ގައުމީ ހޭންޑްބޯޅަ ޓީމަށް ސާބިއާގެ ކޯޗެއް ގެންނަނީ

އަންނަ އަހަރު ރާއްޖެއިން ވާދަކުރާ ބައިނަލް އަގުވާމީ މުބާރާތްތަކަށް ގައުމީ ހޭންޑްބޯޅަ ޓީމު ތައްޔާރުކުރުމަށްޓަކައި ސަރބިޔާގެ މަތީފެންވަރުގެ ހޭންޑްބޯޅަ ކޯޗެއް ގެނައުމަށް މަސައްކަތް ކުރަމުންދާ ކަމަށް ހޭންޑްބޯޅަ އެސޯސިއޭޝަނުން ބުނެފިއެވެ.

އެސޯސިއޭޝަންގެ ނާއިބް ރައީސް އަޙްމަދު މުޖްތަބާ (މުޖޭ) ވިދާޅުވީ ގައުމީ ޓީމަށް ކޯޗަކު ހޯދުމަށް އެކި ގައުމުތަކުގެ ކޯޗުންނާ މަޝްވަރާ ކުރެވުނު ކަމަށާއި، އޭގެ ތެރެއިން ސަރބިޔާގެ ކޯޗެއް ފައިނަލް ކުރެވި އޭނާއާއެކު މިހާރު އެއްބަސްވުމަކަށް އައުމަށް ވާހަކަ ދައްކަމުންދާ ކަމަށެވެ.

ސަރބިޔާއަކީ ހޭންްޑްބޯޅައިގެ ވޯލްޑްކަޕް ފެންވަރުގެ ގައުމަކަށްވާއިރު ރާއްޖެ ގެންނަ ކޯޗަކީ ގިނަ ގައުމުތަކަށް ކޯޗުކޮށްދީ ތަޖްރިބާ ލިބިފައިވާ ކޯޗެއް ކަމަށާއި މި އަންނަ މަހުގެ ކުރީކޮޅު ކޯޗު މާލެ ގެނެވޭވަރު ވޭތޯ މަސައްކަތް ކުރަމުން އަންނަ ކަމަށް މުޖޭ ވިދާޅުވިއެވެ.

ގައުމީ ޓީމުގެ ބިދޭސީ ކޯޗާއެކު އެސިސްޓެންޓްގެ ގޮތުގައި މަސައްކަތް ކުރުމަށް ދިވެހި ކޯޗުންްނަށް ފުރުސަތު ދިނުމަށް ނިންމާފައިވާ ކަމަށް ހޭންޑްބޯޅަ އެސޯސިއޭޝނުން ބުނެއެވެ.

ހޭންޑް ބޯޅަ އެސޯސިއޭޝަނުން ތައްޔާރު ވަމުންދަނީ އަންނަ އަހަރުގެ ތެރޭގައި ބަންގްްލަދޭޝްގައި ބާއްވާ އިންޓަނޭޝަން ހޭންޑްބޯޅަ ޓްރޮފީއަށް ޓީމެއް ތައްޔާރު ކުރުމަށެވެ. އެގޮތުން މިހާރު އޮތް ގައުމީ ޓީމަށް އިތުރު ކުޅުންްތެރިން ހޯދުމަށް 17 އަހަރުން ދަށުގެ އުމުރުފުރައާއި 19 އަހަރުން ދަށުގެ އުމުރު ފުރައަށް، ގައުމީ ޓީމަށް އަރަން ބޭނުންވާ ކުޅުންތެރިންނަށް މުޅިރާއްޖެ ހިމެނޭގޮތަށް ފުރުސަތު ހުޅުވާލާނެ ކަމަށް ހޭންޑްބޯޅަ އެސޯސިއޭޝަނުން ބުނެއެެވެ.

ހޭންޑްބޯޅަ މުޅިރާއްޖެއަށް ފުޅާކުރުމަށްޓަކައި ބަންގްލަދޭޝްގެ ކޯޗެއްގެ އެހީގައި ހޭންޑްބޯޅަ އެސޯސިއޭޝަނުން ވަނީ ބޮޑު ކުރިއެރުމެއް ހޯދާފައެވެ. އެގޮތުން ހޭންޑްބޯޅަ ކުޅޭނެ ކުޅުންތެރިންނާއި އޮފިޝަލުން ބަންގްލަދޭޝް ކޯޗުގެ އެހީގައި ވަނީ ތަމްރީންކޮށްފައެވެ.

ޒުވާން ކުޅިވަރެއްގެ ގޮތުގައި އޮތް ހޭންޑްބޯޅަ ފާހަގަ ކުރެވެނީ ފަހަކަށް އައިސް އެއްމެ ގިނަ ހަރަކާތްތައް ހިންގާ އެއް ކުޅިވަރުގެ ގޮތުގައެވެ. ކޮންމެ އަހަރަކު ވެސް މާލެއާއި ރާއްޖެތެރޭގައި ވެސް ހޭންޑްބޯޅައިގެ ހަރަކާތްތައް އެސޯސިއޭޝަނުން ދަނީ ހިންގަމުންނެވެ.