މިއަހަރުގެ ތެރޭގައި މަސް މާރުކޭޓު ޒަމާނީ ފެންވަރަށް ތަރައްގީކުރުމުގެ އަމަލީ މަސައްކަތް ފަށާނެ: މާލެސިޓީ ކައުންސިލް
2 ފެބުރުއަރީ 2022 | ބުދަ 19:24މިއީ ސިޓީ ކައުންސިލުގެ ސްޓްރެޓެޖިކް އެކްޝަން ޕްލޭނުގައި ހިމެނޭ ކަމެއް
މަސް މާރުކޭޓުގައި މަސް ވިއްކަނީ
މިއަހަރުގެ ތެރޭގައި މާލެ ސިޓީގެ މަސް މާރުކޭޓު ޒަމާނީ ފެންވަރަށް ތަރައްގީ ކުރުމުގެ އަމަލީ މަސައްކަތް ފަށާނެ ކަމަށް މާލެ ސިޓީ ކައުންސިލުން ބުނެފިއެވެ.
މާލޭގެ މަސްމާރުކޭޓު ޒަމާނީ ފެންވަރަށް ހެދުމަކީ ސިޓީ ކައުންސިލުގެ ސްޓްރެޓެޖިކް އެކްޝަން ޕްލޭނުގައި ހިމެނޭ ކަމެކެވެ. އެ މަސައްކަތަށް ވާންޖެހޭ ތައްޔާރީތައް ކުރިއަށްދާ ކަމަށާއި، ފަންޑު ހޯދުމުގެ މަސައްކަތް ކުރިއަށްދާ ކަމަށް ކައުންސިލުން ބުނެއެވެ.
މިމަސައްކަތާ ގުޅޭގޮތުން މާލެ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވީ, ޕްލޭނަކީ މަސްމާރުކޭޓާއި ލޯކަލް މާރުކޭޓާއި ދަތުރުވެރިންގެ މާރުކޭޓު އެއްފުރާޅެއްގެ ދަށަށް ގެނެސް، ޒަމާނީ ރީތި އިމާރާތެއްގެ ތެރެއިން ރައްޔިތުންނަށް އެ ޚިދުމަތްތައް ލިބޭނެ ގޮތް ފަހިކުރުން ކަމަށެވެ. ސަރުކާރުގެ އެއްބާރުލުން އެކަމަށް ލިބިއްޖެނަމަ، މިއަހަރުގެ މެދެއްހާ ހިސާބުގައި އަމަލީ މަސައްކަތް ފެށޭނެ ކަމަށް މޭޔަރު ވިދާޅުވިއެވެ.
މުއިއްޒު ވިދާޅުވީ, މަސްމާރުކޭޓަކީ މާލޭގެ ރައްޔިތުން ވަރަށް ގިނައިން ބޭނުންކުރާ ސަރަޙައްދަކަށް ވުމުން އެތަން ވީހާވެސް ރަގަޅަށް ބަލަހައްޓައި ތަނުގައި ހުންނަންޖެހޭ މިންގަނޑުތައް ހިފެހެއްޓުމަކީ ވަރަށް ބޮޑަށް އިސްކަންދޭ ކަމެއް ކަމަށެވެ. އެހެންކަމުން ދާއިމީ މާރުކޭޓު އެޅެންދެން ވެސް މިހާރު ބޭނުންކުރަމުންދާ މަސްމާރުކޭޓުގެ ފެންވަރު ރަގަޅުކުރުމަށް ކުދިކުދި ކަންކަން ކުރަމުން އަންނަ ކަމަށާއި، މިހާރު ވެސް މަސް އަށިތައް މަރާމާތުކުރުމުގެ މަސައްކަތްތަކެއް ކުރިއަށްދާ ކަމަށް މޭޔަރު މުއިއްޒު ވިދާޅުވިއެވެ.
