ވާސިލް ނުވެވޭ މަގާމުތަކަށް ރިވެތި އަޚުލާގުން ވާސިލްވެވޭނެ: ޚުތުބާ
އަޚުލާގަކީ އިސްލާމް ދީން އެކަމަށް އިސްކަން ދީފައިވާ އަސާސުތަކުގެ ތެރެއިން މަތިވެރި އަސާސެއް
ހުކުރު ނަމާދު ކުރުމަށް އިސްލާމީ މަރުކަޒުގައި ޖަމާއަތް ހަދައިގެން
ވާސިލް ނުވެވޭ މަގާމުތަކަށް ރިވެތި އަޚުލާގުން ވާސިލްވެވޭނެ ކަމަށް ހުކުރު ޚުތުބާގައި ބުނެފިއެވެ.
ތިމާގެ އަޚާ ފަޟީހަތް ކުރުމުން ދުރުހެލިވުން މި މައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ އަޚުލާގަކީ އިސްލާމް ދީން އެކަމަށް އިސްކަން ދީފައިވާ އަސާސުތަކުގެ ތެރެއިން މަތިވެރި އަސާސެއް ކަމަށެވެ. އަދި ރިވެތި އަޚުލާގުގެ ސިޑިން އިންސާނާއަށް ވާސިލުވެވޭ މަންޒިލު ވަރަށް އުސްވާނެ ކަމަށާއި، އިންސާނަކު ކުރާ އަމަލުތަކުން އޭނާއަށް ވާސިލު ނުވެވޭ ފަދަ މަގާމުތަކަށް، އޭނާގެ ރިވެތި އަޚުލާގުގެ ސަބަބުން ވާސިލު ވެވޭނެ ކަމަށް ޚުތުބާގައި ބުނެފައިވެއެވެ.
އެހެންކަމުން ރިވެތި އަޚުލާގުގެ މަތީގައި ދެމިތިބުމަށް ޚުތުބާގައި ގޮވާލާފައިވެއެވެ.
ޚުތުބާގައި ބުނީ ރިވެތި ސިފަތަކާއި، މާތް އަޚުލާގުގެ ތެރޭގައި އެހެން މީހުންގެ ޢައިބުތަކާއި، އުނި ސިފަތައް ފޮރުވައި ވަންހަނާ ކުރުން ހިމެނޭ ކަމަށާއި، ކުރެވޭ ކުށްފާފަތަކާއި، ހަޑި ހުތުރު އަމަލުތައް ވަންހަނާކުރުމަކީ، ގިޔާމަތް ދުވަހުން މާތް ﷲގެ ފުއްސެވުމާއި، މަޣްފިރަތު ލިބޭނެ ކަމެއް ކަމަށެވެ. ކީރިތި ރަސޫލާ އަމުރު ކުރައްވާފައިވަނީ އޮޅުމަކުން ކުރެވޭ ހަޑި އަމަލުތައް ވެސް ވަންހަނާ ކުރުމަށް ކަމަށެވެ.
ޚުތުބާގައި ބުނީ މާތް ﷲ ގެ އަޅުތަކުން ފަޟީހަތްނުކޮށް، އެމީހުންގެ ނުބައި އަމަލުތައް ވަންހަނާ ކޮށްދޭ މީހަކީ، ﷲ ދެކެ ބިރުގަންނަ، އާޚިރަތް ދުވަހުގެ ރައްކައުތެރިކަމަށް އެދޭ މީހެއް ކަމަށާއި، މީސްމީޑިއާގެ ވަސީލަތްތައް ބޭނުންކޮށްގެން، ޚަބަރުތަކާއި، ފޮޓޯތަކާއި، ވީޑިއޯތައް ފަތުރަން ފަސޭހަ މިފަދަ ޒަމާނެއްގައި، މުސްލިމުން މިކަމަށް ވަރަށް ބޮޑަށް ސަމާލުކަން ދޭންޖެހޭ ކަމަށެވެ. އަތުގައި އޮންނަ މޯބައިލް ފޯނުގެ ޒަރިއްޔާއިން، މީހުންނަށް ނޭނގޭ ގޮތަށް، ތަންތަނާއި، މަންޒަރުތަކާއި އަޑުތައް ރެކޯޑްކޮށް، ފިތައިލާ ފިތަކުން އެ ސިއްރުތައް އާއްމުކޮށްލާއިރު، އެފަދަކަންކަން ކުރާ ކޮންމެ މީހަކުވެސް، ދީނުގައި އައިސްފައިވާ ވަޢީދުތަކާ މެދު ވިސްނައިލާން ޖެހޭ ކަމަށް ޚުތުބާގައި ބުނެފައިވެއެވެ.
ފޮރުވައި ވަންހަނާ ކުރުމުގެ މާނައަކީ، މުންކަރާތްތަކާ ދެކޮޅުހެދުން ދޫކޮށްލުމެއް ނޫންކަން ފާހަގަކޮށް ޚުތުބާގައި ބުނީ މީހަކު މުންކަރާތަކަށް އަރައިގަންނަ ނަމަ، އޭނާއަށް ނަސޭހަތް ދިނުން ވާޖިބުވާނެ ކަމަށެވެ. އަދި މީހުންގެ ސިއްރުތައް ހާމަކުރުންފަދަ ނުބައި އަމަލުތަކުން ދުރުވުމަށް ޚުތުބާގައި ނަސޭހަތްތެރި ވެފައިވެއެވެ.
