ދުއާ އިޖާބަ ކުރައްވާ ޚާއްސަ ވަގުތެއްވޭ، އެވަގުތުކޮޅުގެ ބޭނުން ހިފަންޖެހޭ: ޚުތުބާ

ހުކުރު ދުވަހު ދުއާ އިޖާބަ ކުރައްވާ ޚާއްސަ ވަގުތެއްވާ ކަމަށާއި އެވަގުތުކޮޅުގެ ބޭނުން ހިފުމަށް ޚުތުބާގައި ގޮވާލައިފިއެވެ.

''ހުކުރުގެ ދަރުމަ ފުރިހަމައަށް ލިބިގަންނާށެވެ'' މިމައުޟޫއަށް ރާއްޖޭގެ އެކި ކަންކޮޅުތަކަށް އިއްވި ހުކުރު ޚުތުބާގައި ބުނީ ދުނިޔަވީ މަސައްކަތުން ދުރުވެ، ހުކުރަށް ދިއުމަށް އަވަސްވެގަންނަ މީހަކީ، ބޮޑުވެގެންވާ ނަޞީބުވެރިއެއް ކަމަށެވެ. ހުކުރު ދުވަހުގައި ދުއާ އިޖާބަކުރައްވާ ޚާއްސަ ވަގުތެއްވާ ކަމަށާއި، އެކި އެކި ބޭނުން ޖެހިފައިވާ މީހުން އެފުރުޞަތުގެ ބޭނުން ހެޔޮގޮތުގައި ހިފައި، ދުއާކުރުން އިތުރު ކުރުމަށްވެސް ޚުތުބާގައި ނަސޭހަތްތެރިވެފައިވެއެވެ.

ޚުތުބާގައި ބުނީ މިއަދަކީ ދުވަސްތަކުގެ ތެރެއިން އެންމެ ހެޔޮ އެއްދުވަސް ކަމަށާއި، މިއަދަކީ، ބަރަކާތުން ފުރިގެންވާ ހުކުރު ދުވަސް ކަމަށެވެ. ހުކުރު ދުވަހަކީ އެދުވަހެއްގައި އިންސާނީ ނަސްލުގެ ފެށުންކަމުގައިވާ މުޅި އިންސާނިއްޔަތުގެ ބައްޕަ، އާދަމްގެފާނު އުފެއްދެވުނު ތާރީޚީ ދުވަސްކަން ހަނދާން އައުކޮށް ޚުތުބާގައި ބުނީ އެކަލޭގެފާނު ސުވަރުގެ ވެއްދެވުނު ދުވަހަކީ ވެސް ހުކުރު ދުވަހެއްގައި ކަމަށެވެ.

ހުކުރު ވަގުތަށް ބެލުމެއް ނެތި، ވިޔަފާރިވެރިން އެމީހުންގެ ވިޔަފާރިން މަންފާ ހޯދުމަށް މަސްއޫލުވެގެން އުޅޭ ކަމަށާއި، މިކުޑަ މުޖުތަމައިން އެމަންޒަރު ފެންނަ ކަމަށް ޚުތުބާގައި ބުނެފަވެއެވެ. އަދި ޚިދުމަތް ހޯދާ މީހުން ވެސް ހުކުރު ވަގުތާއި ނަމާދު ވަގުތުތަކުގައި ޚިދުމަތް ލިބިގަތުމުގައި އުޅޭ ތަން ފެންނަ ކަމަށާއި ޚުތުބާ އަޑުއެއްސެވުމަށް މަލާއިކަތުން ހަމަހިމޭނުން ތިއްބަވާ އިރު، އިންސާނުން އެ ޚުތުބާއަށް ކަނުލައި އެހުން، މާ އައުލާކަން ބޮޑު ނަމަވެސް މިފަހަކަށް އައިސް އިމާމު މީހާ ޚުޠުބާ އިއްވަމުން ދާއިރު މިސްކިތުގެ ފެންޑާގައްޔާއި، މިސްކިތުގެ ގޯތިތެރޭގައްޔާއި، މިސްކިތުން ބޭރުގައި ވެސް ވާހަކަދައްކަން ތިބޭ ކަމަށް ޚުތުބާގައި ބުނެފަވެއެވެ. އަދި އެއީ ވަރަށް ދެރަ މަންޒަރެއް ކަމަށްވެސް ވަނީ ބުނެފައެވެ.

މީގެއިތުރުން ޚުތުބާ އަޑުއެހުމުގެ ބަދަލުގައި، މިސްކިތުން ބޭރުގައި ތިބެ އެއްބަޔަކު އަނެއްބަޔަކާ ވާހަކަ ދެއްކުމާއި، ހީ ސަމާސާ ކުރުމާއި، މޯބައިލް ފޯނުން ގޭމް ކުޅުމާއި މެސެޖް ކުރުމާއި، އިންޓަނެޓްގެ އެކި ސައިޓްތަކަށް ވަނުމާއި، ސިނގިރެޓް ބުއިން ފަދަ ދުނިޔަވީ ކަންތައްތަކުގައި މަސްއޫލުވެގެން ތިބޭ މަންޒަރު ފެންނަ ކަމަށްވެސް ޚުތުބާގައި ބުނެފަވެއެވެ. މިސްކިތުގެ ތެރޭގައި ޖާގަ އޮންނައިރު، ގަސްގަސް ދޮށުގައްޔާއި، ހިޔާ ގަނޑުގައި ތިބެ، އިމާމްމީހާ ޚުތުބާކިޔާ ނިމި، ހުކުރުނަމާދަށް ގަމަތް ދިނުމުން މިސްކިތުގައި ހެދިފައިވާ ސަފަށް ވެސް ނުބަލައި ނަމާދުކުރާ މަންޒަރު ފެންނަ ކަމަށް ބުނެފައިވެއެވެ.

ނަމާދުގައި ގިބްލައަށް ކުރިމަތިލުމަކީ، ނަމާދު ސައްހަވުމުގެ ޝަރުތަކަށްވާއިރު، ތިމާއަށް މިހުރެވެނީ ރަނގަޅަށް ގިބްލައަށް ކުރިމަތިލައިގެންތޯ ޔަގީން ކުރަން ޖެހޭ ކަމަށް ޚުތުބާގައި ބުނެފައިވެއެވެ. އަދި އިމާމަށް ވުރެ ކުރިއަށް ނޭރުމާއި، މިސްކިތުގައި ހެދިފައިވާ ސަފުތަކާ މިސްކިތުން ބޭރުގައި ހެދިފައިވާ ސަފުތައް ސީދާ ކުރުމަކީ ވެސް ސަމާލުވާން ޖެހޭ ކަމަށާއި ހުކުރު ނަމާދުގެ މަގުސަދާ ޚިލާފު ކަންތައްތަކުން ދުރުހެލިވުމަށް ޚުތުބާގައި އިލްތިމާސްކޮށްފައިވެއެވެ.

ހަފްތާގެ ތެރެއިން އެންމެ މާތް ދުވަހަކީ ހުކުރު ދުވަސް ކަމަށްވާއިރު، އެދުވަހުގެ ދަރުމަ ފުރިހަމައަށް ލިބިގަތުމަށް ޚުތުބާގައި ވަނީ ގޮވާލާފައެވެ. އަދި މިއަދު މުޖުތަމައު ފެންނަމުންދާ ނޭދެވޭ އަމަލުތަކުން ދުރުވެ، އަޅުކަމަށް މަސްއޫލުވުމަށް ވަނީ ނަސޭހަތްތެރިވެ ބާރުއަޅާފައެވެ.