އާސެނަލުގެ ކުރީގެ ކެޕްޓަން ގޮބެނަށް އުފަން ޕިއޭ-އެމެރިކް އޮބާމަޔަން ހޯދަން އިޓަލީގެ އޭސީ މިލާނުން ޝައުގުވެރިކަން ފާޅުކޮށްފައިވާ ކަމަށް ރިޕޯޓުތައް ބުނެފިއެވެ.

އާސެނަލާއެކު އުމުރުން މިހާރު 32 އަހަރު އޮބާމަޔަން ހަދާފައި އޮތް އެއްބަސްވުން ހަމަވާނީ 2023 ވަނަ އަހަރުގެ ހޫނު މޫސުމުގައެވެ. އެކަމަކު މިދިޔަ ޑިސެމްބަރު މަހު އަޚުލާގީ މައްސަލައަކާ ގުޅިގެން އާސެނަލުން ވަނީ އޮބާމަޔަން އަތުން ކެޕްޓަން ބޭންޑް އަތުލާފައެވެ.

އޭނާ އަތުން ބޭންޑް އަތުލީ ކުލަބުގެ ހުއްދަނެތި އާއިލާއާ ބައްދަލުކުރަން ފްރާންސަށް ދިއުމުން، އެކަމާ ބެހޭގޮތުން ކުލަބާ މެދު އުފެދުނު ދެބަސްވުމެއްގެ ތެރެއިން ކަމަށް ރިޕޯޓުތައް ބުނެއެވެ. އޭގެ ފަހުން އާސެނަލުން ކުޅުނު މެޗުތަކުގައި އޮބާމަޔަން ފެނިފައި ނުވާއިރު، މި ފަހުން ކުޅުނު މެޗުތަކުގައި އެ ޓީމުގެ ކެޕްޓަން ބޭންޑް އަޅައިގެން ކުޅެފައިވަނީ ފްރާންސްގެ ފޯވާޑް އަލެކްސަންޑަ ލަކަޒޭޓެވެ.

ރިޕޯޓުތައް ބުނާ ގޮތުން އާސެނަލް ދޫކޮށްލަން އޮބާމަޔަން މިހާރު ވަނީ ނިންމާފައެވެ. އެއާއެކު އޭނާ ހޯދަން މިލާނުން މަސައްކަތް ފަށާފައިވާއިރު، މި ފަހަރުގެ ޓްރާންސްފާ ބާޒާރު ބަންދުވުމުގެ ކުރިން އޮބާމަޔަންއަށް މިލާނުން ބިޑް ކުރާނެ ކަމަށް ރިޕޯޓުތައް ބުނެއެވެ. އަދި އާސެނަލުން އޮތީ އޮބާމަޔަން ވިއްކާލަން ތައްޔާރަށް ކަމަށްވެސް ވަނީ ރިޕޯޓުކޮށްފައެވެ.

އޮބާމަޔަން އާސެނަލް ދޫކޮށްލާއިރު، 2020 ވަނަ އަހަރު އޮބާމަޔަން އާސެނަލުގެ އެއްބަސްވުން އާކޮށްފައިވަނީ ސްޕެއިނުގެ ބާސެލޯނާއިން ލިބުނު ހުށަހެޅުމަށް ނޫނެކޭ ބުނުމަށްފަހުއެވެ. އެކަމަކު އާސެނަލުގައި އޮބާމަޔަންގެ ކުރިމަގެއް ނެތް ކަމަށް ބުނެ މީގެ ކުރިން ބައެއް ތަޖުރިބާކާރުން ވަނީ އޭނާ އާސެނަލް ދޫކޮށް ދިޔުމަށްވެސް ގޮވާލާފައެވެ.

ބޮރޫޝިއާ ޑޯޓްމުންޑް ދޫކޮށް 2018 ވަނަ އަހަރުގެ ޖެނުއަރީ މަހު 63 މިލިޔަން ޔޫރޯއަށް އާސެނަލަށް ސޮއިކުރި އޮބާމަޔަން ވަނީ މިހާތަނަށް އެ ޓީމަށް ކުޅެދިން 163 މެޗުގައި 92 ލަނޑު ޖަހާފައެވެ. އަދި ވަނީ އާސެނަލާއެކު އެފްއޭ ކަޕުގެ އިތުރުން ކޮމިއުނިޓީ ޝީލްޑުވެސް ކާމިޔާބުކޮށްފައެވެ.