އަމިއްލަ ގޭގޭގައި ސޯލާރ ޖެހުމުގެ ފުރުސަތު ފެނަކައިން ހުޅުވާލަނީ
4 ޖެނުއަރީ 2022 | އަންގާރަ 18:11އަމިއްލަ ގޭގައި ސޯލާރ ހަރުކުރުމުން ކަރަންޓް ބިލް ކުޑަކުރެވޭނެ
މި މަހު ހަވަނަ ދުވަހު މުޅި ރާއްޖެއަށް ފުރުސަތު ހުޅުވާލާނެ
އަމިއްލަ ގޭގޭގައި ސޯލާރ ޕެނަލް ޖެހުމުގެ ފުރުސަތު މި މަހުގެ 6 ވަނަ ދުވަހު މުޅި ރާއްޖެއަށް ހުޅުވާލާނެ ކަން ފެނަކަ ކޯޕަރޭޝަނުން ހާމަކޮށްފިއެވެ.
މިކަން ހާމަ ކުރީ ނ. މަނަދޫގެ ރައްޔިތުންނާއެކު ރައީސުލްޖުމްހޫރިއްޔާ ކުރިއަށް ގެންދެވި ބައްދަލުވުމުގެ ތެރެއިން، ފެނަކަ ކޯޕަރޭޝަންގެ މެނޭޖިންގ ޑިރެކްޓަރ އަހުމަދު ސައީދުއެެވެ. ސައީދު ވިދާޅުވީ ރައްޔިތުންނަށް އަމިއްލަ ގޭގައި ސޯލާރ ހަރުކޮށް ކަރަންޓް ބިލް ކުޑަކުރުމަށް މި ހުޅުވާލެވޭ ފުރުސަތުގައި ރައްޔިތުންނަށް ފައިދާ ވާނެ ކަމަށެވެ.
ރާއްޖޭގައި ބޭނުން ކުރާ ހަކަތަ އިއާދަ ކުރަނިވި ހަކަތައަށް ބަދަލު ކުރުމަށް ސަރުކާރުން ގެންދަނީ މުހިއްމު މަސައްކަތްތަކެއް ކުރަމުންނެވެ.
ފާއިތުވި 3 އަހަރުތެރޭ ސަރުކާރުންނާއި، އަމިއްލަ ފަރާތްތަކާއި، ކަރަންޓު އުފައްދާ އެހެނިހެން ކުންފުނިތަކާއި، ރިސޯޓުތަކުން ކުރި މަސައްކަތުން އިއާދަކުރަނިވި ހަކަތަ ބޭނުންކޮށްގެން އުފައްދަމުންދިޔަ 16.8 މެގަވޮޓުގެ ކަރަންޓު 36.5 މެގަވޮޓަށް ވަނީ އިތުރުކުރެވިފައެވެ.
