ކިޑްނެޕްކޮށް ފޭރޭ ދެ މީހެއްގެ ބަންދުގެ މުއްދަތު އިތުރުކޮށްފި
އެ ދެ މީހުންގެ ބަންދަށް ވެސް ކޯޓުން ޖަހާފައިވަނީ 15 ދުވަސް
ކްރިމިނަލް ކޯޓް
މީހުންނަށް އޮޅުވާލައިގެން ގެސްޓްހައުސްތަކަށް ގެންގޮސް ކިޑްނެޕްކޮށް، ބަރަހަނާކުރުމަށް ފަހު ބްލެކްމެއިލް ކޮށްގެން ފައިސާ ހޯދާ ކަމަށް ފުލުހުން ތުހުމަތުކުރާ ނެޓްވޯކްގެ ދެ މީހެއްގެ ބަންދުގެ މުއްދަތު އިތުރުކޮށްފިއެވެ.
ކްރިމިނަލް ކޯޓުން ބަންދުގެ މުއްދަތު އިތުރު ކުރީ ހދ. ނޭކުރެންދޫ، ވިނަރެސް، އާދަމް ވިޝާން، 18، އާއި ގއ. ކަނޑުހުޅުދޫ، ފެހިގެ، އަހުމަދު ސަނީން، 21، ގެއެވެ.
ހުއްދަނޫން ގޮތުގައި މީހުން ހިފެހެއްޓުމާއި ބްލެކްމެއިލް ކުރުމާއި ބިރުދެއްކުން އަދި ފޭރުމުގެ ތުހުމަތު ކުރާ އެ ދެ މީހުންގެ ބަންދަށް ވެސް ކޯޓުން ޖަހާފައިވަނީ 15 ދުވަހެވެ.
ވިޝާންގެ މައްޗަށް ކުރާ ތުހުމަތުތަކަށް އިންކާރު ކުރި ނަމަވެސް އޭނާއާ ދެކޮޅަށް އިންޓެލިޖެންސް ރިޕޯޓާއި ހެކިންގެ ބަޔާންނާއި އަނިޔާ ލިބުނު މީހާގެ ފޮޓޯ އަދި ސީސީޓީވީ ސްކްރީން ފޮޓޯ ހުށަހަޅާފައިވެއެވެ.
ބަންދު އަމުރުގައި ބުނީ ވިޝާންގެ ފޯނު ފުލުހުން ނެގީ އެހެން މީހެއްގެ އަތުން ކަމަށެވެ.
