އަފްޣާނިސްތާނުގެ އިޤްތިޞާދީ ކާރިސާއާ ގުޅިގެން ދިމާވެފައިވާ ބަނޑުހައިހޫނުކަމުގެ މައްސަލައަށް އޯއައިސީން އެހީތެރިވަނީ

އަފްޣާނިސްތާނަށް ދިމާވެފައިވާ އިޤްތިޞާދީ ކާރިސާއާ ގުޅިގެން އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) އިން އެގައުމަށް އެހީތެރިވުމަށް ނިންމައިފިއެވެ.

އެގޮތުން އޯއައިސީން ނިންމާފައިވަނީ ހިއުމެނިޓޭރިއަން ޓްރަސްޓް ފަންޑެއް ހުޅުވައި އިޤްތިޞާދީ ކާރިސާއިން އަރައިގަތުމަށް މަސައްކަތް ކުރުމަށެވެ. އަފްޣާނިސްތާނަށް ދިމާވެފައިވާ އިޤްތިޞާދީ ކާރިސާއާ ގުޅިގެން އެގައުމުގެ އެތައް މިލިއަން މީހުންނެއް އަންނަނީ މި ފިނި މޫސުމުގައި ބަނޑުހައި ހޫނުކަމާ ކުރިމަތިލަމުންނެވެ.

މި ފަންޑު ހަމަޖެއްސުމަށް ނިންމާފައިވަނީ އިސްލާމިކް ޑިވަލޮޕްމަންޓް ބޭންކް މެދުވެރިކޮށް އަފްޣާނިސްތާނުގައި ހަރަކާތްތެރިވާ ގްރޫޕުތައް މެދުވެރިކޮށް ކަމަށް ޕާކިސްތާނުގެ ފޮރިން މިނިސްޓަރ ޝާހް މަހުމޫދު ގުރައިޝީ ވަނީ ވިދާޅުވެފައެވެ.

އޯއައިސީގެ ބައްދަލުވުމަށްފަހު ނެރުނު ބަޔާނުގައި ބުނެފައިވަނީ އަފްޣާނިސްތާނުން އެގައުމުގެ އިޤްތިޞާދު ހިނގައިގަތުމަށް ހުރި ދޮރުތައް ހުޅުވަން ފުރުސަތު ދޭން ޖެހޭ ކަމަށާއި، އިޤްތިޞާދު ފުނޑުމުގެ ކުރިން ސެންޓްރަލް ބޭންކުގައި ހުރި އެގައުމުގެ ބިލިއަން ޑޮލަރު ދޫކުރަން ޖެހޭ ކަމަށެވެ.