އިދިކޮޅުގެ ބޭނުމަކީ އިންޑިއާ އައުޓޭ ކިޔައިގެން ފިތުނަވެރިކޮށް ވެރިކަމަށް އައުން!

އިންޑިއާއަކީ އަބަދުވެސް ރާއްޖޭގެ އަސްކަރިއްޔާ ވަރުގަދަ ކުރުމަށް އެހީތެރިވަމުން އަންނަ ގައުމެވެ. އަދި ރާއްޖޭގެ ތަރައްގީގައިވެސް މުހިންމު ބައިވެރިއެކެވެ. މި ސަރުކާރުން ގާއިމްކުރި ހަރުދަނާ ޚާރިޖީ ސިޔާސަތުގެ ސަބަބުން ރާއްޖެއާ އިންޑިއާ އާއި އޮންނަނީ ގާތް އެކުވެރި ގުޅުމެކެވެ. ހަމަ މިގޮތަށް އެހެން ގައުމުތަކާވެސް އޮންނަނީ މިފަދަ ގާތް ގުޅުމެކެވެ. ޗައިނާއާވެސް ގުޅުން އޮވެއެވެ. ސައުދީ އަރަބިއާ އަދި އެމެރިކާފަދަ ގައުމުތަކާވެސް ގުޅުން ރަނގަޅެވެ. ގައުމުުތަކާއި ގުޅުން ބަދަހިކުރަން މި ސަރުކާރުން ކުރި މަސައްކަތުގެ ނަަތީޖާވެސް އެހާ ފުރިހަމައެވެ.

އެހެންކަމުން ރާއްޖެއާ އެންމެ ގާތް ގައުމަކަށް އަމާޒުކޮށް އިދިކޮޅުން މި ގޮވާ"އިންޑިއާ އަައުޓް"ގެ މަގްސަދާމެދު ސުވާލު އުފެދެއެވެ. ވެރިކަުގެ ދަހިވެތި ކަމުގައި ބަޔަކު ކޮންމެ ފަދަ ކަމެއް އަދި ކޮންމެފަދަ ފިތުނައެއްވެސް އުފައްދަފާނެއެވެ. މިހާ ހިސާބުން ރައްޔިތުންގެ މަޖިލީހުގެ ރައީސް އަދި ކުރީގެ ރައީސުލްޖުމްހޫރިއްޔާ މުހައްމަދު ނަޝީދު ލިޔުއްވާފައިވާ ލިޔުމެއްގެ ބައެއް ހިއްސާ ކޮށްލާނަމެވެ.

ރައީސް ނަޝީދު ވިދާޅުވީ، އިދިކޮޅު ކޯލިޝަނުން އިންޑިއާ އައުޓްގެ ނަމުގައި ހިންގާ ކެމްޕެއިނަކީ ފިތުނަވެރިކަން އުފެއްދައި ވެރިކަމަށް އައުމަށް ހިންގާ ކެމްޕެއިނެއް ކަމަށެވެ. އިންޑިއާއިން އެއްގޮތަކަށްވެސް ރާއްޖެ ހިފާފާނެ ކަމުގެ ބިރުވެރިކަމެއް އޮތްކަމަށް އެއްވެސް މާހިރެއްވެސް އަދި މުފައްކިރެއްވެސް ވިދާޅުވެފައި ނުވާ ކަމަަށެވެ. އިދިކޮޅުން މަސައްކަތް ކުރަމުންދަނި އިންޑިއާއާއި ރާއްޖެއާ އޮންނަ ގުޅުން ކިލަނބު ކޮށްލަން ކަމަށާއި، ވެރިކަމުގެ ދަހިވެތިކަމަށްޓަކައި ކޮންމެ ފަދަ ކަމެއްވެސް އިދިކޮޅުން ކޮށްފާނެކަމީ މާޒީން ފެންނަން އޮތް ހަގީގަތް ކަމަށެވެ. އިންޑިއާއާ ދެކޮޅަށް އިދިކޮޅުން ހިންގާ ހަރަކާތަކަށް ދިވެހިން ނުހެއްލޭނެކަން އެމަނިކުފާނަށް ޔަގީން ކަމުގައި ވިދާޅުވިއެވެ.

އިންޑިއާއަކީ ރާއްޖެއަށް އޮތް ނުރައްކަލެއް ނޫން ކަމަށާއި، ރާއްޖެއަށް ނުރައްކާ ބޮޑު ޓެރަރިސްޓް ޖަމާއަތްތަކާއި، ޑްރަގް ނެޓްވާރކްތަކުގެ ކިބައިން ރާއްޖެ ސަލާމަތް ކުރުމަށް މިހާރުވެސް ދައުލަތުން އަހަރަކަށް 4 ބިލިއަނެއްހާ ރުފިޔާ ޚަރަދުކުރާ ކަމުގައި އެމަނިކުފާނު ވިދާޅުވިއެވެ. އެހެންނަމަވެސް އެ ނުރައްކަލުން އަދިވެސް ދިވެހިން ސަލާމަތް ނުވާ ކަމަށާއި، ޓެރަރިސްޓް ޖަމާއަތަކުން ހާހެއްހާ މީހުން ހަތިޔާރާއެކު ރާއްޖެ ހިފުމަށް މަސައްކަތް ނުކުރާނެ ކަމަށް ދެކިގެން ނުވާނެ ކަމަށެވެ. ރާއްޖެއާއި އިންޑިއާ ދެމެދު ދިފާއީ ވަރުގަދަ ގުޅުމެއް ނެތްނަމަ ޓެރަރިސްޓް ޖަމާއަތްތަކުން ރާއްޖެ ހިފުމަށްކުރާ މަސައްކަތް އިތުރަށް ފުޅާ ކުރާނެ ކަމަށް ރައީސް ނަޝީދު ވިދާާޅުވިއެވެ.

މިފަދަ ޓެރަރިސްޓް ޖަމާއަތްތަކުން ރާއްޖެ ހިފުމަށް މަސައްކަތްކުރި ކޮންމެ ފަހަރެއްގައި އިންޑިއާގެ އެހީތެރިކަން ދިވެހިންނަށް ފުރިހަމައަށް އަދި އެހާމެ އަވަހަށް ލިބުނެއެވެ. އެފަދަ ގައުމަކުން ރާއްޖެ ހިފަނީ ކަމަށް ބުނެ މުޅި ރާއްޖޭގައި ހަރަކާތްތަކެއް ކުރިއަށް ގެންދެވުމަށް ކުރީގެ ރައީސްކަން ކުރައްވާފައިވާ ބޭފުޅަކު އަތުކުރި އޮޅާލެއްވީތީ ހައިރާން ވާން ޖެހެއެވެ. ޚުދު އެމަނިކުފާނުގެ ވެރިކަމުގައިވެސް އިންޑިއާގެ އެހީތެރިކަމަށް އެދުނު ކޮންމެ ފަހަރަކު ވަރަށް ފުރިހަމައަށް އެ އެހީތެރިކަން އިންޑިއާއިން ދިނެވެ.

ރާއްޖެއާ ޖެހިގެން އެންމެ ކައިރިން އޮތް އިންޑިއާއަކީ ދިވެހިންނާ ގާތް ގުޅުމެއް ބާއްވާ ގައުމެކެވެ. ރާއްޖެއާ ޚާރިޖީ ގުޅުންވެސް އެހާމެ ރަނަގަޅު ގައުމެކެވެެ. ދިވެހިން ވަނީ މާކުރިން އެކަން ބަލައިގެންފައިކަމަށް ރައީސް ނަޝީދު ވެސް ވިދާޅުވިއެވެ. އިންޑިއާއަކީ ދުނިޔޭގެ އެންމެ ބޮޑު ޑިމޮކްރަސީއަށްވީއިރު ދިވެހިންނާއި ވެރިކަމުގެ ސިފަތައް ވަރަށް އެއްގޮތެވެ. ޑިމޮކްރަސީގައިވެސް ދިވެހިން ގާތް ގުޅުމެއް އުފައްދަނީ އިންޑިއާއާއި އެކުގައެވެ. ތެދުފުޅެކެވެ. ދިވެހިންނަށް ފުރިހަމަ މިނިވަން ކަމެއް 1965 ވަނަ އަހަރު ލިބުމާއެކު އެންމެ ފުރަތަމަ ޚާރިޖީ ގުޅުން ގާއިމްކުރީވެސް އިންޑިއާއާއެކުގައެވެ. އަވަށްޓެރިކަމަށް ދިވެހިން ލޯބި ކުރެއެވެ. ދިވެހިންނަށް ރަނގަޅު ގޮތް ދިވެހިންނަކަށް ނޯޅޭނެއެވެ.

ރާއްޖޭގެ ތަރައްގީގެ ކަންކަމުގައި ބޭރުގެ ގައުމުތަކުގެ އެހީއަށް އަބަދުވެސް ދިވެހިން މަރުހަބާ ކިޔައެވެ. އެއީ ޗައިނާއިން ކަމަށްވިޔަސް އަދި އިންޑިއާއިން ކަމަަށްވިޔަސް އެކަން އޮންނަނީ އެހެންނެވެ. ރާއްޖެއަށް އެންމެ ގިނައިން އެހީ ފޯރުކޮށްދޭ ގައުމަކަށް ރާއްޖޭގެ ހުރިހާ ކަމެއް ހިބައިން ދިނުމަކީ ދިވެހިން އެއް އިރެއްގައިވެސް ގަބޫލުކުރި ކަމެއް ނޫނެވެ. އެކަން އެހެން ނުވެސް ކުރާނެއެވެ. އެހެންކަމުން ދިވެހި ގައުމު އިންޑިއާއަށް ވިއްކާލަނީ ކަމަށްބުނެ އިދިކޮޅުން މި ހިންގާ ހަރަކާތަކީ، ދިވެހިންނަށް އޮޅުވާލައި މުޅިން ތަފާތު މަގްސަދެެއްގައި ހިންގާ ހަރަކާތެކެވެ. އެމީހުންގެ ބޭނުމަކީ ފިތުނަވރިކަމެއް އުފައްދައި ވެރިކަމަށް އަތްގަދަ ކުރުމެވެ.