ދަފްތަރު އަފްޑޭޓް ކުރި އިރު ކުރީ ސަރުކާރުން، ކުޑަކުދިންނަށް ޖިންސީ ގޯނާކުރި ދެމީހަކު ކްލެމެންސީގެ ދަށުން ދޫކޮށްފައި
މީގެ ކުރިންވެސް ކްލެމެންސީގެ ދަށުން މީހަކު ދޫކޮށްފައިވޭ
ޖިންސީ ގޯނާކުރާ މީހުންނާ ދެކޮޅަށް ރައްޔިތުން އަޑުއުފުލުން
ގިނަ ދުވަސްތަކެއް ވަންދެން ކުޑަކުދިންނަށް ޖިންސީ ގޯނާކުރާ މީހުންގެ ދަފްތަރު އަޕްޑޭޓް ނުކޮށް އޮތުމަށްފަހު އެ އަޕްޑޭޓް ކުރި 2016 ވަނަ އަހަރު ކުރީ ސަރުކާރުން ކުޑަކުދިންނަށް ޖިންސީ ގޯނާކުރިކަމުގެ ކުށް ސާބިތުވެ ހުކުމް ތަންފީޒުކުރަމުންދިޔަ ދެމީހަކު ދޫކޮށްލައިފިކަން ހާމަވެއްޖެއެވެ.
މި ދެމީހުން ދޫކޮށްލާފައިވަނީ ކްލެމެންސީގެ ދަށުން މައާފު ދީގެންނެވެ. މިކަން ހާމަވީ ޖެންޑާ މިނިސްޓްރީން ބުރާސްފަތި ދިުވަހު އަޕްޑޭޓްކޮށް އާންމުކުރި ކުޑަކުދިންނަށް ޖިންސީ ގޯނާ ކުރި މީހުންގެ ވަނަވަރު ހިމެނޭ ދަފްތަރުންނެވެ. މިނިސްޓްރީގެ ދަފްތަރުގައިވާ ގޮތުން ކްލެމެންސީގެ ދަށުން ދޫކޮށްލާފައިވަނީ އުމުރުން 28 އަހަރުގެ ނ. މަގޫދޫ، ޖަވާހިރުގޭ މުޙައްމަދު ޖަމީލު އާއި އުމުރުން 31 އަހަރުގެ ހދ. މާވައިދޫ ބޮލިޖެހިގޭ އަފްރަހު ހުސައިންއެވެ. މީގެ ތެރެއިން މުހައްމަދު ޖަމީލު ދޫކޮށްލަން ބޯޑުން ލަފާ ދިނީ 2016 ފެބްރުއަރީ 29 ގައެވެ. އަދި ރައީސްގެ ނިންމެވުން ނިންމަވާފައިވަނީ އެ އަހަރުގެ ސެޕްޓެމްބަރު މަހުގެ 8 ވަނަ ދުވަހުއެވެ. މީގެ އިތުުރުން އަފްރަހު ހުސައިން ދޫކޮށްލަން ބޯޑުން ލަފާ ދިނީ 2016 މާޗް 3 ވަނަ ދުވަހުއެވެ. އަދި ރައީސްގެ ނިންމެވުން ނިންމަވާފައިވަނީ ސެޕްޓެމްބަރު މަހުގެ 8 ވަނަ ދުވަހުއެވެ.
މި ދެމީހުން ދޫކޮށްލި އިރު ވެސް ކުޑަކުދިންނަށް ޖިންސީ އަނިޔާކުރާ މީހުންގެ ދަފްތަރު އަޕްޑޭޓް ނުކުރެއެވެ. އަދި އެފަހުން މި މައްސަލައިގައި އާންމުންގެ ކަންބޮޑުވުން ހުރުމާއެކު މި ދަފްތަރު އަޕްޑޭޓް ކޮށްފައިވަނީ މި ހަފްތާ ތެރޭގައެވެ.
މައާފު ދިނުމަށްފަހު ދޫކޮށްލާފައިވާ ޖަމީލުގެ މައްޗަށް ކުށް ސާބިތުވެ ހުކުމް ތަންފީޒުކުރަން ފަށާފައިވަނީ 27 ޑިސެމްބަރު 2012ގައެވެ. އޭނާގެ މައްޗަށް ކޮށްފައިވާ 10 އަހަރުގެ ހުކުމުގެ މުއްދަތު ހަމަވާނީ 24 ޑިސެމްބަރު 2022 އަށެެވެ. އަދި އަފުރަހުގެ މައްޗަށް ކުށް ސާބިތުވެފައިވަނީ 24 މާޗު 2013 ވަނަ އަހަރުއެވެ. އޭނާގެ މައްޗަށް ހުކުމް ތަންފީޒުކުރަން ފަށާފައިވަނީ 2013 ވަނަ އަހަރުގެ އޭޕްރީލް މަހުގެ ދެވަނަ ދުވަހުން ފެށިގެންނެވެ. އަފްރަހްގެ މައްޗަށް ކޮށްފައިވާ 14 އަހަރުގެ ހުކުމުގެ މުއްދަތު ހަމަވާނީ 31 މެއި 2025ގެ ނިޔަލަށެވެ.
މި ދެމީހުންނަކީވެސް ކުޑަކުދިންނާއި ބަދުއަޙްލާގީ އަމަލު ހިންގުމުގެ ކުށް ސާބިތުވެގެން ހުކުމްކޮށްފައިވާ ދެމީހުންނެވެ.
ކްލެމެންސީ ބޯޑަކީ މާއާފްކޮށްދިނުމަށް އެދި ނުވަތަ އަދަބު ލުއިކޮށްދިނުމަށް އެދި ރައީސުލްޖުމްހޫރިއްޔާއަށް ހުށަހެޅުމުން އެ ހުށަހެޅުން ދިރާސާކޮށް އެ ހުށަހެޅުމާ މެދު އަމަލުކުރަންވީ ގޮތުގެ ލަފާދިނުމަށް އުފައްދާފައިވާ ބޯޑެކެވެ.
މީގެ ކުރިންވެސް އެގާނޫނުގެ ދަށުން މީހަކު ވަނީ ދޫކޮށްލާފައެވެ. އެފަހަރު ދޫކޮށްލާފައިވަނީ ރައީސް އޮފީހުގެ ކުރީގެ އަންޑަރ ސެކްރެޓަރީ އިބްރާހިމް ރަޝީދު (ހޯރައިއްބެ) އެވެ. އޭނާ ދޫކޮށްލުމާއެކު ގިނަ ބަޔަކު ކަންބޮޑުވުން ފާޅުކޮށްފައި ވާއިރު، އޭގެ ތެރޭގައި ރައްޔިތުންގެ މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެމްބަރު އީވާ އަބްދުﷲވެސް ހިމެނިވަޑައިގަންނަވައެވެ.
އިބްރާހިމް ރަޝީދުގެ މައްޗަށް ކުށް ސާބިތުވެ 10 އަހަރަށް ޖަލަށްލުމަށް ކްރިމިނަލް ކޯޓުން ހުކުމް ކޮށްފައި ވަނީ 2013 ވަނަ އަހަރުގެ ޑިސެމްބަރު އެއްވަނަ ދުވަހުއެވެ.
