ބޮޑު ބެކްލޮގަކާއެކު ހުކުރު ދުވަހު ޕޮޒިޓިވްވި މީހުންގެ އަދަދު ހާހަކާ ގާތަށް

ބޮޑު ބެކްލޮގަކާއެކު ހުކުރު ދުވަހު ކޮވިޑަށް ޕޮޒިޓިވްވި މީހުންގެ އަދަދު ހާހަކާ ގާތަށް އަރައިފިއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އާންމުކޮށްފައިވާ ހުކުރު ދުވަހުގެ ތަފާސް ހިސާބުތައް ދައްކާގޮތުން، ބުރާސްފަތި ދުވަހުގެ އިރުއޮއްސި 6:00ން ހުކުރު ދުވަހުގެ އިރުއޮއްސި 6:00ށް ނެގި ސާމްޕަލްތަކުގެ ތެރެއިން 967 މީހަކު ވަނީ ޕޮޒިޓިވްވެފައެވެ. މިއީ ފާއިތުވި ދުވަސްތަކުގެ ތެރޭގައި އެންމެ ގިނައިން ކޭސްތައް ރިޕޯޓް ކުރެވުނު ދުވަހެވެ.

Advertisement

މި 24 ގަޑިއިރު ތެރޭގައި މާލެ ސަރަހައްދުން 4،227 ސާމްޕަލާއެކު ޖުމްލަ 7،505 ސާމްޕަލް ވަނީ ނަގާފައެވެ. އޭގެތެރެއިން 967 މީހަކު ޕޮޒިޓިވްވިއިރު، މީގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވްވި 475 މީހުންނާއި، ރަށްރަށުން ޕޮޒިޓިވްވި 290 މީހުންނާއި، ރިސޯޓްތަކުގެ ޕޮޒިޓިވްވި 87 މީހުންގެ އިތުރުން ސަފާރީތަކުން ޕޮޒިޓިވްވި ދެ މީހެކެވެ. މި 24 ގަޑިއިރު ތެރޭގައި 113 މީހަކު ޕޮޒިޓިވްވީ ކޮން ތަނަކުން ކަމަށް ދެނެގަނެވިފައެއް ނުވެއެވެ. މިހާތަނަށް 101،418 މީހަކު ވަނީ ރާއްޖެއިން ޕޮޒިޓިވްވެފައެވެ.

ޖުމްލަ 95،056 މީހަކު މިހާރު ވަނީ ބަލިން ރަނގަޅުވެފައެވެ. އެކްޓިކް ކޭސްތަކުގެ އަދަދު 5،881ށް އަރާފައިވާ އިރު، މީގެ ތެރެއިން ހޮސްޕިޓަލްތަކުގައި ފަރުވާދެމުން އަންނަނީ 22 މީހުންނެވެ. 265 މީހަކު ވަނީ ބަލީގައި ނިޔާވެފައެވެ.

މާލެ ސަރަހައްދުގައި ސާމްޕަލް ޕޮޒިޓިވިޓީ ރޭޓް ހުރީ 12 އިންސައްތައިގައެވެ. މިއާއެކު މާލެ ސަރަހައްދުގައި ޚާއްސަ ފިޔަވަޅުތަކެއް އަޅާފައިވާ އިރު، މާލެ ސަރަހައްދުން ރަށްރަށަށް ދަތުރުކުރާ ފަރާތްތަކުން އަމަލުކުރަންޖެހޭ އުސޫލުތަކެއް ވަނީ މިހާރު ކަނޑައަޅާފައެވެ.

މިއަދު ރާއްޖެއިން ޕޮޒިޓިވްވި މީހުންގެ އަދަދު ހާހަކާ ގާތަށް އަރާފައިވާއިރު، ގާތްގަނޑަކަށް 2،000 ސާމްޕަލް ބެކްލޮގްގައި ހުރިކަމަށް މައުލޫމާތުލިބެއެވެ.