ފާޅުގައި ދީނަށް ފުރައްސާރަ ކޮށްގެން ދައުވާ އުފުލި ރުސްތުމްގެ އަޑުއެހުން ބަލިހާލަތު ބަޔާންކޮށް ކޯޓަށް ހާޒިރުވާން އުޒުރުވެރިވުމުން ކެންސަލް

ފާޅުގައި ދީނަށް ފުރައްސާރަ ކުރަމުންދިޔަ ރުސްތުމްގެ މައްޗަށް އުފުލާފައިވާ ދީނީ އެއްބައިވަންތަކަން ނަގާލުމަށް މަސައްކަތް ކުރުމުގެ ކުށުގެ ދައުވާގެ އަޑުއެހުން , ބަލިހާލަތު ބަޔާންކޮށް ކޯޓަށް ހާޒިރުވަން އުޒުރުވެރި ވުމުން ކެންސަލްވެއްޖެއެވެ.

މި މައްސަލައިގެ އަޑުއެހުން ތާވަލުކޮށްފައި އޮތީ ހޯމަ ދުވަހުގެ ހެނދުނު 09:30 އަށެވެ. އެހެންނަމަވެސް، މި އަޑުއެހުން ވަނީ އެ ސަބަބާހެދި ކެންސަލްވެފައެވެ.

ރުސްތުމް އެންމެ ފުރަތަމަ ހައްޔަރުކުރީ 2019 ވަނަ އަހަރުއެވެ. އޭރު ދީނާ ދެކޮޅަށް ކުރާ މަސައްކަތް އޭނާ ފާޅުގައި ފެއްޓީ ކަމަށް ބުނެ ކުރި ޓްވީޓަކާއި ގުޅިގެން އޭނާ ހައްޔަރު ކުރިއެވެ. އެގޮތުން ކުރިއަށް އޮތް ތަނުގައި ދީނާއި ޚިލާފު ބޮޑު ޖަލްސާތައް ވެސް ބާއްވާނެ ކަމަށް އޭނާ އޭރު ބުނެފައިވެއެވެ. އަދި ސޯޝަލްމީޑިޔާގެ ޕްލެޓްފޯމުތަކުގައި ކީރިތި ރަސޫލާއަށާއި، އިސްލާމް ދީނަށް ނިސްބަތްކޮށް ހުތުރު ބަހުން ވާހަކަ ދައްކާފައިވެއެވެ. އެ މައްސަލައިގެ ތަހުގީގު ނިންމައި ކޯޓަށް ހުށައަޅާފައިވަނިކޮށް އޭނާ ވަނީ އޭރު ދޫކޮށްލާފައެވެ.

އޭރު އޭނާ ދޫކޮށްލުމަށްފަހުވެސް ދީނާއި ޚިލާފު އެކި ވާހަކަތައް އޭނާ ދައްކާފައިވެއެވެ. އެގޮތުން އޭނާ އަލުން ހައްޔަރު ކޮށްފައިވަނީ އިސްލާމްދީނަށް ތައުހީން ކުރުމުގެ ނިޔަތުގައި، އިސްލާމްދީނަށް ފާޑުކިޔައި، ދިވެހިރައްޔިތުންގެ ދީނީ އެއްބައިވަންތަކަން ނަގާލުމަށް މަސައްކަތްކޮށް މުޖުތަމައުގައި ސުލްހަމަސަލަސްކަން ނަގާލުމަށް މަސައްކަތް ކުރަމުންދާ ކަމަށް، އޭނާގެ މައްޗަށް ތުހުމަތު ކޮށްފައެވެ. އެއީ 2020 ވަނަ އަހަރުއެވެ.

އިސްލާމްދީނަށް ފާޑުކިޔައި، ދިވެހިރައްޔިތުންގެ ދީނީ އެއްބައިވަންތަކަން ނަގާލުމަށް މަސައްކަތް ކުރުމުގެ ތުހުމަތުގައި އޭނާ ހައްޔަރު ކުރުމުންވެސް އޭރު އޭނާ ވަނީ އެކަމަށް އިއުތިރާފުވެ، ދީނާއި ޚިލާފު ވާހަކަތައް ދައްކާފައެވެ.

ދީނަށް ފުރައްސާރަ ކުރުމާއި، ރާއްޖޭގައި އެހެން ދީންތައް ޕްރޮމޯޓު ކުރުމަށް މަސައްކަތް ކުރާ މައްސަލަތައް އިތުރުވަމުންދާއިރު، އިންޓަރނެޓްގެ ޒަރީއާއިން ރާއްޖޭގައި އެހެން ދީންތައް ފެތުރުމަށް ގެންގުޅޭ އެކި މީޑިއަމްތައް ބްލޮކް ކުރުމަށް، މިދިޔަ ނޮވެމްބަރު މަހުގެ ފަހުކޮޅު ކްރިމިނަލް ކޯޓުން ވަނީ އަމުރެއް ނެރެފައެވެ. މި އަމުުރު ނެރުނުތާ ގިނަ ދުވަސްތަކެއް ވެފައިވާއިރު، އަދިވެސް މިފަދަ މީޑިއަމްތައް ބްލޮކް ކުރުމުގެ މަސައްކަތް ފަށާފައެއް ނުވެއެވެ. އެކަމާއި ގުޅޭ މަޝްވަރާތައް ކުރަމުންދާކަމަށް ކަމާބެހޭ ފަރާތްތަކުން ބުނެއެވެ.

މުއާޞަލާތީ ވަސީލަތެއް ބޭނުންކޮށްގެން ނުވަތަ އެނޫންވެސް ގޮތަކަށް ޢާންމު ތަނެއްގައި، އިސްލާމްދީނަށް ތައުހީނު ކުރުމުގެ ނިޔަތުގައި ބަހުން ނުވަތަ ޢަމަލުން، މާތް ﷲއަށް ނުވަތަ ކީރިތި ޤުރުއާނަށް ނުވަތަ ކީރިތި ރަސޫލާއަށް ނުވަތަ ކީރިތި ރަސޫލާގެ ސުންނަތަށް ނުވަތަ އިސްލާމްދީނަށް ފުރައްސާރަ ކުރުން އެއީ ކުށެއް ކަމުގައި ކަނޑައަޅައި ޤާނޫނުލްޢުޤޫބާތަށް ގެނައި އިސްލާޙު ދާދި ފަހުން ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިޙު ވަނީ ތަސްދީޤު ކުރައްވާފައެވެ. އެގޮތުން މުއާޞަލާތީ ވަސީލަތެއް ބޭނުންކޮށްގެން ނުވަތަ އެނޫންވެސް ގޮތަކަށް، އިސްލާމްދީނަށް ތައުހީނުކުރުމުގެ ނިޔަތުގައި ބަހުން ނުވަތަ ޢަމަލުން، މާތް ﷲ އާމެދު ނުވަތަ ކީރިތި ޤުރުއާނާމެދު ނުވަތަ ކީރިތި ރަސޫލާއާމެދު ނުވަތަ ކީރިތި ރަސޫލާގެ ސުންނަތާމެދު ނުވަތަ އިސްލާމްދީނާމެދު ދޮގު މަޢުލޫމާތު ފެތުރުން ނުވަތަ އެފަދަ ޢަމަލެއް ކުރުމުގައި ބައިވެރިވުންވެސް ވަނީ ކުށެއްގެ ގޮތުގައި ކަނޑައަޅާފައެވެ.

އޭގެ އިތުރުން، އިސްލާމް ދީނަށް ހަޖޫޖަހައި ފުރައްސާރަކުރުމަކީ 2015 ވަނަ އަހަރުން ފެށިގެން ގާނޫނުލްއުގޫބާތުގައި ޖިނާއީ ކުށެއްކަމަށް ވަނީ ކަނޑައަޅާފައެވެ.