ރާއްޖެއިން ފެންނަ ކޭސްތައް ޕީކަށް އަރައިގެންދާއިރު ދުވާލެއްގެ މައްޗަށް 6000 އާއި 9،000 އާއި ގާތްކުރާ އަދަދަކަށް ކޭސްތައް ރިޕޯޓްކުރާނެ ކަމަށް އަންދާޒާކޮށްފިއެވެ.
މިފަހަކަށް އައިސް ރާއްޖެއިން ފެންނަ ކޮވިޑް-19ގެ ކޭސްތައް ބޮޑެތި އަދަދުތަކުން އަންނަނީ ރިޕޯޓްކުރަމުންނެވެ. ރާއްޖޭގައި އިތުރުވަމުންދާ ކޮވިޑް-19ގެ ކޭސްތަކާ ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ އެޕިޑިއަމޮލަޖިސްޓް ޑރ. އިބްރާހިމް އަފްޒަލް ވިދާޅުވީ މިވަގުތު ރާއްޖޭގައި ކޮވިޑް-19 ފެތުރެމުންދަނީ ވަރަށް ބާރު ސްޕީޑެއްގައި ކަމަށާއި، ކުރިއާ ހިލާފަށް ކޭސްތައް އިތުރުވަމުން އަންނަ ކަމަށެވެ.
މިވަގުތު ރާއްޖެއިން ފެންނަ ކޭސްތަކުގެ "ޑަބަލިންގ ޓައިމް" ނުވަތަ ކޭސްތައް ދެގުނަވާ މުއްދަތަށް ބަލާއިރު، އެވަރޭޖްކޮށް ތިން ދުވަހުގެ ތެރޭގައި ކޭސްތައް ދެގުނަ ވެގެންދާ ކަމަށް ޑރ. އަފްޒަލް ވިދާޅުވިއެވެ. މިހާރު އަންދާޒާ ކޮށްފައިވާގޮތަށް ބަލާއިރު ވަރަށް ބޮޑު ޕީކަކަށް ދާނެއެވެ. އެގޮތުން ދުވާލެއްގެ މައްޗަށް ފެންނަ ކޭސްތައް ޕީކަށް އަރައިގެންދާއިރު، ދުވާލަކު 6،000 ނުވަތަ 9،000 އާ ގާތްކުރާ އަދަދަކަށް ކޭސްތައް ރިޕޯޓްކުރާނެ ކަމަށް އަންދާޒާކުރެވޭ ކަމަށް ޑރ. އަފްޒަލް ވިދާޅުވިއެވެ.
އަޅުގަނޑުމެންގެ ޕްރޮޖެކްޝަން މޮޑެލްއަށް ބަލައިފިއްޔާ ވަރަށްވެސް ހައި ޕީކަކަށް ދާނެ. ޕްރޮޖެކްޝަންއަކީ އަންކޮންޓްރޯލްޑް އިވެންޓެއް. އެ ކޮންޓްރޯލް ކުރެވޭނީ ކޭސްލޯޑް ދަށްކުރަން އެންމެން ގުޅިގެން މަސައްކަތް ކޮށްގެންއެޕިޑިއަމޮލަޖިސްޓް ޑރ. އިބްރާހިމް އަފްޒަލް
ޑރ. އަފްޒަލް ވިދާޅުވީ ރައްކާތެރިކަމުގެ ފިޔަވަޅުތައް ރަނގަޅަށް އަަޅައިފިނަމަ މި އަންދާޒާއަށްވުރެ ފެންނަ ކޭސްތައް ދަށްކުރެވޭނެ ކަމަށެވެ. އަދި މިހާރުން ފެށިގެން މިކަންކަމަށް ސަމާލުކަން ދޭންޖެހޭ ކަމަށާއި، އެންމެ ޕީކަށް ދާ ހިސާބުން ފިޔަވަޅުތަކަށް ސަމާލުކަންދީގެން ބަލި ފެތުރުން ކޮންޓްރޯލް ކުރަން އުނދަގޫވާނެ ކަމަށް ޑރ. އަފްޒަލް ވިދާޅުވިއެވެ.
ޑރ. އަފްޒަލް ވިދާޅުވީ މާލެއެކޭ އެއްގޮތަށް އަތޮޅުތެރެއިން ފެންނަ ކޭސްތައްވެސް މިހާރު ދަނީ އިތުރުވަމުން ކަމަށެވެ. އަތޮޅުތެރެއިން ފެންނަ ކޭސްތައް އިތުރުވަމުންދާއިރު، އަތޮޅުތެރޭގައި އޮމިކްރޯން ވޭރިއަންޓްވެސް އުޅޭނެ ކަމަށް ބަލަންޖެހޭ ކަމަށާއި، އެހެންކަމުން އަތޮޅުތެރޭގައިވެސް ރައްކާތެރިކަމުގެ ފިޔަވަޅުތައް އެޅުމަށް އިތުރަށް ސަމާލުކަން ދޭންޖެހޭ ކަމަށް ޑރ. އަފްޒަލް ވިދާޅުވިއެވެ.
މިގޮތަށް ކޭސްތައް އިތުރުވަމުންދާނަމަ ދެން ޖެހޭނީ ލޮކްޑައުންއަކަށް ދާން ކަމަށާއި، މިފަދަ ހާލަތަކަށްދާން އެއްވެސް މީހަކު ބޭނުމެއް ނުވާނެ ކަމަށް ޑރ. އަފްޒަލް ވިދާޅުވިއެވެ. އެހެންކަމުން މިހާރުން ފެށިގެން އެޅެންހުރި ފިޔަވަޅުތައް އެޅުން މުހިންމު ކަމަށް ވިދާޅުވިއެވެ.
