ކޮވިޑްގެ ނުރައްކާ ލެވެލް ރަތް ކުލައަށް، މާލެއިން އެކަނި 826 ކޭސް
ހޮސްޕިޓަލްތަކުގައި 32 މީހަކަށް އެޑްމިޓްކޮށްގެން ދަނީ ފަރުވާ ދެމުން
ކޮވިޑް19 އަށް ސާމްޕަލް ނެގުމަށް ފަންނީ ޓީމަކުން ހަރަކާތްތެރިވަނީ
ކޮވިޑްގެ ނުރައްކާ ލެވެލް ރަތް ކުލައަށް ބަދަލުކޮށްފިއެވެ.
ކޮވިޑްގެ ނުރައްކާ ލެވެލް ރަތަށް ބަދަލުކޮށްފައިވަނީ ގިނަ ދުވަސްތަކެއް ވަންދެން ލެވެލް އޮރެންޖުގައި ހުރުމަށްފަހުގައެވެ. މިދިޔަ އަހަރު ސެޕްޓެމްބަރު މަހުގެ 9 ވަނަ ދުވަހުން ފެށިގެން އޮރެންޖް އެލާރޓް ނެރުމަށްފަހު އެމަހުގެ 26 ވަނަ ދުވަހު އެލާރޓް ރީނދޫ ކުލައަށް ބަދަލު ކުރިއެވެ. އަދި އެފަހުން މި އަހަރުގެ ޖެނުއަރީ މަހުގެ 10 ވަނަ ދުވަހު ލެވެލް އޮރެންޖަށް ބަދަލު ކުރުމަށްފަހު 17 ވަނަ ދުވަހު އެލާރޓް ރަތަށް ބަދަލުކުރިއެވެ.
ހެލްތް ޕްރޮޓެކްޝަން އެޖެންސީން އާންމުކޮށްފައިވާ ތަފާސް ހިސާބުތައް ދައްކާ ގޮތުން، އާދީއްތަ ދުވަހުގެ އިރުއޮއްސި 6:00ން ހޯމަ ދުވަހުގެ އިރުއޮއްސި 6:00ށް ނެގި ސާމްޕަލްތަކުގެ ތެރެއިން 1420 މީހުން ވަނީ ޕޮޒިޓިވްވެފައެވެ. މިއީ ޖެހިޖެހިގެން 1000ން މަތިން ޕޮޒިޓިވް ކޭސްތައް ރިޕޯޓްކުރި ދެވަނަ ދުވަހެވެ. އާދީއްތަ ދުވަހު 1209 މީހުން ޕޮޒިޓިވްވެގެން ރިޕޯޓްކުރިއެވެ.
މި 24 ގަޑިއިރު ތެރޭގައި މާލެ ސަރަހައްދުން 3439 ސާމްޕަލާއެކު ޖުމްލަ 6456 ސާމްޕަލް ވަނީ ނަގާފައެވެ. 1420 މީހަކު ޕޮޒިޓިވްވިއިރު، މީގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވްވި 826 މީހުންނާއި، ރަށްރަށުން ޕޮޒިޓިވްވި 346 މީހުންނާއި، ރިސޯޓްތަކުގެ ޕޮޒިޓިވްވި 84 މީހުންގެ އިތުރުން ސަފާރީތަކުން ޕޮޒިޓިވްވި 1 މީހަކު ހިމެނެއެވެ. މި 24 ގަޑިއިރު ތެރޭގައި 163 މީހަކު ޕޮޒިޓިވްވީ ކޮން ތަނަކުން ކަމެއް ދެނެގަނެވިފައެއް ނުވެއެވެ.
ހޯމަ ދުވަހު 402 މީހަކު ބަލިން ރަނގަޅުވެފައިވާ އިރު، ޖުމްލަ 97،730 މީހުން ވަނީ ބަލިން ރަނގަޅުވެފައެވެ. އެކްޓިކް ކޭސްތަކުގެ އަދަދު 6993ށް މަތިވެފައިވާ އިރު، މީގެ ތެރެއިން ހޮސްޕިޓަލްތަކުގައި ފަރުވާދެމުން އަންނަނީ 32 މީހުންނަށެވެ. މިއީ އާދީއްތަ ދުވަހަށްވުރެ 6 މީހުން އިތުރު އަދަދެކެވެ. މިހާތަނަށް 265 މީހުން ވަނީ ބަލީގައި ނިޔާވެފައެވެ.
މާލެ ސަރަހައްދުގައި ސާމްޕަލް ޕޮޒިޓިވިޓީ ރޭޓް ހުރީ 24 އިންސައްތައިގައެވެ. މާލެ ސަރަހައްދުގައި ޚާއްސަ ފިޔަވަޅުތަކެއް އަޅާފައިވާ އިރު، މާލެ ސަރަހައްދުން ރަށްރަށަށް ދަތުރުކުރާ ފަރާތްތަކުން އަމަލުކުރަންޖެހޭ އުސޫލުތަކެއް ވަނީ މިހާރު ކަނޑައަޅާފައެވެ.
