ތަހުޒީބު ޑިމޮކްރަސީއެއްގައި އެކަން އެގޮތަށް ނުހިނގާނެކަމަށާއި، އެކަން ރާއްޖޭގެ ފުލުހުން ހުއްޓުވަން ޖެހޭކަމަށް ރައީސް ނަޝީދު ވިދާޅުވި
އެމްޑީޕީން މާލެ ސިޓީގެ ރައްޔިތުންނާއެކު ބޭއްވި ބައްދަލުވުމުގައި ރައީސް ނަޝީދު ވާހަކަދައްކަވަނީ
ކުރީގެ ރައީސް އަބްދުﷲ ޔާމީނަށް ޓީޝާޓްގައި "އިންޑިޔާ އައުޓް" ޖައްސަވައިގެން ބޭރަށް ނިކުމެވަޑައިގެން އެގޮތަށް ނުހިންގެވޭނެކަމަށް އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
މާލެ ސިޓީގެ ރައްޔިތުންނާ ބައްދަލުކުރުމަށް އެމްޑީޕީން ކުރިޔަށްގެންދިޔަ މާލެ ސިޓީ ކޯކަސް ބައްދަލުވުމުގައި ވާހަކަދައްކަވަމުން ރައީސް ނަޝީދު ތަކުރާރުކޮށް ވިދާޅުވީ އިންޑިޔާ އައުޓޭ ނުގޮވޭނެކަމަށެވެ. އެއީ ކަނޑައެޅިގެން ރާއްޖޭގެ މަސްލަހަތާ ޚިލާފު ކަމެއްކަމަށް ރައީސް ނަޝީދު ވިދާޅުވިއެވެ. ރާއްޖޭގެ އެކި ތަންތަނުގައި އެކި ސަރަހައްދުތަކުގައި އެހެން ގޮވަމުން ނުދެވޭނެކަމަށް ރައީސް ނަޝީދު ވިދާޅުވިއެވެ.
ތަހުޒީބު ޑިމޮކްރަސީއެއްގައި އެކަން އެގޮތަށް ނުހިނގާނެކަމަށާއި، ރާއްޖޭގެ ފުލުހުން އެކަން ހުއްޓުވަން ޖެހޭކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު އިތުރަށް ވިދާޅުވީ، ރައީސް ޔާމީން އެގޮތަށް ޓީޝާޓްގައި ޖަހައިގެން ނިކުންނެވުމުން އެކަން ވަނީ ރައީސް ޔާމީނާއި ޕީޕީއެމްއަށްވެސް ހުތުރަކަށް ކަމަށެވެ. އެކަމުން ޕީޕީއެމްގެ މެމްބަރުން ސަލާމަތްކޮށްދިނުމަށް އިންތިހާއަށް އެދިވަޑައިގަންނަވާކަމަށް ރައީސް ނަޝީދު ވިދާޅުވިއެވެ.
ކުރީގެ ރައީސް ޔާމީން އިސްވެ ހުންނަވާ އިންޑިޔާ އައުޓް ނަމުގައި ކުރިޔަށްގެންދާ ކެމްޕެއިން ވަނީ އެމަނިކުފާނު ޖަލުން މިނިވަންވެ ވަޑައިގެންނެވިފަހުން ކުރިޔަށްވުރެ ފުޅާކޮށް ކުރިޔަށް ގެންދަން ފަށާފައެވެ. އެގޮތުން އެމަނިކުފާނު އިސްވެ ހުންނަވައިގެން އަތޮޅުތަކުގައިވެސް ގެންދަވަނީ އިންޑިޔާ އައުޓް ނަމުގައި ކެމްޕެއިން ކުރިޔަށް ގެންދަމުންނެވެ.
އެކަމާގުޅިގެން ދިވެހި ސަރުކާރުން ވަނީ ރާއްޖޭގެ ހުރިހާ ފަރާތްތަކާއި ސިޔާސީ ޕާޓީތަކަށާއި، ސިޔާސީ ލީޑަރުންނަށްވެސް ޒިންމާދާރުކަމާއެކު ހަަރަކާތްތެރިވުމަށް ގޮވާލައި، ރާއްޖެއާއި ދޭދޭ ގައުމުތަކާއި ބައިނަލްއަގުވާމީ މަސްރަހުގައި އޮންނަ ގާތް ގުޅުންތަކަށް ބުރޫއަރާހެން ދޮގު މައުލޫމާތު ނުފެތުރުމަށް ގޮވާލައި އެކަމަށް އިލްތިމާސްކޮށްފައެވެ.
