އާރަށުގެ މައްސަލަ: ޔާމީނުގެ ޝަރީއަތް ޖެނުއަރީ މަހު ފަށަނީ
މިހާތަނަށް ރައީސް ޔާމީނުގެ މައްޗަށް ފަސް ދައުވާއެއް އުފުލާފައިވޭ
އިދިކޮޅުން ބޭއްވި ކޮތަރުކޮށި ޖަލްސާގައި ރައީސް ޔާމީނު ވާހަކަ ދައްކަވަނީ
.ވ. އާރަށުގައި ރިސޯޓެއް ތަރައްގީ ކުރުމަށް އެރަށް ކުންފުންޏަކަށް ވިއްކާލުމަށްފަހު ލިބުނު ފައިސާ ކުރީގެ ރައީސް އަބްދު ﷲ ޔާމީނުގެ އަމިއްލަފުޅު އެކައުންޓަކަށް ޖަމާކުރި މައްސަލައިގައި ކުރާ ދައުވާތަކުގެ އަޑުއެހުންތައް މިއަންނަ އަހަރުގެ ޖެނުއަރީ މަހު ފަށަން ތައްޔާރުވެއްޖެއެވެ.
މަނީލޯންޑަރ ކުރުމާއި، ރިޝްވަތު ގަބޫލުކުރުމުގެ ތުހުމަތުގައި ރައީސް ޔާމީނަށް ދައުލަތުން ކުރާ ދައުވާގެ އިބްތިދާއީ އަޑުއެހުން ތާވަލުކުރެވިފައި ވަނީ މިއަންނަ ޖެނުއަރީ މަހުގެ ދެވަނަ ދުވަހަށެވެ. ކްރިމިނަލް ކޯޓުގައި އޮންނަ މި އަޑުއެހުމުގައި އެ ދުވަހު އޮންނާނީ ދައުލަތުން ކުރާ ދައުވާ ރައީސް ޔާމީނަށް ސާފުކޮށްދިނުމެވެ.
މިމައްސަލަ ތަހުގީގު ކުރުމަށްފަހު ޕީޖީ އޮފީހަށް ފޮނުވާފައި ވަނީ މިއަހަރުގެ އޭޕްރީލް މަހުގެ 30 ވަނަ ދުވަހުއެވެ. އަދި ޕީޖީ އޮފީހުން ކްރިމިނަލް ކޯޓަށް މައްސަލަ ފޮނުވީ މިދިޔަ ނޮވެމްބަރ މަހުގެ 24 ވަނަ ދުވަހުއެވެ.
މިހާތަނަށް ރައީސް ޔާމީނުގެ މައްޗަށް ފަސް ދައުވާއެއް އުފުލާފައިވެއެވެ. އޭގެ ތެރެއިން ގދ. ވޮޑެމުލާ ކުއްޔަށް ދޫކޮށްގެން އެމްއެމްޕީއާރްސީއަށް ލިބެންޖެހޭ ފައިސާގެ ތެރެއިން އެއް މިލިއަން ޑޮލަރު ރައީސް ޔާމީނުގެ އެކައުންޓަށް ޖަމާކޮށް އެ ފައިސާ ބޭނުންކޮށްގެން މަނީ ލޯންޑަރކުރުމުގެ ކުށުގައި އެމަނިކުފާނަށް ވަނީ ފަސް އަހަރުގެ ޖަލު ހުކުމެއް ކޮށްފައެވެ. ނަމަވެސް މިދިޔަ ނޮވެމްބަރ މަހުގެ 30 ވަނަ ދުވަހު ސުޕްރީމް ކޯޓުން ވަނީ އެހުކުމް ބާތިލުކޮށްފައެވެ.
