އުމަރު ޒާހިރުގެ ޖަނާޒާ ވަކިގޮތަކަށް ކުރިޔަށް ގެންދިޔުމަށް ވަސިއްޔަތްކޮށްފައެއްނުވޭ: އާއިލާ
މިފަދަ ހިތާމަވެރި ދަނޑިވަޅެއްގައި މިފަދަ ހަގީގަތެއްނެތް ވަހަކައެއް އެއްވެސް ފަރާތަކުން ދެއްކުމަކީ އާއިލާއިން ވަރަށް ހިތާމަކުރާކަމެއް
ނިޝާން އިއްޒުއްދީންގެ އިއްޒަތުގެ ވެރިޔާ އުމަރު ޒާހިރު ފަސްދާނުލުން
ނިޝާން އިއްޒުއްދީންގެ އިއްޒަތުގެ ވެރިޔާ އުމަރު ޒާހިރު އަވަހާރަވެފައިވާއިރު, ޖަނާޒާގެ ކަންކަން ވަކިގޮތަކަށް ކުރިޔަށް ގެންދިޔުމަށް ވަސިއްޔަތްކޮށްފައިވާކަމަށް ދެކެވޭ ވާހަކަތަކީ ހަގީގަތާ ޚިލާފު ވާހަކަތެއްކަމަށް އުމަރު ޒާހިރުގެ އާއިލާއިން ބުނެފިއެވެ.
އުމަރު ޒާހިރުގެ ހުންނެވި ހަމައެކަނި ދަރިކަނބަލުން ފާތިމަތު ސާމިހާ ނެރުއްވި ބަޔާނެއްގައި އެކަން ދޮގުކުރައްވައި ވާހަކަދައްކަވާފައިމިވަނީ، ދައުލަތުގެ އިއްޒަތްތެރިން އަވަހާރަވުމުން އާންމުކޮށް ފަސްދާނުލާ ގަލޮޅު ސަހަރާގެ ބަދަލުގައި "އާންމުން ވަޅުލާ ތަނެއްގައި ވަޅުލަން" އުމަރު ޒާހިރު ވަސިއްޔަތް ކުރައްވާފައިވާކަމަށް، އެ މަނިކުފާނުގެ އެކުވެރިޔެއް ކަމުގައިވާ އަބްދުލް ހަމީދު އަލީއާ ހަވާލާދީ މީޑިއާއަކުން ރިޕޯޓް ކުރުމުންނެވެ. އަބްދުލް ހަމީދު އަލީއަކީ މުނިސިޕަލްޓީގައި އުމަރު ޒާހިރު އާއެކު މަސައްކަތްކުރެއްވި ބޭފުޅެކެވެ.
"ވިދާޅުވީ، ހަމީދު ދުނިޔޭގައި ހުއްޓާ ތިމަންނަ މަރުވެއްޖިއްޔާ އާންމުން ވަޅުލާ ތަނެއްގައި ވަޅުލާށޭ. އެކަމަކު އެއީ އަޅުގަނޑަށް ކުރެވޭނެ ކަމެއް ކަމަށް ނުވާތީ އެ ވާހަކަ އުމަރު ޒާހިރުގެ އާއިލާއަށް ވާނީ ދަންނަވާފައި." އުމަރު ޒާހިރު އަވަހާރަވުމާއެކު ހަމީދު ވިދާޅުވެފައިވާކަމަށް މީޑިޔާގައި ރިޕޯޓްކޮށްފައިވެއެވެ.
އާއިލާގެ ފަރާތުން ދަރިކަނބަލުން ނެރުއްވި ބަޔާނުގައި ވިދާޅުވެފައިވަނީ، ބައްޕައަކީ އެތައް ހާސް ބަޔެއްގެ ލޯތްބާއި އިހުތިރާމް ލިބިވަޑައިގެންފައިވާ ފަރާތަކަށްވާއިރު، މިފަދަ ހިތާމަވެރި ދަނޑިވަޅެއްގައި މިފަދަ ހަގީގަތެއްނެތް ވާހަކައެއް އެއްވެސް ފަރާތަކުން ދެއްކުމަކީ އާއިލާއިން ވަރަށް ހިތާމަކުރާކަމެއް ކަމަށެވެ.
ބަޔާނުގައި ސާމިހާ އިތުރަށް ވަނީ، ނިޝާން އިއްޒުއްދީނުގެ އިއްޒަތުގެ ވެރިޔާގެ ލަގަބު ދިވެހި ދައުލަތުން އުމަރު ޒާހިރަށް އަރުވާފައިވާތީ، އެ މަނިކުފާނުގެ ޖަނާޒާގެ ކަންކަން ސަރުކާރުން، ޚާއްސަކޮށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ފަރާތްޕުޅުން ވަރަށް ޚާއްސަ ކަމެއް ދެއްވައިގެން ކުރިއަށް ގެންދެވިކަން ފާހަގަ ކުރައްވާފައެވެ.
ދައުލަތަށް 50 އަހަރަށް ވުރެ ގިނަ ދުވަހު ޚިދުމަތް ކުރައްވާފައިވާ އުމަރު ޒާހިރުގެ ހަށިކޮޅު ހޯމަ ދުވަހުގެ ރޭ އިޝާ ނަމާދަށް ފަހު ފަސްދާނުލީ ރަސްމީ އިއްޒަތުގައި ގަލޮޅު ސަރަހާގައެވެ.
ދައުލަތުގެ އިއްޒަތްތެރިން އަވަހާރަވުމުން އާންމުކޮށް ފަސްދާނުލަނީ ގަލޮޅު ސަހަރާގައެވެ. އުމަރު ޒާހިރުގެ ޖަނާޒާގައި ރައީސް އިބްރާހިމް މުހައްމަދު ސޯލިހާއި ނައިބު ރައީސް ފައިސަލް ނަސީމާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަދި ދައުލަތުގެ ގިނަ އިސްވެރިންނާއި ގިނަ ބަޔަކު ބައިވެރިވިއެވެ.
