ދޯދިޔާ ރަހުމަތްތެރިކަމެއްގެ ނުބައިކަން މާތް ﷲ އެފަރާތަކަށް ރައްދުކުރައްވާނެ

ރަހުމަތްތެރިކަމުގެ ގުޅުމަކީ ދޯދިޔާ، ނުބައި ގުޅުމެއްކަމުގައި ވާނަމަ، އޭގެ ނުބައިކަން މާތް ﷲ، އެފަރާތަކަށް ރައްދު ކުރައްވާނެކަމަށް ހުކުރު ޚުތުބާގައި ބުނެފިއެވެ.

ހެޔޮލަފާ ރަހުމަތްތެރިން އިޚްތިޔާރު ކުރުމާ ގުޅޭގޮތުން ރާއްޖޭގެ އެކި ކަންކޮޅުތަކުގައި އިއްވި ހުކުރު ޚުތުބާގައި ބުނީ ރަހުމަތްތެރީންނަކީ ޖަމާއަތެއްގެ ކުރިއެރުމާއި، ފަހަތަށްޖެހުމުގައި ވަރަށްބޮޑު ދައުރެއް އަދާކުރާ ބައެއް ކަމަށެވެ. ހިތްހަމަޖެހުމާއި، ނުތަނަވަސްކަން ގެނެސްދިނުމުގައާއި، މީހުންގެ ހަޔާތާއި، ވިސްނުމާއި، ފިކުރަށްވެސް، ރަހުމަތްތެރިންގެ އަސަރު ވަރަށް ބޮޑު ކަމަށް ޚުތުބާގައި ބުނެފައިވެއެވެ.

ރަޙްމަތްތެރީން އިޚްތިޔާރު ކުރުމުގައި، އިސްލާމް ދީން ވަނީ މަތިވެރި އިރްޝާދުތަކެއް ދެއްވާފައި ކަމަށް ޚުތުބާގައި ބުނެފައިވެއެވެ. އެގޮތުން ރަހުމަތްތެރިކަމުގެ ގުޅުން އުފެދި ބޮޑުވެފައި ވަނީ، އިޚްލާސްތެރިކަމާއި، މަތިވެރި މަގުސަދެއްގައި ކަމުގައި ވާނަމަ، އެއީ މާތް ﷲ އެކަމުގައި ބަރަކާތް ލައްވަވާނެ ގުޅުމެއް ކަމަށް ބުނެފައިވެއެވެ. އަދި އެއީ ދޯދިޔާ، ނުބައި ގުޅުމެއްކަމުގައި ވާނަމަ، އޭގެ ނުބައިކަން މާތް ﷲ، އެފަރާތަކަށް ރައްދު ކުރައްވާނެކަމަށް ޚުތުބާގައި ބުނެފައިވެއެވެ.

އިންސާނެއްގެ ހިތަށް އީމާންކަން ވަދެ، އެކަމުގެ ފޮނިކަން އިހުސާސް ކުރެވިއްޖެ ނަމަ، އޭނާގެ އެކުވެރިކަން އޮންނާނީ މިއުސޫލުގެ މަތީގައި ކަމަށް ޚުތުބާގައި ބުނެފައިވެއެވެ. އެއީ ވަކި އެދުމެއް ހާސިލުކުރުމަށްޓަކައި، އުފެއްދޭ ގުޅުމަކަށް ނުވާނެ ކަމަށާއި، އެފަދަ މީހުން މިގުޅުން ކަނޑާނީ ވެސް، ހަމަ މި އުސޫލުން ކަމަށް ޚުތުބާގައި ބުނެފައިވެއެވެ.

އިންސާނުންގެ މިޒާޖުގައި ރަހުމަތްތެރިންނާއި، އެކުވެރިން ކޮޕީ ކުރާ ގޮތް ހުންނަ ކަމަށް ޚުތުބާގައި ބުނެފައިވެއެވެ. އަހިވަކަކާ ޖެހި އަހިވަކެއް ފާވާގޮތަށް އޭނާގެ ނުބައި އަޚްލާގުން މީނާއަށް ނުބައި އަސަރު ފޯރުވާކަމަށް ޚުތުބާގައި ބުނެފައިވެއެވެ. ހެޔޮ ކަންތައްތަކުގެއަސަރަށް ވުރެ، ނުބައި ކަންތައްތަކުގެ އަސަރު އާއްމުގޮތެއްގައި މާ ވަރުގަދަވ ކަމަށާއި، ވަރަށްގިނަ ފަހަރަށް ސިނގިރެޓް ބުއިމާއި، މަސްތުވާތަކެތީގެ ދަލުގައި ޖެހުމާއި، އިސްލާމް ދީން މަނާކުރާ، ފާހިޝް އަމަލުތަކުގެ ޖާދޫގައި ޖެހެނީ ރަހުމަތްތެރީންގެ ސަބަބުން ކަމަށް ޚުތުބާގައި ވަނީ ބުނެފައެވެ.

ރަހުމަތްތެރީންނަކީ، ވާޖިބުތައް އަދާކުރުމުގައާއި، ހައްގުތަކަށް ރައްކާތެރިކުރުމުގައި އެހީވެދޭ ބައެއްނަމަ އެއީ ހެޔޮ ރަނގަޅު ރަހުމަތްތެރިން ކަމަށާއި، މިފަދަ ރަހުމަތްތެރީންގެ ރަހުމަތްތެރިކަން ދަމަހައްޓަންވާނެ ކަމަށް ޚުތުބާގައި ވަނީ ބުނެފައެވެ. ރަނގަޅު ރަހުމަތްތެރިއަކީ، ދުނިޔެއާ އާޚިރަތުގައި ކާމިޔާބީގެ މަގަށް އެމީހާ މިސްރާބުކޮށްދޭނެ މީހެއް ކަމަށާއި، މިއާ ޚިލާފަށް ނުބައި ރަޙްމަތްތެރިޔަކީ، އޭނާގެ އެކުވެރިޔާގެ ހަލާކު ކަމަށް ޚުތުބާގައި ބުނެފައިވެއެވެ.