ހޮޅުދޫގެ ބޯހިޔާވަހިކަމުގެ މައްސަލައަށް ހައްލު އަންނާނީ ހޮޅުމީދޫ ތަރައްގީ ކުރެވިގެން - ރައީސް

ރައީސުލްޖުމްހޫރިއްޔާ ނ އަތޮޅުގެ ފަސް ރަށަކަށް ކުރައްވާ ދަތުރުފުޅުގެ ތެރެއިން ފަހު މަންޒިލެއްގެ ގޮތުގައި ނ.ހޮޅުދޫއަށް ވަޑައިގެން އެރަށުގެ ކައުންސިލާއި ރައްޔިތުންނާ ބައްދަލުކުރައްވައިފިއެވެ.

ހޮޅުދޫއަށް ރައީސް ވަޑައިގެންނެވީ, ބުދަދުވަހުގެ މެންދުރުގެ ވަގުތެއްގައެވެ. އެމަނިކުފާނު ހޮޅުދޫއަށް ވަޑައިގެންނެވުމުން އެރަށުގެ ކައުންސިލާ. ރައްޔިތުންގެ ފަރާތުން ހޫނު މަރުހަބާއެއް ދެންނެވިއެވެ. އަދި ހޮޅުދޫ ރައްޔިތުންގެ ފަރާތުން ޚާއްސަ ހަނދާނީ ހަދިޔާއެއްވެސް އަރުވާފައިވެއެވެ.

ރައީސް ވަނީ ކައުންސިލާ ބައްދަލު ކުރައްވައި ރަށުގެ ތަރައްގީގެ މަޝްރޫއުތަކާ ބެހޭ ގޮތުން މަޝްވަރާ ކުރައްވާފައެވެ. އަދި ރަށުން ލިބެން ހުންނަ ޚިދުމަތްތައް އިތުރަށް ފުޅާ ކުރުމާ ބެހޭ ގޮތުން މަޝްވަރާ ކުރެވުނެވެ. ރައީސް ވަނީ ހޮޅުދޫގެ ސިއްހީ މަރުކަޒަށް ޒިޔާރަތް ކުރައްވައި އެތަނުގެ ޚިދުމަތްތައް ބައްލަވާލައްވާފައެވެ. އަދި ޚިދުމަތްތައް އިތުރަށް ފުޅާކުރުމާ ބެހޭ ގޮތުންވެސް މަޝްވަރާ ކުރެއްވިއެވެ.

ރައްޔިތުންނާ ބައްދަލު ކުރެއްވައި ރައީސް ވިދާޅުވީ, ހޮޅުދޫގެ ބޯހިޔާވަހިކަމުގެ މައްސަލައަކީ ހައްލު ނުލިބި އޮތް މައްސަލައެއް ކަމަށާއި, ބޯހިޔާވަހިކަން ހައްލު ކުރުމަށް ހޮޅުމީދޫގެ ލޭންޑް ޔޫސް ޕްލޭން ހެދުމުގެ މަަސައްކަތް ޕްލޭނިން މިނިސްޓްރީއާއެކު ކުރިއަށް ގެންދަވާނެ ކަމަށެވެ. އަދި އެރަށަށް ބޭނުންވާ އަސާސީ ޚިދުމަތްތައް ފޯރުކޮށްދިނުމުގެ މަސައްކަތްވެސް ލަސްތަކެއް ނުވެ ކުރިއަށް ގެންދަވާނެ ކަމަށް ވިދާޅުވިއެވެ. ބޯހިޔާވަހިކަމުގެ މައްސަލައަށް ހައްލު އަންނާނީ ހޮޅުމީދޫ ތަރައްގީ ކުރެވިގެން ކަމަށް ރައީސް ވިދާޅުވިއެވެ.

ފެބްރުއަރީ މަހު ޑޮކްޓަރަކާއި އިތުރު ނަރުހުން ސިއްހީ މަރުކަޒަށް ހޯދުމުގެ މަސައްކަތް ހެލްތް މިނިސްޓްރީން ކުރިއަށްގެންދަވާނެ ކަމުގައި ރައީސް ވިދާޅުވިއެވެ. ރަށުގެ ފެން ބޮޑުވުމުގެ މައްސަލައަށް މިހާރު ކޮންމެވެސް ވަރެއްގެ ހައްލު ލިބިފައިވާނެ ކަމަށް ވިދާޅުވިއެވެ. އުދައެރުމުގެ މައްސަލަ ހައްލު ކުރުމަށްވެސް އިތުރު މަސައްކަތްތަކެއް ކުރިއަށްދާނެ ކަމަށް ވިދާޅުވިއެވެ. ފެނުގެ ނިޒާމް ގާއިމް ކުރުމަށް ކޮންޓްރެކްޓް ކުރެވުނީ 2019ވަނަ އަހަރު ކަމަށާއި, އެކަން އަވަސް ކުރުމަށް ޕްލޭނިން މިނިސްޓްރީން މަސައްކަތް ކުރާނެ ކަމަށް ރައީސް ވިދާޅުވިއެވެ.

މޭނާ ސްކޫލް ބޮޑުކުރުމާއި, ސްކޫލް އެއްދަންފަޅިއަށް ބަދަލު ކުރުމުގެ މަސައްކަތް މިއަހަރު ކުރިއަށްދާނެ ކަމަށް ވިދާޅުވިއެވެ. އަދި 3 ބުރީގެ އިމާރާތް އެޅުމަށް މިއަހަރަށް ބަޖެޓް ކުރެވިފައިވާކަން ރައީސް ފާހަގަކުރެއްވިއެވެ.

ހޮޅުދޫ ހުޅަނގު ފަރާތް ހިއްކައި ގޯތި ދިނުމަށް ރައްޔިތުން ހުށަހެޅި ޚިޔާލަށް ޖަވާބު ދެއްވަމުން ޕްލޭނިން މިނިސްޓަރ މުހައްމަދު އަސްލަމް ވިދާޅުވީ, ހޮޅުދޫގެ މުސްތަގްބަލް އޮތީ ހޮޅުމީދޫގައި ކަމަށެވެ. ފެނާއި ކަރަންޓާއި ނަރުދަމާގެ މަސައްކަތް ސަރުކާރުން ކުރާނެ ކަމަށާއި, އެރަށް އާބާދުކުރާއިރު އެކަން ވެގެންދާނެ ކަމަށް އަސްލަމް ވިދާޅުވިއެވެ. މުސްތަގްބަލުގައި ދެރަށް ގުޅިގެންދިޔުމަކީވެސް އެކަށީގެންވާ ކަމެއް ކަމަށް އަސްލަމް ވިދާޅުވިއެވެ. ހޮޅުމީދޫއަކީ ހޮޅުދޫގެ ހުޅަނގު ފަރާތުގައި ވަކިން އޮންނަ ފަޅުރަށެއް ކަމަށްވާ މީދޫއާއި ހޮޅުދޫ ގުޅުވައިގެން ކިޔާ ނަމެކެވެ.

ރައީސުލްޖުމްހޫރިއްޔާ ނ އަތޮޅަށް ކުރައްވާ ދަތުރުފުޅުގައި މާފަރު, ލަންދޫ, މަނަދޫ, މަގޫދޫ އަދި ހޮޅުދޫގެ ކައުންސިލާއި ރައްޔިތުންނާ ބައްދަލު ކުރެއްވިއެވެ.