އިތުރުވަމުންދާ އަދަދުތަކާއެކު 2000 ސާމްޕަލްގެ ބެކްލޮގެއް

ރާއްޖޭގެ ކޮވިޑްޖެހޭ މީހުންގެ އަދަދު ބޮޑުތަނުން އިތުރުވަމުން އަންނައިރު، ދެހާހަށްވުރެ ގިނަ ސާމްޕަލްގެ ބެކްލޮގްގައި ހުރިކަން ރާއްޖެޓީވީއަށް ކަށަވަރުވެއްޖެއެވެ.

ކޮވިޑްގެ ކޭސްތައް އިތުރުވުމާއެކު ފިޔަވަޅުތައް ހަރުކަށިކުރުމުގެ ސަބަބުން މިހާރު އަތޮޅުތެރޭގެ ރަށްތަކަށް ދަތުރުކުރެވޭނީ ޕީސީއާރު ޓެސްޓު ހަދައިގެންނެވެ. އެހެންކަމުން ޕީސީއާރު ޓެސްޓު ހެދުމަށް ގިނަ ބަޔަކު އަންނަނީ ސާމްޕަލް ނަގާ ސަރަހައްދުތަކުގައި ބޮޑެތި ކިއުތަށް ހަދަމުންނެވެ. ރާއްޖެޓީވީއަށް އެނގިފައިވާ ގޮތުގައި ގިނަ ބަޔަކު ޓެސްޓު ހެދުމަށް ސާމްޕަލް ނަގަމުންދާތީ ނަތީޖާ ނުލިބި 2000ށްވުރެ ގިނަ ސާމްޕަލް މިހާރު އެބަހުއްޓެވެ.

މިކަމާއި ގުޅޭގޮތުން ރާއްޖެޓީވީއަށް މައުލޫމާތުދެމުން އެޗްޕީއޭން ބުނީ ގިނަ އަދަދެއްގެ މީހުން ސާމްޕަލް ނަގަމުންދާތީ ބައިވަރު ސާމްޕަލްތައް ބެކްލޮގުގައި އެބަހުރި ކަމަށެވެ. އަދި އެޗްޕީއޭގެ އަމާޒަކީ 48 ގަޑިއިރާ 72 ގަޑިއިރާ ދޭތެރޭގައި ސާމްޕަލްތަކުގެ ނަތީޖާ ދިނުންކަމުގައިވީ ނަމަވެސް، މިހާރު އެމުއްދަތު ފަހަނައަޅާފައިވާ ސާމްޕަލްތައް އެބަހުރި ކަމަށެވެ. އެހެންކަމުން ބެކްލޮގް ފިލުވުމަށްޓަކައި ކެޕޭސިޓީ އިތުރުކުރުމުގެ މަސައްކަތް ކުރަމުން އަންނަ ކަމަށެވެ.

ސާމްޕަލްތަކުގެ ނަތިޖާ ނުލިބި ލަސްވުމުގެ ސަބަބުން ގިނަ ރައްޔިތުންގެ ޝަކުވާ ވަނީ އެޗްޕީއޭއަށް އަމާޒުވެފައެވެ. ޚާއްސަކޮށް ސްކޫލުތަކުގެ ކިޔެވުން ފެށުމުގެ ކުރިން އަތޮޅުތެރޭގެ ރަށްތަކަށް ދާންބޭނުންވާ ފަރާތްތަކުގެ ނަތީޖާ ލަސްވުމުގެ ސަބަބުން އެފަރާތްތަކަށް ވަނީ ގިނަ ދަތިތަކަށް ކުރިމަތިލާން ޖެހިފައެވެ.

ޓެސްޓުގެ ނަތީޖާ ލިބުމުގައި ލަސްތަކެއް ހުރިއިރު، މިހާބޮޑަށް ނަތީޖާ ލަސްވަނީ ފޭކް ނެގެޓިވް ނަތީޖާ ހަދައިގެން ބައެއް ޓޫރިސްޓުން ބޭރަށް ފުރަން އުޅޭ މައްސަލަަތަކެއް ދިމާވެފައިވާތީ، އެނަތީޖާތައް އައިޖީއެމްއެޗުން އަލުން ޗެކްކުރާތީކަމަށް މައުލޫމާތު ލިބެއެވެ. ނަމަވެސް މިކަމާ ގުޅޭގޮތުން އެޗްޕީއޭން ބުނީ ސާމްޕަލްތައް ރީރަން ކުރަނީ ހަމައެކަނި ޕޮޒިޓިވްވާ ޓޫރިސްޓަކު އަވަހަށް ފުރަން ބޭނުންވާތީ ދެވަނަ ފަހަރަށް ނަތީޖާ ޗެކްކުރުމަށް ބޭނުންވާ ހާލަތްތަކުގައި ކަމަށެވެ. އަދި ސާމްޕަލްތައް ރީރަންކޮށް އަލުން ޓެސްޓު ކުރެވޭނީ ހަމައެކަނި އައިޖީއެމްއެޗުން ކަމަށެވެ.

ކޮވިޑްގެ އަދަދުތައް އިތުރުވެ ދުވާލެއްގެ މައްޗަށް ނަގާ ސާމްޕަލްތަކުގެ އަދަދު ވަނީ އެވްރެޖްކޮށް 5000 އާއި 7000ށް އަރާފައެވެ.