ޖިންސީ ގޯނާގެ މައްސަލައިގައި މީހަކު ހައްޔަރުކޮށްފައެއް ނުވޭ

ކ އަތޮޅުގެ ރަށެއްގައި ކުޑަކުއްޖަކަށް ޖިންސީ ގޯނާ ކުރި މައްސަލައެއް ފެންމަތިވެ އާންމުންގެ ގިނަ ބައެއްގެ ސަމާލުކަން އެ މައްސަލައަށް ލިބިފައިވާއިރު، އެ މައްސަލައާ ގުޅިގެން މިހާތަނަށް މީހަކު ހައްޔަރުކޮށްފައިނުވާކަމަށް ފުލުހުން ބުނެފިއެވެ.

މި މައްސަލައާއި ގުޅިގެން ފުލުހުން ބުނެފައިވަނީ، އެރަށުގައި އުމުރުން 14 އަހަރުގެ އަންހެން ކުއްޖަކަށް ޖިންސީ ގޯނާ ކުރިކަމަށް ތުހުމަތުކުރެވޭ ކަމަށާއި، ޖިންސީ ގޯނާ ކުރިކަމަށް ތުހުމަތުކުރެވޭ މައްސަލައިގެ ތަހުގީގުގައި މިހާތަނަށް ކޮށްފައިވާ މަސައްކަތުން، ކުއްޖާއަށް ޖިންސީ ގޯނާކޮށްފައިވާކަމުގެ ހެކި ލިބިފައިވާ ކަމަށެވެ.

އެހެންނަމަވެސް ޖިންސީ ގޯނާ ކުރީ ކާކުކަމެއް ފުލުހުން ހާމަކޮށްފައެއް ނުވެއެވެ.

ކުޑަކުއްޖާއަށް ޖިންސީ ގޯނާކުރިކަމަށް ބުނެ އާންމުން ނުކުމެ ޒުވާނަކަށް ހަމަލާދީފައިވާ އިރު، އޭރު ހިނގާދިޔަ ހަމަނުޖެހުން ކޮންޓްރޯލްކޮށްފައިވަނީ މާލެއިން ސްޕެޝަން އޮޕަރޭޝަންސްގެ ފުލުހުން ގޮސްގެންނެވެ. މި ހަމަނުޖެހުންތަކުގައި ފުލުހުންނަށާއި، ޖިންސީގޯނާގެ ތުހުމަތުކުރެވޭ މީހާއަށް އެކިވަރުގެ އަނިޔާ ލިބިފައިވާކަމަށް ފުލުހުން ބުނެއެވެ. އެގޮތުން ފުލުހަކަށް ހަމަލާދިން ކަމުގެ ތުހުމަތު ކުރެވޭ 22 އަހަރުގެ ދިވެހި ފިރިހެނަކު ކުށުގެ ވެށިން ހައްޔަރުވެސް ކުރިއެވެ.

ފުލުހުން ބުނީ ޖިންސީ ގޯނާ ކުރިކަމަށް ތުހުމަތުކުރެވޭ މައްސަލައިގެ އިތުރުން، ތުހުމަތުކުރެވޭ މީހާއަށް ހަމަލާދީ މާރާމާރީ ހިންގި މައްސަލައާއި، އަމަން ބެލެހެއްޓުމުގައި ހަރަކާތްތެރިވި ފުލުހުންނަށް ހަމަލާދީ މާރާމާރީ ހިންގި މައްސަލައާއި، ކ. ދިއްފުށީ ސިއްހީ މަރުކަރުގެ ތަކެއްޗަށް ގެއްލުންދީގައިވާ މައްސަލަ ފުލުހުން ތަހުގީގުކުރަމުންދާ ކަމަށެވެ.

އެކަމާ ގުޅޭގޮތުން ރާއްޖެއެމްވީން ސުވާލުކުރުމުން ފުލުހުން ބުނީ، ކުޑަކުއްޖާއަށް ޖިންސީ ގޯނާ ކުރި މައްސަލަވެސް އަދިވެސް ތަހުގީގު ކުރަމުންދާ ކަމަށެވެ. އެހެންނަމަވެސް މިހާތަނަށް އެ މައްސަލައިގެ ތުހުމަތުގައި މީހަކު ހައްޔަރުކޮށްފައިނުވާކަމަށް ފުލުހުން މައުލޫމާތުދެއެވެ.

މި މައްސަލައިގައި ޖިންސީ ގޯނާ ކުރިކަމުގެ ތުހުމަތު ކޮށް އެރަށު މީހުން އަނިޔާ ކޮށްފައިވާ ފަރާތަށް ލިބިފައިވާ އަނިޔާތަކަށް މިހާރުވެސް އޭނާ ގެންދަނީ ފަރުވާ ހޯދަމުންނެވެ. މިފަދަ މައްސަލަތަކާއި ގުޅިގެން އެއްވެސް މީހަކު ނުވަތަ ބަޔަކު އަމިއްލައަށް ކަންތައްތަކެއް ކުރުމުގެ ބަދަލުގައި، ޖިނާއީ މައްސަލަތައް ތަހުގީގު ކުރުމުގެ ގާނޫނީ ޒިންމާ އޮންނަ ދައުލަތުގެ އިދާރާތަކަށް އަންގައިގެން އޮންނަ އުސޫލުތަކުގެ ތެރެއިން ކުރިއަށް ގެންދިއުމަށް ވަނީ އިލްތިމާސްކޮށްފައެވެ.

މި މައްސަލައިގައި އަނިޔާވި މީހާ ވަނީ ތުހުމަތުތަކަށް އިންކާރުކޮށްފައެވެ.