އިނގިރޭސިވިލާތުގައި އަމިއްލައަށް އެކަހެރިވެވޭ މުއްދަތު 10 ދުވަހުން 7 ދުވަހަށް

އިނގިރޭސިވިލާތުގައި ކޮވިޑަށް ޕޮޒިޓިވް ވެގެން އަމިއްލައަށް އެކަހެރިވެވޭ މުއްދަތު 10 ދުވަހުން 7 ދުވަހަށް ބަދަލުކުރުމަށް ނިންމައިފިއެވެ.

އެ ޤައުމުން ބުނީ މިގޮތަށް އަމަލުކުރަން ނިންމާފައިވަނީ ކޮވިޑަށް ޓެސްޓްކޮށް، ޕޮޒިޓިވްވާތާ ހަވަނަ ދުވަހު، ޓެސްޓް ހަދައިގެން ނަތީޖާ ދެ ފަހަރަށް ވެސް ނެގެޓިވްވެފައިވާ މީހުންނަށް ކަމަށެވެ. އިނގިރޭސިވިލާތުގެ ހެލްތް ސެކެރެޓަރީ ސާޖިދު ޖާވިދު ވިދާޅުވީ މިގޮތަށް ނިންމީ ޔޫކޭގެ ހެލްތް ސެކިއުރިޓީ އެޖެންސީއާ މަޝްވަރާ ކުރުމަށްފަހު ކަމަށާއި މަޤްސަދަކީ ފްރަންޓްލައިންގައި މަސައްކަތް ކުރާ މީހުންނާއި ވިޔަފާރީތަކަށް ދަތި ނުވާނެހެން ކަންތައްތައް ކުރުމެވެ.

މި އުސޫލު ކުރިން ބުނާ ގޮތުން ކޮވިޑަށް ޕޮޒިޓިވްވާ މީހަކު 10 ދުވަސްވަންދެން އަމިއްލަށް އެކަހެރިވާން ޖެހެއެވެ. އެ ޤައުމުން މިގޮތަށް ނިންމާފައިވަނީ އޮމިކްރޯން ވޭރިއަންޓްގެ ސާޖްއާ ގުޅިގެން ފްރަންޓް ލައިން މަސައްކަތްތެރިންނާއި ޝޯޝަލް ކެއަރ ދޭ މީހުން މަދުކަމަށް ބުނެފައިވާ ދަނޑިވަޅެއްގައެވެ.

އަލްފާ ވޭރިއަންޓް އެ ޤައުމުގައި ފެތުރުނުއިރު އެކަހެރިވެވޭ މުއްދަތު 14 ދުވަހުން 10 ދުވަހަށް ޑިސެމްބަރު 2020 ގައި ވެސް ބަދަލުކޮށްފައެވެ. އިނގިރޭސިވިލާތުގެ އެކި ސަރަހައްދުތަކުގައި މިފަދަ ކަރަންޓީ މުއްދަތުތަކާއި ގައިިދުރުކަން ދަނީ ބަހައްޓަމުންނެވެ.

އެ ޤައުމުގެ ބޮޑުވަޒީރު ބޮރިސް ޖޯންސަން ދާދިފަހުން ވިދާޅުވެފައިވަނީ މިވަގުތު އެއްވެސް ކަހަލަ ހަރުކަށި ފިޔަވަޅުތަކެއް ނާޅުއްވާނެ ކަމަށެވެ. އެހެންނަމަވެސް އޮމިކްރޯން ވޭރިއަންޓް ފެތުރޭ މިންވަރު ގާތުން ބަލަމުންދާ ކަމަށް ވެސް ވިދާޅުވިއެވެ.

އަންގާރަ ދުވަހު އެކަނިވެސް 90،629 އައު ކޮވިޑް ކޭސް އިނގިރޭސިވިލާތުން ރިޕޯޓްކޮށްފައިވާއިރު މި ހަފްތާގެ ތެރޭގައި އޮމިކްރޯން ވޭރިއަންޓް ބޮޑަށް ފެތުރިގެންދާނެ ކަމަށް ވަނީ ބެލެވިފައެވެ.

މިވަގުތު އެއްވެސް ކަހަލަ ހަރުކަށި ފިޔަވަޅުތަކެއް ނާޅުއްވާނެ ކަމަށް ބޮޑުވަޒީރު ބޮރިސް ވިދާޅުވެފައިވާއިރު އޮމިކްރޯން ވޭރިއަންޓް ފެތުރެމުން ދިޔުމާއެކު ޑިސެމްބަރ މަހުގެ ތެރޭގައި އިނގިރޭސިވިލާތުގެ ހޮސްޕިޓާލިޓީ އާއި ދަތުރުފަތުރުގެ ޚިދުމަތްދޭ ކުންފުނިތަކުގެ ވިޔަފާރިތަކަށް ވަރަށް ބޮޑަށް އަސަރު ކޮށްފައިވާކަމަށް ސަރވޭއަކުން ވަނީ ދައްކާފައެވެ.

އެގޮތުން އެގައުމުގެ ޕްރައިވެޓް ސެކްޓަރގެ ކުރިއެެރުން ޑިސެމްބަރ މަހުގެ ތެރޭގައި، މީގެ 10 މަސް ދުވަސްކުރީގައި ހުރި މިންވަރަށް ވެއްޓިފައިވާކަން ސަރވޭއިން ވަނީ ހާމަވެފައެވެ.

ރޮއިޓަރސް އިން ކުރިޔަށްގެންދިޔަ މި ސަރވޭއިން ހާމަވާ ގޮތުގައި އުފެއްދުންތަކަށް އޮންނަ ޑިމާންޑް ވަނީ ކުޑަވެފައެވެ.

ހަކަތައިގެ އަގު ބޮޑުވުމާއި ކޮވިޑް-19 އާ ގުޅިގެން ސަޕްލައި ޗެއިންގައި އުޅޭ ލަސްތަކާއިއެކު މުޅި ދުނިޔޭގައިވެސް މިއަހަރު ތެރޭގައި އަންނަނީ ތަކެތީގެ އަގު ބޮޑުވަމުންނެވެ.

އިނގިރޭސިވިލާތުގައި އިގްތިޞާދު ކުރިއަރާ މިންވަރު ދަށްވެފައި މިވަނީ އޮމިކްރޯން ވޭރިއަންޓް ފެތުރުން ކޮންޓްރޯލް ކުރުމަށް އަޅާފައިވާ ފިޔަވަޅުތަކުގެ ސަބަބުންކަމަށް އެގައުމުގެ ޕާރޗޭސިންގ މެނޭޖަރސް އިންޑެކްސްގެ ޑޭޓާއިން ހާމަވެއެވެ.

އެގޮތުން ހޮޓާ، ރެސްޓޯރަންޓްތަކާއި ދަތުރުފަތުރުގެ ސެކްޓަރަށް ބޮޑެތި ގެއްލުންތަކާއި ކުރިމަތިވެފައިވާކަމަށް އެގައުމުގެ މާހިރުން ބުނެއެވެ. އަދި 2022 ވަނަ އަހަރާ ކުރިމަތިލާއިރު އެގައުމުގެ އިގްތިޞާދު އިތުރަށް މަޑުޖެހެމުން އަންނާނެކަމަށް ބެލެވޭކަމަށްވެސް މާހިރުން ބުނެއެވެ.

ޕާރޗޭސިންގ މެނޭޖަރސް އިންޑެކްސްގެ ސަރވިސް ސެކްޓަރުގެ ޑޭޓާއަށް ބަލާއިރުވެސް ނޮވެމްބަރު މަހަށްވުރެން ޑިސެމްބަރު މަހު ވަނީ އެ ސެކްޓަރުވެސް ދަށަށްގޮސްފައެވެ. އެގޮތުން ނޮވެމްބަރު މަހު 58.5 ގައި އިންޑެކްސް ހުރިއިރު ޑިސެމްބަރ މަހު ހުރީ 53.2 ގައެވެ.