ސެޓެލައިޓް ނިޒާމުން ބޭރު ގައުމުތަކުންވެސް ރަނގަޅު ނަތީޖާއެއް ހާސިލްކޮށްފައިވޭ: ޑރ. އައިޝަތު އަލީ
17 ޖެނުއަރީ 2022 | ހޯމަ 08:38ރާއްޖޭގެ 3 ރަށެއްގައި ސެޓެލައިޓް ސްކޫލް ވަނީ އިފްތިތާހުކޮށްފައި
ސެޓެލައިޓް ސްކޫލް އިފްތިތާހުކުރުމުގެ ރަސްމިއްޔާތު
ސެޓެލައިޓް ނިޒާމުގެ ތެރެއިން ތައުލީމު ފޯރުކޮށްދިނުމަކީ ބޭރު ގައުމުތަކުން ރަނގަޅު ނަތީޖާތަކެއް ހާސިލްކޮށްފައިވާ ނިޒާމެއް ކަމަށް އެޑިއުކޭޝަން މިނިސްޓަރ ޑރ. އައިޝަތު އަލީ ވިދާޅުވެއްޖެއެވެ.
އެޑިއުކޭޝަން މިނިސްޓަރު މިފަދައިން ވިދާޅުވީ ހޯމަ ދުވަހު ސެޓެލައިޓް ސްކޫލް ރާއްޖޭގެ 3 ރަށެއްގައި އިފްތިތާހުކުރުމުގެ ރަސްމިއްޔާތުގައި ބ. ފެހެންދޫގައި ހުންނަވައި، ވަރޗުއަލްކޮށް ބައިވެރިވެވަޑައިގެން ވާހަކަފުޅު ދައްކަވަމުންނެވެ.
މިނިސްޓަރ ވިދާޅުވީ އެކި ސަބަބުތަކާހުރެ ވަރަށް ބޮޑަށް ހީނަރުވެފައިވާ މަދަރުސާތައް އެހެން ބޮޑެތި ސްކޫލްތަކާ ގުޅިގެން ހިންގުމަކީ މީގެ ކުރިންވެސް ކޮށްފައިވާ ކަމެއް ކަމަށެވެ. މިހާރު ފަށައިގަނެވިފައިމިވާ ސެޓެލައިޓް ނިޒާމަކީވެސް މިފަދަ ނިޒާމެއް ކަމަށާއި، މިއީ ދުނިޔޭގެ އެހެން ގައުމުތަކުންވެސް ކޮށް، ރަނގަޅު ނަތީޖާއެއް ހާސިލްކޮށްފައިވާ މަސައްކަތެއް ކަމަށް މިނިސްޓަރ ވިދާޅުވިއެވެ.
ސެޓެލައިޓް ނިޒާމުގައި ކުދި ރަށްރަށުގެ މަދަރުސާތަކުގައި ކިޔަވައިދެމުންދާނީ ބޮޑު ސްކޫލެއްގެ ދަށުން ކަމަށް މިނިސްޓަރ ވިދާޅުވިއެވެ. ބ. ފެހެންދޫއާއި، ވ. ރަކީދޫ އަދި ވ. ތިނަދޫގައި ގާއިމްކޮށްފައިވާ ސެޓެލައިޓް ސްކޫލްތަކުގެ ކިޔެވުން ކުރިއަށްގެންދާނީ މާލޭގެ އެންމެ ރަނގަޅު އެއް މަދަރުސާ ކަމުގައިވާ ހުރަވީ ސްކޫލުން ކަމަށް މިނިސްޓަރ ވިދާޅުވިއެވެ. އަދި އެންމެ ބޮޑު އުންމީދަކީ ރާއްޖޭގެ އެހެން ސްކޫލްތަކުގެ ދަރިވަރުންނާ ވާދަކުރެވޭ ވަރުގެ ދަރިވަރުންތަކަކަށް މި 3 ރަށުގެ ދަރިވަރުން ހެދުން ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ސްޓެލައިޓް ނިޒާމުގެ ތެރެއިން އޮންލައިންކޮށް ކިޔަވައިދިނުމަށް ބޭނުންވާ ވަސީލަތްތައް މި ސްކޫލްތަކަށް ފޯރުކޮށްދެވިފައިވާ ކަމަށެވެ. މިގޮތުން ރަނގަޅު ސްޕީޑެއްގައި އިންޓަރނެޓް ލިބޭނެ ގޮތް ފަހިކޮށްދެއްވާފައިވާނެ ކަމަށާއި، އަދިވެސް ބޭނުންވާ އެހެނިހެން ވަސީލަތްތައް ގާއިމްކޮށްދެއްވާފައިވާނެ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ސެޓެލައިޓް ސްކޫލްތަކުގެ ދަރިވަރުންނަށް އެހެން ކުދިންނާ ގުޅިގެން ކަންކަން ކުރުމަށްމަގުފަހިވެގެންދާނެ ކަމަށެވެ. އެގޮތުން މި ސްކޫލްތަކުގެ ބެލެނިވެރި ސްކޫލްތައް ކަމުގައިވާ ބ. ގޮއިދޫ ސްކޫލާއި، ވ. ކެޔޮދޫ ސްކޫލާއި، ވ. ފެލިދޫ ސްކޫލުން، މި ސްކޫލްތަކުގެ ދަރިވަރުންނަށް ސްކޫލް މާހައުލުން އިޖްތިމާއީ ގުޅުންތައް ބަދަހިކުރުމާއި، ކުޅިވަރާއި، ހުނަރު ދަސްކޮށްދިނުމުގެ ޕްރޮގްރާމްތަކުގައި ބައިވެރިވުމުގެ ފުރުސަތު ފަހިކޮށްދޭނެ ކަމަށް އެޑިއުކޭޝަން މިނިސްޓަރ ޑރ. އައިޝަތު އަލީ ވިދާޅުވިއެވެ.
މި މަޝްރޫއުގެ ދަށުން އެ ރަށްރަށް ދޫކޮށް ދިޔަ އާއިލާތަކާއި، އިތުރު އާއިލާތައް އެ ރަށްރަށަށް އެނބުރި އަންނާނެ ކަމަށް އުންމީދުކުރައްވާކަމަށް މިނިސްޓަރ ވިދާޅުވިއެވެ.
