އެއާޕޯޓުގެ ފާހަނާއެއްގެ ތެރެއިން އިއްޔެއާއި މިއަދު ގިނަ އަދަދެއްގެ މަސްތުވާތަކެތި ހޯދައިފި
ހޮނިހިރު ދުވަހު 42 ޕެކެޓް މަސްތުވާތަކެތި ފެނިފައިވޭ
މީގެ ކުރިން ފުލުހުން އަތުލާގަނެފައިވާ މަސްތުވާތަކެތި
ވެލާނާ އިންޓަނޭޝަނަލް އެއާޕޯޓުގެ ފާހަނާއެއްގެ ތެރެއިން ގިނަ އަދަދެއްގެ މަސްތުވާތަކެތި ހޯދައިފިއެވެ.
އެއާޕޯޓުން ވާހަކަ ދެއްކި މީހަކު ރާއްޖެއެމްވީއަށް ކިޔާދިން ގޮތުގައި ހޮނިހިރު ދުވަހާއި އާދިއްތަ ދުވަހު ގިނަ އަދަދެއްގެ މަސްތުވާތަކެތި ފާހަނާއެއްގެ ތެރެއިން ފެނިފައިވާ ކަމަށެވެ. އޭނާ ބުނި ގޮތުގައި ހޮނިހިރު ދުވަހު 42 ޕެކެޓް މަސްތުވާތަކެތި ފެނިފައިވަނީ އެއާޕޯޓުގައި މަސައްކަތް ކުރާ މަސައްކަތު މީހަކު ފާހަނާ ސާފު ކުރަން ވަދެ އުޅުމުގެ ތެރޭގައެވެ. އޭނާ ކިޔާދިން ގޮތުގައި އެތަކެތި ހުރީ ޑިޕަރޗަރ ޓާމިނަލްގެ ޑިއުޓީ ފްރީގައި ހުންނަ ފާހަނާއެއްގެ ތެރޭގައި ކަމަށާއި، އެތަކެތި ހުރީ ފާހަނާ ތަށިތެރޭގައި ކަމަށެވެ. ބެލެވޭ ގޮތުގައި އޭއީ ދިރުވާލައިގެން އައިސް ބޮޑުކަމު ގޮސްގެން ބޭރުކޮށްފައި ހުރި ޕެކެޓްތަކެކެވެ.
ނަމަވެސް މައުލޫމާތު ދިން ބައެއް އެހެން ފަރާތްތަކުން ބުނި ގޮތުގައި އެތަކެތި ހުރީ ފާހަނާގެ ފްލެޝް ޓޭންކްގެ ތެރޭގައެވެ.
ދެދުވަހުގެ މަތިން ފެނިފައިވާ މަސްތުވާތަކެތީގެ އަދަދު ރަސްމީ އެއްވެސް އިދާރާއަކުން ކަށަވަރުކޮށްދީފައިނުވެއެވެ. ނަމަވެސް ކަސްޓަމްސްއިން ވާހަކަދެއްކި އޮފިޝަލަކު ވަނީ އެތަކެތި ފެނުނު ކަމާއި، އެކަން ފުލުހުންނަށް އެންގުމުން އެކަމުގައި ފުލުހުން ހަރަކާތްތެރިވަމުންދާކަން ރާއްޖެއެމްވީއަށް ކަށަވަރުކޮށްދެއްވާފައެވެ.
މިކަމާއި ގުޅޭ ގޮތުން ބަހެއް ހޯދާލުމަށް ފުލުހުންނަށް ގުޅާލުމުން އަދި ފުލުހުންގެ ބަހެއް ލިބޭ ގޮތް ނުވެފައެވެ. މިކަން ކަށަވަރު ކުރުމަށް އެއާޕޯޓު ކޮންޕެނީގެ އޮފިޝަލަކަށް ގުޅާލުމުން އެފަރާތަކުން ވެސް މިކަމުގައި ވަކި އެއްޗެއް ވިދާޅުވުމަށް ވަނީ ދެކޮޅު ހައްދަވާފައެވެ.
ނަމަވެސް އާދިއްތަ ދުވަހާއި ހޮނިހިރު ދުވަހު ގިނަ އަދަދެއްގެ މަސްތުވާތަކެތި ހޯދިފައިވާކަން އިތުބާރުހުރި ފަރާތަކުން ރާއްޖެއެމްވީއަށް ވަނީ ކަށަވަރުކޮށްދީފައެވެ.
