ނިޝާން ޢިއްޒުއްދީންގެ ޢިއްޒަތުގެ ވެރިޔާ ޢުމަރު ޒާހިރު ކޮވިޑް-19ގެ އާލާސްކަންފުޅުގައި އަވަހާރަވުމާ ގުޅިގެން، އެމަނިކުފާނު ދިވެހި ގައުމަށް ކޮށްދެއްވި އަގުހުރި ޚިދުމަތްތަކުގެ ޒިކުރާ އެތައް ބަޔަކު ގެންދަނީ އާކުރަމުންނެވެ.

އޭގެތެރޭގައި އާންމުންނާއި ސަރުކާރުގެ އެކި މަގާމުތައް އެކި ދުވަސްވަރު އަދާކުރެއްވި، އަދި އަދާކުރައްވަމުން ގެންދަވާ ބޭފުޅުންވެސް ހިމެނެއެވެ. އެމަނިކުފާނު އަވަހާރަވުމާގުޅިގެން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ކުރެއްވި ޓްވީޓެއްގައި ވިދާޅުވީ، ދައުލަތަށް 49 އަހަރަށްވުރެ ދިގު މުއްދަތެއްގައި ޚިދުމަތް ކުރެއްވި، ނ.ޢ.ޢ.ވ ޢުމަރު ޒާހިރު އަވަހާރަވުމަކީ، މުޅި ދިވެހި ޤައުމަށް ލިބުނު ވަރަށް ފުން ހިތާމައެއް ކަމަށެވެ.

ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުޙައްމަދު ނަޝީދު ކުރެއްވި ޓްވީޓެއްގައި ވިދާޅުވީ، ޢުމަރު ޒާހިރަކީ ޒަމާނީ ދިވެހިރާއްޖެ ބިނާކުރުމުގައި އެންމެ އިސްދައުރެއް އަދާކުރެއްވި ހިއްސާދާރެއްކަމަށެވެ. އިޖުތިމާޢީ، އިޤްތިޞާދީ އަދި ސިޔާސީ ކަންކަމުގައި އެމަނިކުފާނުގެ ބައިވެރިވުން ބޮޑުކަމަށް ނަޝީދު ވިދާޅުވިއެވެ.

ކުރީގެ ރައީސް މައުމޫން ޢަބްދުލްޤައްޔޫމް ކުރެއްވި ޓްވީޓެއްގައި ވިދާޅުވީ، ޢުމަރު ޒާހިރުގެ ވަކިވުމަކީ ފޫނުބެއްދޭވަރުގެ ގެއްލުމެއްކަމަށެވެ. އަދި އެއީ އެތައް ދިވެހި ރައްޔިތުންގެ ލޯބި ހާސިލުކުރައްވާފައިވާ ލެޖެންޑެއްކަމަށެވެ. ފާއިތުވި 50 އަހަރު ގައުމީ ފެންވަރުގައި ހާސިލްކުރެވުނު ކޮންމެ ކަމެއްގައި އެމަނިކުފާނުގެ ހިއްސާ އޮތްކަމަށް މައުމޫން ވިދާޅުވިއެވެ.

މީގެއިތުރުން ކުރީގެ ރައީސް ޑރ މުޙައްމަދު ވަޙީދު ޙަސަން މަނިކު ކުރެއްވި ޓްވީޓެއްގައިވެސް ވަނީ އުމަރު ޒާހިރު ގައުމަށް ކޮށްދެއްވި އަގުނުކުރެވޭ ފަދަ ޚިދުމަތްތައް ފާހަގަކުރައްވާފައެވެ.

ޢުމަރު ޒާހިރުވަނީ، 50 އަހަރަށްވުރެ ގިނަ އަހަރު ދިވެހި ގައުމަށް އިޚްލާޞްތެރި އަގުހުރި ގިނަގުނަ ޚިދުމަތްތައް ކުރައްވާފައެވެ.

ޢުމަރު ޒާހިރުގެ ގައުމީ ޚިދުމަތް ފެއްޓެވީ، 1950ގެ އަހަރުތަކުގައެވެ. އެހިސާބުން ފެށިގެން 1970ގެ އަހަރުތަކާ ހަމަޔަށް އަދާކުރެއްވި މަގާމުތަކުގެ ތެރޭގައި; އައްޑޫ ގަމުގައި ހުންނަވާ ދިވެހި ސަރުކާރުގެ ލޭޒަން އޮފިސަރުކަމާއި، ދާޚިލިއްޔާގެ އެކިއެކި ވަޒީފާތަކާއި މަޖީދިއްޔާގެ ހެޑްމާސްޓަރުކަމާއި، ރޭޑިއޯ މޯލްޑިވްސްގެ ވެރިޔާކަމާއި، އެޑިއުކޭޝަން މިނިސްޓްރީގެ ނާއިބު ކަމާއި، ހޯމް މިނިސްޓްރީގެ ނާއިބުކަމާއި، ބަނޑޮސް ރިސޯޓުގެ މެނޭޖަރުކަންވެސް ހިމެނެއެވެ.

އެމަނިކުފާނަކީ ގައުމީ ބޮޑެތި މަސައްކަތްތައް އަމަލީގޮތުން ހިންގެވުމާއި، އެމަސައްކަތްތައް ހިނގާނުހިނގާގޮތް ބެއްލެވުމާއި، އިޖުތިމާއީ އަދި ގައުމީ އެންމެހައި ކަންކަމުގައި ހަރަކާތްތެރިވެވަޑައިގަތުމުގެ ލާމަސީލު ނަމޫނާ ޝަޚްޞިއްޔަތެކެވެ. ދިވެހިރާއްޖެއަށް ފުރިހަމަ މިނިވަންކަން ހޯދައިދިނުމަށް 1960ގެ އަހަރުތަކުގެ ކުރީކޮޅު ކުރެވުނު، ގައުމީ ރޫހާއި ޖޯޝާއި ގައުމީ ފޯރި ހިމެނުނު ގައުމީ މަސައްކަތުގެ އެންމެ ކުރީ ސަފުގައިވެސް ޒުވާނެއްގެ ގޮތުގައި އެމަނިކުފާނު ވަރަށް ފާހަގަ ކުރެވޭ އަމަލީ ދައުރެއް އަދާކުރައްވާފައިވެއެވެ.

1980 ވަނަ އަހަރުން ފެށިގެން 1993ގެ ނިޔަލަށް މާލޭ މުނިސިޕަލްޓީގެ ރައީސްކަން ކުރެއްވިއެވެ. މިނިސްޓަރ އޮފް ކޮންސްޓްރަކްޝަން އެންޑް ޕަބްލިކް ވަރކްސް ކަމާއި، ރައީސުލްޖުމްހޫރިއްޔާ އޮފީހުގެ ސީނިއަރ މިނިސްޓަރުކަން ވެސް ވަނީ ކުރައްވާފައެވެ.

އޮނަރަބަލް ޢުމަރު ޒާހިރުގެ ދިގު ގައުމީ ޚިދުމަތްތަކުގެ އަގު ވަޒަންކުރައްވައި ސަރުކާރުން ވަނީ އެމަނިކުފާނަށް ނިޝާން ޢިއްޒުއްދީނުގެ ޝަރަފު އަރުވާފައެވެ.

އެމަނިކުފާނު އަވަހާރަވީ ކޮވިޑްގެ އާލާސްކަންފުޅަށް ފަރުވާ ހޯއްދަވަމުން ގެންދަވަނިކޮށް ދަރުމަވަންތަ ހޮސްޕިޓަލްގައެވެ.