ޕޮޒިޓިވްވިތަނެއް ކަށަވަރުނުވާ، 400ށްވުރެ ގިނަ ކޭސް ރިޕޯޓްކޮށްފި

ޕޮޒިޓިވްވީ ކޮންތަނަކުން ކަމެއް ނޭނގޭ 404 ސާމްޕަލްއާއެކު ރެކޯޑް އަދަކަށް މީހުން ޕޮޒިޓިވްވެއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)އިން އާންމުކޮށްފައިވާ ތަފާސް ހިސާބުތައް ދައްކާ ގޮތުން، ހޮނިހިރު ދުވަހުގެ އިރުއޮއްސި 6:00ން އާދީއްތަ ދުވަހުގެ އިރުއޮއްސި 6:00ށް ނެގި ސާމްޕަލްތަކުގެ ތެރެއިން 2484 މީހުން ވަނީ ޕޮޒިޓިވްވެފައެވެ. ހޮނިހިރު ދުވަހު 2484 މީހަކު ޕޮޒިޓިވްވި އިރު، ހުކުރު ދުވަހު 2349 މީހުން އަދި ބުރާސްފަތި ދުވަހު 1697 މީހުން ޕޮޒިޓިވްވެގެން ރިޕޯޓްކުރިއެވެ.

މި 24 ގަޑިއިރު ތެރޭގައި މާލެ ސަރަހައްދުން 3515 ސާމްޕަލާއެކު ޖުމްލަ 7536 ސާމްޕަލް ވަނީ ނަގާފައެވެ. މީގެ ތެރެއިން 2484 މީހަކު ޕޮޒިޓިވްވިއިރު، އޭގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވްވި 1268 މީހުންނާއި، ރަށްރަށުން ޕޮޒިޓިވްވި 728 މީހުންނާއި، ރިސޯޓްތަކުން ޕޮޒިޓިވްވި 81 މީހުންނެވެ. މިމީހުންގެ އިތުރުން މި 24 ގަޑިއިރު ތެރޭގައި 404 މީހުން ޕޮޒިޓިވްވީ ކޮން ތަނަކުން ކަމެއް ދެނެގަނެވިފައެއް ނުވެއެވެ.

އާދިއްތަ ދުވަހު 729 މީހަކު ބަލިން ރަނގަޅުވެފައިވާ އިރު، ޖުމްލަ 102،542 މީހުން ވަނީ ބަލިން ރަނގަޅުވެފައެވެ. އެކްޓިވް ކޭސްތަކުގެ އަދަދު 14،636ށް އަރާފައިވާ އިރު، މީގެ ތެރެއިން ހޮސްޕިޓަލްތަކުގައި ފަރުވާދެމުން އަންނަނީ 47 މީހުންނަށެވެ. މި 24 ގަޑިއިރުތެރޭގައި 1328 މީހުން އެކްޓިވް ކޭސްތަކަށް އިތުރުވެފައިވާ އިރު، ހަފުތާއެއްގެ ތެރޭގައި އެޑްމިޓް ކުރި މީހުންގެ އަދަދު ވަނީ ދެގުނައަށް އިތުރުވެފައެވެ.

މިހާތަނަށް 270 މީހުން ވަނީ ބަލީގައި ނިޔާވެފައެވެ.

މާލެ ސަރަހައްދުގައި ސާމްޕަލް ޕޮޒިޓިވިޓީ ރޭޓް ހުރީ 36 އިންސައްތައިގައެވެ. މިއީ މީގެ ހަފުތާއަކާ އަޅައިބަލާއިރު 10 އިންސައްތައިގެ އިތުރުވުމެކެވެ. މާލެ ސަރަހައްދުގައި ޚާއްސަ ފިޔަވަޅުތަކެއް އަޅާފައިވާ އިރު، މާލެ ސަރަހައްދުން ރަށްރަށަށް ދަތުރުކުރާ ފަރާތްތަކުން އަމަލުކުރަންޖެހޭ އުސޫލުތަކެއް ވަނީ މިހާރު ކަނޑައަޅާފައެވެ.