ޢުމްރާއަށް ދިއުންފަދަ ހެޔޮކަންކަން ކުރުމަށްފަހު އެކަން އާއްމުކުރުމަކީ ކަންދެއްކުން، އެފަދަ ކަންކަމުން ދުރުވޭ: ޚުތުބާ
31 ޑިސެމްބަރު 2021 | ހުކުރު 08:20ޝަރުއީ މަސްލަޙަތެއް ނެތްނަމަ، އަމަލުތައްފާޅު ކުރުމާ ދުރުހެލިވާން ޖެހޭ
ހުކުރު ނަމާދު ކުރުމަށް އިސްލާމީ މަރުކަޒުގައި ޖަމާއަތް ހަދައިގެން،
އުމްރާއަށް ދިއުންފަދަ ހެޔޮކަންކަން ކުރުމަށްފަހު ސޯޝަލް މީޑިއާގައި އެކަން އާއްމުކުރުމަކީ ކަންދެއްކުން ކަމަށާއި، އެފަދަ ކަންކަމުން ދުރުވުމަށް ހުކުރު ޚުތުބާގައި ގޮވާލައިފިއެވެ.
"ހެޔޮ އަމަލުކުރުމުގައި އިހްލާސްތެރިވުން" މި މައުޟޫއަށް ރާއްޖޭގެ އެކިކަންކޮޅުތަކަށް އިއްވި ހުކުރު ޚުތުބާގައި ބުނީ ކަންދެއްކުމަކީ، ޝައިޠާނާގެ ދޮރޯއްޓެއް ކަމަށާއި، އެއީ ޞާލިޙު އަމަލުތައް ޚަރާބު ކުރާ ވައިރަހެއް ކަމަށެވެ. މި ވައިރަސް މަރައިލުމަށް ބޭނުންކުރަންޖެހޭ ވެކްސިނަކީ، އިޚްލާސްތެރިކަން ކަމަށެވެ. އެހެންކަމުން ހެޔޮ އަމަލުތައް ފޮރުވައި، ވަންހަނާ ކުރުމަށް ގަދައަޅައި މަސައްކަތްކުރުމަށް ޚުތުބާގައި ވަނީ ގޮވާލާފައެވެ.
ޚުތުބާގައި ބުނީ ޝަރުޢީ މަސްލަހަތެއް ނެތްނަމަ، އަމަލުތައްފާޅު ކުރުމާ ދުރުހެލިވާން ޖެހޭ ކަމަށެވެ.
މިޒަމާނަށް އިޝާރާތްކޮށް ޚުތުބާގައި ބުނީ ބައެއް މުސްލިމުން ޞަދަގާތެއް، ނުވަތަ ޢުމްރާއެއް، ނުވަތަ ރޯދައެއް ހިފުން ފަދަ ހެޔޮ އަމަލެއް ކުރުމަށްފަހު، އެ ވާހަކަ މީސްމީޑިޔާގައި ފަތުރަމުންދާ ކަމަށެވެ. މިއީ އެއްވެސް ޝައްކެއް ނެތް ގޮތުގައި، ކަންދެއްކުމުގެ ގިއުގަނޑުގެ ތެރެއަށް ފެތޭ، އެކަމާ ދުރުހެލިވާން ޖެހޭ ކަމެއް ކަމަށް ޚުތުބާގައި ބުނެފައިވެއެވެ. ޚުތުބާގައި ބުނީ ކަންދެއްކުމުގެ ނުބައިކަމާމެދު ވިސްނަން ޖެހޭ ކަމަށާއި، އެއީ މުނާފިގުންގެ ސިފައެއް ކަމަށެވެ. އަދި އިޚްލާސްތެރިކަމެއް ނެތި، ދެއްކުމަށް ކުރެވޭނަމާދަކީ، ސަވާބުގެ ބަދަލުގައި، އެއިން އަޒާބު ލިބޭނެ އަމަލެއް ކަމަށެވެ.
މީގެ އިތުރުން ޚުތުބާގައި ބުނީ އަމިއްލަ އެދުންތައް ބޮޑުވެ، މަދަޙަ ތާރީފުކުރުމަށް ލޯބި ކުރެވުނު ވަރަކަށް، އިޚްލާސްތެރިކަމުގެ ބައްތި ކަނިވަމުންދާ ކަމަށާއި، ފަޚްރުވެރިވުމަށާއި މަޝްހޫރުވުމަށް ލޯބިކުރެވުނު ވަރަކަށް، އިޚްލާސްތެރިކަން ފަނޑުވަމުން ދާނެ ކަމަށެވެ. އަދި މާތް ﷲ ޤަބޫލު ކުރައްވާނީ އެއްވެސް ކިލަނބުކަމެއް ނެތް، ސާފު ޞާލިޙު އަމަލުތައް ކަމަށް ޚުތުބާގައި ބުނެފައިވެއެވެ.
އަޅުގަނޑުމެންގެ ރަނގަޅު ޢަމަލުތައް، ނުބައި ޢަމަލުތަކަށް ބަދަލުކޮށްލާ އެންމެ ވަރުގަދަ ބާރަކީ ކަންދެއްކުންކަން ފާހަގަކޮށް ޚުތުބާގައި ބުނީ ހެޔޮ އަމަލުތަކުގެ ސަވާބު ނެތިކޮށްލާ ކަންތައްތަކުގެ ތެރޭގައި ކުޑަ ޝިރްކުވާ ކަމަށާއި، ކުޑަ ޝިރްކަކީ، ވަރަށް ވަންހަނާކަން ބޮޑު ކަމެއް ކަމަށެވެ. އަދި ކަޅު އަނދިރި ރޭރޭގައި، ކަޅު ހިލަމަތީގައި، ކަޅު ހިނި ހިރޭ ހިރުމަށްވުރެ ވެސް، މި ކަމުގެ ވަންހަނާކަން ބޮޑުވެގެންވާ ކަމަށް ޚުތުބާގައި ބުނެފައިވެއެވެ. އެހެންކަމުން މިފަދަ އެންމެހައި ކަންކަމުން ދުރުވުމަށް ޚުތުބާގައި ވަނީ ގޮވާލާފައެވެ.
