އއ.ހިމަންދޫ ސްކޫލުގެ 12 ކްލާސްރޫމް އަދި މަލްޓިޕަރޕަސް ހޯލް އިމާރާތުގެ މަސައްކަތް ބަޔަކާއި ހަވާލުކޮށް އެގްރީމެންޓްގައި ސޮއިކޮށްފިއެވެ.
މިނިސްޓްރީ އޮފް އެޑިއުކޭޝަންގައި ބުރާސްފަތި ދުވަހު އޮތް ރަސްމިއްޔާތެއްގައ ހިމަންދޫ ސްކޫލުގެ 12 ކްލާސްރޫމް އަދި މަލްޓިޕަރޕަސް ހޯލް އިމާރާތުގެ މަސައްކަތް ހަވާލުކޮއްފައިވަނީ މާލާ ހައި ރައިޒިން ޕްރައިވެޓް ލިމިޓެޑާއެވެ.
360 ދުވަހުގެ ތެރޭގައި ނިންމުމަށް ހަވާލު ކުރި މިމަސައްކަތަށް އެކުންފުނިން ހުށައަޅާފައިވާ އަގަކީ 22,908,694.22 ރ (ބާވީސް މިލިޔަން ނުވަ ލައްކަ އަށްހާސް ހަ ސަތޭކަ ނުވަދިހަ ހަތަރު ރުފިޔާ ބާވީސް ލާރި) ކަމަށް މިނިސްޓްރީ އޮފް އެޑިއުކޭޝަނުން ބުނިއެވެ.
ހިމަންދޫ ސުކޫލުގެ އިތުރުން އއ. އަތޮޅު ތައުލީމީ މަރުކަޒަށް އަލަށް އިތުރުކުރާ ކުލާސްރޫމުތަކުގެ މަސައްކަތުގެ އެގްރީމެންޓްގައި ވެސް މި ޖެނުއަރީ މަހުގައިވަނީ ސޮއިކޮށްފައެވެ. މިގޮތުން އއ. އަތޮޅު ތަޢުލީމީ މަރުކަޒު ގެ 08 ކްލާސްރޫމް، އޮފީސް، ސްޓާފްރޫމް އަދި މަލްޓިޕަރޕަސް ހޯލް އިމާރާތުގެ މަސައްކަތް ޔެސް މޯލްޑީވްސް ޕްރައިވެޓް ލިމިޓެޑާއި ހަވާލުކޮށްފައިވަނީ އެފަރާތުން މި މަސައްކަތް 400 ދުވަހުގެ ތެރޭގައި ނިންމާ ގޮތަށެވެ. އަދި މި މަސައްކަތަށް ޔެސް މޯލްޑިވްސް ޕްރައިވެޓް ލިމިޓެޑުން ހުށައަޅުއްވާފައިވަނީ 21,913,159.73 ރ(އެކާވީސް މިލިޔަން ނުވަ ލައްކަ ތޭރަ ހާސް އެއްސަތޭކަ ފަންސާސް ނުވަ ރުފިޔާ ހަތްދިހަ ތިން ލާރި) އެވެ.
