މަނަދޫގެ ސްޕޯރޓްސް ކޮމްޕްލެކްސް މިއަހަރު ފެށިގެންދާނެ - ރައީސް

ނ. މަނަދޫ ސްޕޯރޓްސް ކޮމްޕްލެކްސް ގާއިމުކުރުުމުގެ މަސައްކަތް މި އަހަރު ފެށިގެންދާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.

ރައީސް ނ އަތޮޅަށް ކުރައްވާ ދަތުރުފުޅުގެ ތެރެއިން މަނަދޫގެ ރައްޔިތުންނާ ބައްދަލު ކުރައްވައި، ރައްޔިތުންގެ ހުރި ކަންބޮޑުވުންތައް އަޑުއައްސަވައި އެކަންކަން ހައްލު ކޮށްދެއްވާނެ ކަމުގެ ޔަގީންކަން ރައީސްވަނީ ރައްޔިތުންނަށް އަރުވާފައެެވެ.

މަނަދޫގައި މިހާރު ފަށާފައިވާ މަސައްކަތްތައް އެކި ސަބަބު ތަކާހުރެ ހުއްޓިފައިވީ ނަމަވެސް އެކަންކަން ހައްލުކޮށް މަސައްކަތް އަލުން ފެށޭނެ ގޮތެއް ސަރުކާރުން ހަމަޖައްސަވައި ދެއްވާނެ ކަމަށް ރައީސް ވިދާޅުވިއެވެ.

ރައީސް ވިދާޅުވީ މި ދަތުރުފުޅަކީ ރައްޔިތުންގެ ކަންބޮޑުވުންތައް އަޑުއައްސަވައި، ބޭނުންވާ ކަންކަން ދެނެގަތުމަށް ކުރައްވާ ދަތުރުފުޅެއް ކަމަށެވެ. ވޭތުވެދިޔަ 3 އަހަރު އެކި ދާއިރާތަކަށް ވެވަޑައިގެންނެވި ވައުދު ފުއްދުމަށްޓަކައި މަސައްކަތްތައް ކުރެވުނުއިރު، ފާއިތުވި ދެ އަހަރު ރާއްޖޭގެ އިގުތިސާދު 33 އިންސައްތަ ދަށަށް ދިޔަކަމަށެެވެ. އެކަމުން އަރައިގަންނަން ކުރާ މަސައްކަތް މިހާރު ރަނގަޅު މިސްރާބަކަށްދާ ކަމަށެެވެ. މިކަން ކާމިޔާބުކުރުމަށް އައު ވޭރިއަންޓް ފެތުރުނަ ނުދިނުމަށް ރައްޔިތުންގެ އެއްބާރުލުން ބޭނުންވާ ކަމަށާއި، އެކަން ކާމިޔާބު ވެއްޖެނަމަ އިގުތިސާދު ބާރު މިނުގައި ކުރިއަށްދާނެކަމަށް ރައީސް ވިދާޅުވިއެވެ.

މަނަދޫގައި އެޅުމަށް މިހާރު އެވޯޑް ކޮށްފައިވާ ސިޓީ ހޮޓެލްގެ އިކުއިޒިޝަން ކޮސްޓްގެ ގޮތުގައި ލިބޭ ފައިސާ ކައުންސިލްގެ ބަޖެޓަށް ވަންނާނެ ގޮތެއް ހައްދަވައި ދެއްވުމަށް ރައްޔިތުން އެދުމުން ރައީސް ވިދާޅުވީ، އެކަމުގައި ގާނޫނީ ހުރަހެއް އޮތްތޯ ބައްލަވައި، އެކަން ކުރެވޭނެ ގޮތެއް އޮތްތޯ އެމަނިކުފާނު ބައްލަވާނެ ކަމަށެވެ.

ރަށުގެ ބަނދަރާ ގުޅޭގޮތުން ރައްޔިތުންގެ ހުރި ކަންބޮޑުވުންތަކަށް ހައްލު ހޯއްދަވައި ދެއްވާނެ ކަމަށް ރައީސް ވިދާޅުވިއެވެ.

ރައީސް ވިދާޅުވީ މަނަދޫގެ މަގުތައް ރަނގަޅު ފެންވަރަކަށް ހެދުމުގެ މަސައްކަތް 2023ގައި ނިމޭނެ ކަމަށެވެ. އަދި މިހާރު ކުރިއަށްދަނީ ސަރވޭގެ މަސައްކަތް ކަމަށާއި އެއަށްފަހު ބިޑް ހަވާލު ކުރެވޭނެ ކަމަށެވެ. ރައީސް ވިދާޅުވީ މަނަދޫގެ ފެނުގެ ނިޒާމް ގާއިމުވެ މިހާރު އޮތް ނަރުދަމާ ނިޒާމުގައި ހުރި މައްސަލަތައް ހައްލު ކުރުމަށް ފެނަކައަށް ބޭނުންވާ ބަޖެޓް ސަރުކާރުން ހަމަޖައްސަވައި ދެއްވާނެ ކަމަށެވެ.

ހަމަމިއާއެކު މަނަދޫގައި ލޯކަލް މާރުކޭޓެއް އެޅިގެންދާނެކަމަށްވެސް ރައީސް ވިދާޅުވިއެވެ.

ރައީސް ނ އަތޮޅަށް ކުރައްވާ ދަތުރުފުޅުގައި 5 ރަށަކަށް ވަޑައިގަންނަވަން ވަނީ ހަމަޖެހިފައެވެ.