންގެމުންދެއެވެ. އެގޮތުން އެގްރޯނެޓުގެ އެގްރޮނޮމިސްޓުން 150އަށްވުރެ ގިނަ ދަނޑުބިންތަކަށް ޒިޔާރަތްކޮށް ދަނޑުވެރިންނަށް ފަންނީ އެހީތެރިކަން ވަނީ ފޯރުކޮށްދީފައެވެ. އަދި، އެގްރޮނޮމިސްޓުންގެ ސީދާ ބެއްލެވުމުގެ ދަށުން 90 ދަނޑެއްގައި މިހާރުވެސް ދަނޑުގޮވާން ކުރެވިފައިވެއެވެ. ޒަމާނީ ޓެކްނޮލޮޖީގެ ވަސީލަތްތަކާއެކު ދަނޑުވެރިކަން ތައާރަފުކުރުމުގެ ގޮތުން 50 ފަރާތަކަށް ބޭނުންވާ އެހީތެރިކަން ފޯރުކޮށްދެވިފައިވެއެވެ. އަދި، ފެނުގައި ކިއުކަންބާއާއި މެލަން ހެއްދުމަށް ބޭނުންވާ ފަރާތަކަށް, ފެނަށް އަޅާ ކާނާގެ ބާވަތްތައް ދޫކުރެވިފައިވެއެވެ. އަދި ހަމައެހެންމެ ބަށި ހެއްދުމުގައި ދިމާވާ މައްސަލަތައް ހައްލުކޮށްދީ, 40000 އަކަފޫޓުގެ ދަނޑުބިމުގައި ފާޓިގޭޝަން ޓެކްނޮލޮޖީ ބޭނުންކޮށްގެން ދަނޑުވެރިކަން ކުރެވޭނެ މަގު ފަހިކޮށްދެވިފައިވެއެވެ.  

ދިވެހި ދަނޑުވެރިން އުފައްދާ ބާވަތްތައް ރައްކާތެރިކަމާ ތާޒާކަންމަތީ ބާޒާރުތަކަށް ފޯރުކޮށްދިނުމަށްޓަކައި، 9 ރަށެއްގައި ޑިސްޓްރިބިއުޝަން ސެންޓަރު އިމާރާތްކުރުމުގެ އަމަލީ މަސައްކަތް ފެށިފައިވެއެވެ. އަދި، މީގެތެރެއިން ހައްދުންމަތީ ގަމުގެ ޑިސްޓްރިބިއުޝަން ސެންޓަރުގެ މަސައްކަތް ވަނީ މުޅިން ނިމިފައެވެ. ޑިސްޓްރިބިއުޝަން ސެންޓަރުތައް ތަރައްގީކުރެވޭ 9 ރަށަކީ ނ. މަނަދޫ، ރ. ކިނޮޅަސް، ފ. މަގޫދޫ، ލ. ގަން، ލ. އިސްދޫ، ލ. ކަލައިދޫ، ގއ. ނިލަންދޫ، ފުވައްމުލައް ސިޓީ އަދި އައްޑޫ ސިޓީ ހުޅުމީދޫއެވެ.

އެގްރޯނެޓުން އިތުރަށް ބުނީ, ދަނޑުވެރިކަމުގެ ގޮތުގައި ތަރައްގީކުރުމަށްޓަކައި އެގްރޯނެޓަށް ސަރުކާރުން ދޫކޮށްފައިވާ ލ. ގާދޫއާއި ހއ. މުލިދޫއަށް ބޭނުންވާ ދިރާސާތަކާއި އެންމެހާ ރޭވުންތައް ނިމި, އަމަލީ މަސައްކަތް ފެށުމަށް ތައްޔާރުވަމުން އަންނަކަމަށެވެ.

އެގްރޯނެޓުގެ މަސައްކަތްތައް އިތުރަށް ތަރައްގީކޮށް، ފުޅާކޮށް, ރަށު ކައުންސިލްތަކާއި އަތޮޅު ކައުންސިލަތަކާއެކު ދަނީ މަޝްވަރާތައް ކުރެވެމުންނެވެ. އެގޮތުން ބިން ބޮޑެތި ރަށްރަށުގައި ދަނޑުވެރިކަން ތަރައްގީކުރުމަށް ބޭނުންވާ ރޭވުންތައް ނިމިފައިވާކަމަށް އެގްރޯނެޓުން ބުނެއެވެ.