ވަކިގޮތެއް އަންގަންދެން ހިޔާ ފްލެޓުން ނަގާ ކުންޏަށް ބިލް ނުކުރާގޮތަށް ހަމަޖައްސައިފި
28 ޖެނުއަރީ 2022 | ހުކުރު 01:01'ހައުސްހޯލްޑް' ކަލެކްޝަން ޚިދުމަތުގެ ފޯމުގައި ބިލް ކުރަން ފެށުމަށް މީގެ ކުރިން ނިންމާފައި ވީ ނަމަވެސް، އެ ނިންމުން މިހާރު ވަނީ ބަދަލުކޮށްފައި
ހިޔާ ފްލެޓްތައް
ހުޅުމާލޭ ދެވަނަ ފިޔަވަހީގައި އިމާރާތް ކޮށްފައިވާ ހިޔާ ފެލްޓްތަކުން ނަގާ ކުންޏަށް ވަކި ގޮތެއް އަންގަންދެން ބިލް ނުކުރާނެ ކަމަށް ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ބުނެފިއެވެ.
ވެމްކޯއިން ބުނީ، ދެވަނަ ފިޔަވަހީގެ އެޕާޓްމަންޓްތަކުގައި އުފެދޭ ކުނި އުކާލުމަށް އެދި ރެޖިސްޓަރ ކުރުމަށް ވެމްކޯގެ 'ހައުސްހޯލްޑް' ކަލެކްޝަން ޚިދުމަތުގެ ފޯމުގައި ބިލް ކުރަން ފެށުމަށް މީގެ ކުރިން ނިންމާފައި ވީ ނަމަވެސް، އެ ނިންމުން މިހާރު ބަދަލު ކޮށްފައިވާ ކަމަށެވެ.
އެގޮތަށް ނިންމާފައި ވަނީ ދެވަނަ ފިޔަވަހީގައި މީހުން އާބާދުވަމުންދާ މިންވަރަށް ބަލައި، އަދި އެފަދަ ފަރާތްތަކަށް އިތުރަށް ލުއި ފަސޭހަ ކޮށްދިނުމުގެ ގޮތުން ކަމަށް ވެމްކޯއިން ބުންޏެވެ.
ކުނި ނެގުމަށް ވެމްކޯއިން ލުޔެއް ދިނުމަށް ނިންމާފައި ވާއިރު، ހިޔާ ފްލެޓުގެ ފިނިޝިންގ މަސައްކަތްތައް ނިންމުމަށް އިތުރު ތިން މަސް ދުވަސްވެސް ވަނީ ދީފައެވެ. މިއާއެކު ފްލެޓްތަކުގެ ކުލި ނުނަގާ މުއްދަތު ވެސް އެޗްޑީސީން ވަނީ އިތުރުކޮށްދީފައެވެ. އެމުއްދަތު ހަމަވާނީ މާރޗް މަހުއެވެ.
ހިޔާ ފްލެޓްތަކުގެ ކުލި ނެގުން އިތުރު ތިން މަސް ދުވަހަށް ފަސްކޮށްފައިވާކަން އިއުލާންކުރައްވާފައިވަނީ މިދިޔަ އަހަރުގެ ޤައުމީ އެއްބައިވަންތަކަމުގެ ދުވަހާއި ގުޅިގެން ބޭއްވި ރަސްމިއްޔާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިހު އެވެ.
