ގޭންގުތަކެއްގެ ގޮތުގައި ކުލަބުތައް ސިފަކުރުން ބަލައެއް ނުގަނެވޭ: ބައްސާމް
ކުލަބުތަކަށް އަމާޒުކޮށް ކިޔާ ބިނާކުރަނިވި ފާޑުކިޔުން ބަލައިގަންނާނެ
އެފްއޭއެމުގެ ރައީސް ބައްސާމް އަދީލް ޖަލީލް
ފުޓުބޯޅަ ކުލަބުތަކަކީ ގޭންގުތަކެއް ގޮތަށް ސިފަވާ ގޮތަށް ވާހަކަ ދެއްކުން ބަލައެއް ނުގަނެވޭ ކަމަށް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.
ފުޓުބޯޅަ ކުލަބުތަކުން "މިހާރު" ނޫސް ބޮއެކޮޓް ކޮށްފައިވަނިކޮށް ބައްސާމް ސޯޝަލް މީޑިއާގައި ވިދާޅުވީ ކުލަބުތަކަކީ ދިވެހި ފުޓުބޯޅައިގެ މައިބަދަ ކަމުގައެވެ. އަދި ކުލަބުތަކަށް ދިމާވާ އެކިކަހަލަ ގޮންޖެހުންތަކާއެކު ވެސް ކުރަމުންގެންދާ މަސައްކަތް ފާހަގަކުރައްވާ ކަމަށް ބައްސާމް ވިދާޅުވިއެވެ.
ބައްސާމް ވިދާޅުވީ ކުލަބުތަކަށް އަމާޒުކޮށް ބިނާ ކުރަނިވި ފާޑުކިޔުން ކިޔާނަމަ އެކަން ބަލައިގަންނާނެ ކަމަށެވެ. އެކަމަކު ނޫސްވެރިންގެ ބައްދަލުވުންތަކުގައި ކުލަބުތަކަކީ ގޭންގުތައް ކަމުގައި ސިފަކޮށް ވާހަކަދައްކާ ހެދުމާއި، ނޫސްވެރިންގެ ބައްދަލުވުންތަކުގައި ދައްކާ ވާހަކަ ވަކިގޮތަކަށް ބަދަލުކޮށްގެން ދެއްކުން ބަލައެއް ނުގަނެވޭ ކަމަށް ބައްސާމް ވިދާޅުވިއެވެ.
ބައްސާމް އިތުރަށް ވިދާޅުވީ ފުޓުބޯޅަ އާއިލާއިން އަބަދުވެސް ނޫސްވެރިންނަށް އިހުތިރާމް ކުރަމުން ގެންދާނެ ކަމަށެވެ. ހަމައެގޮތަށް ނޫސްވެރިންވެސް ފުޓުބޯޅަ އާއިލާއަށް އިހުތިރާމު ކުރުމަށް ބައްސާމް ގޮވާލެއްވިއެވެ. ބައްސާމް ވިދާޅުވީ ފުޓުބޯޅަ އާއިލާއިން ދެކެނީ ނޫސްވެރިންނަކީވެސް ފުޓުބޯޅަ އާއިލާގެ މެމްބަރުން ކަމުގައެވެ.
ދާދިފަހުން ފުޓުބޯޅަ ކުލަބުތަކުން ވަނީ "މިހާރު" ނޫސް ބައިވެރިވާ ނޫސްވެރިންގެ ބައްދަލުވުންތައް ބޮއެކޮޓް ކުރުމަށް ނިންމާފައެވެ. އަދި ފުރަތަމަ ޑިވިޝަނުގެ ބައެއް ކޯޗުން ވަނީ ނޫސްވެރިންގެ ބައްދަލުވުންތަކުގައި ކޯޗުން ދައްކާ ވާހަކަ ބަދަލުކޮށްގެން "މިހާރު" ނޫހުން ގެނަސްދެމުންދާ ކަމަށް ބުނެފައެވެ.
"ރާއްޖެ.އެމްވީ" އަށް އެނގިފައިވާ ގޮތުން ކުލަބުތަކުން މިހާރު ނޫސް ބޮއިކޮޓްކުރީ އެ ނޫހުގައި ކޮލަމް ލިޔުއްވަމުން ގެންދަވާ ހާމިދު އަބްދުލްޣަފޫރު ލިޔުއްވާ ކޮލަމާ މެދު ހިތްހަމަނުޖެހިގެންނެވެ.
