އަރަބިއްޔާ ބެލެނިވެރިންގެ ކަންބޮޑުވުން: މިނިސްޓްރީގެ ނިންމުން ބަދަލެއް ނުކުރޭ
19 ޑިސެމްބަރު 2021 | އާދީއްތަ 06:40އަރަބިއްޔާ ދަރިވަރުން އިއްޒުއްދީން ސްކޫލަށް ބަދަލުކުރަން ވަނީ ނިންމާފައި
އަރަބިއްޔާ ސްކޫލްގެ ބެލެނިވެރިން ކަންބޮޑުވުން ފާޅުކުރަނީ
އަރަބިއްޔާ ސްކޫލްގެ ދަރިވަރުން އިއްޒުއްދީން ސްކޫލަށް ބަަލުކުރަން ނިންމި ނިންމުމަށް އެއްވެސް ބަދަލެއް ގެނެސްފައިނުވާކަމަށް އެޑިއުކޭޝަން މިނިސްޓްރީން ބުނެފިއެވެ.
އަރަބިއްޔާ ސްކޫލްގެ ދަރިވަރުން އިއްޒުއްދީން ސްކޫލަށް ބަދަލުކުރަން ނިންމާފައިވާކަން އެޑިއުކޭޝަން މިނިސްޓްރީން އިއުލާނުކޮށްފައިވަނީ މި މަހުގެ 16 ވަނަ ދުވަހުއެވެ. މި ނިންމުން ނިންމުމާއެކު ހުކުރު ދުވަހުގެ ހަވީރު އަރަބިއްޔާ ސްކޫލުގެ ކައިރީގައި ގިނަ އަދަދެއްގެ ބެލެނިވެރިން އެއްވެ، ވަނީ ނުރުހުންފާޅު ކޮށްފައެވެ. އަދި އެކި ފަރާތްތަކުން ގެންދަނީ ސޯޝަލް މީޑިއާގައި ވެސް މި ނިންމުމާ ދެކޮޅަށް އެކި ވާހަކަތައް ދައްކަމުންނެވެ.
މިކަމާ ގުޅިގެން ރާއްޖެ އެމްވީއަށް މައުލޫމާތުދެމުން އެޑިއުކޭޝަން މިނިސްޓްރީން ބުނީ މި ނިންމުމަށް އެއްވެސް ބަދަލެއް ގެންނަން މިހާތަނަށް ނިންމާފައިނުވާކަމަށެވެ.
މިކަމާ ގުޅިގެން ރާއްޖެއެމްވީއާ ވާހަކަ ދެއްކި ބެލެނިވެރިއަކު ބުނީ ހުކުރު ދުވަހުގެ ހަވީރު އެ ސުކޫލުގައި ބެލެނިވެރިން ބައްދަލުވުމެއް ބޭއްވި ކަމަށާއި، ދަރިވަރުންގެ ކިޔެވުން ވަގުތީގޮތުން އިއްޒުއްދީން ސުކޫލަށް ބަދަލުކުރަން ގިނަ ބެލެނިވެރިން ބޭނުން ނުވާ ކަމަށެވެ. އަދި އެކަން އެޑިޔުކޭޝަން މިނިސްޓްރީއަށް ވެސް އަންގާފައިވާ ކަމަށާއި، އެނިންމުމަކީ ބެލެނިވެރިންނާ މަޝްވަރާ ކުރުމެއްނެތި ނިންމާފައިވާ ނިންމުމެއް ކަމަށް އޭނާ ބުނެފައިވެއެވެ.
އަރަބިއްޔާ ސްކޫލަށް ސަރުކާރުތަކުން ދަނީ އިހުމާލުވަމުންކަން ފާހަގަކޮށް ބެލެނިވެރިން ބުނީ ދަރިވަރުން އިއްޒުއްދީން ސްކޫލަށް ބަދަލުކޮށްފި ކަމުގައިވާނަމަ އުޅުމަށް ވަރަށް ބޮޑެތި ބަދަލުތަކެއް އަންނާނެ ކަމަށެވެ.
މިކަމާ ގުޅިގެން ދީނީ އިލްމުވެރިންނާއި ސިޔާސީ އެކި އެކި ބޭބޭފުޅުން ވެސް ގެންދަނީ ސޯޝަލް މީޑިއާގައި އެކި ގޮތްގޮތަށް ވާހަކަދައްކަމުންނެވެ. އެގޮތުން އަރަބިއްޔާ ސްކޫލަކީ ޚާއްސަ ސްކޫލެއް ކަމަށާއި، ތަފާތު ދެ މީޑިއަމަކަށް ކިޔަވައިދޭ ދެ ސްކޫލު އެއް އިމާރާތެއްގެ ތެރޭގައި އެއްކޮށްލުމަށްވުރެ އެއް މީޑިއަމެއްގެ ދެ ސްކޫލު އެއްތަނަކަށްލުން މާ ބުއްދިވެރިކަމަށް ގިނަ ބަޔަކު ބުނަމުންދެއެވެ.
އަރަބިއްޔާ ސްކޫލް ހުންނަ އިމާރާތަށް ލިބިފައިވާ ގެއްލުންތަކާ ގުޅިގެން އެޑިއުކޭޝަން މިނިސްޓްރީން ނެރުނު ބަޔާނުގައި ބުނެފައިވަނީ އަރަބިއްޔާ ސްކޫލްގެ އިމާރާތަށް މިވަގުތު ދިމާވެގެން އުޅޭ މައްސަލަ ބަލައި ހައްލުކުރުމަށް އިތުރު ވަގުތު ބޭނުންވާ ކަމަށެވެ. އެ ސްކޫލްގެ އިމާރާތުގެ ހާލަތު މިވަގުތު ހުރިގޮތުން އެތަނުގައި ދަރިވަރުންނަށް ތައުލީމު ފޯރުކޮށްދިނުމަކީ އެންމެ ރައްކާތެރިކަމެއްނޫން ކަމަށާއި، ޢިމާރާތަށް ލިބިފައިވާ ގެއްލުންތަކަށް އަވަސް ހައްލެއް ހޯދުމަށްޓަކައި މިނިސްޓްރީން މަސައްކަތް ކުރަމުންދާ ކަމަށެވެ. މިކަމަށް ހައްލެއް ހޯދެންދެން ވެސް ދަރިވަރުންގެ ކިޔެވުން މެދުނުކެނޑި ކުރިއަށް ގެންދަންޖެހޭ ކަމަށާއި، 700ށްވުރެ ގިނަ ދަރިވަރުންގެ ކިޔެވުން މެދުނުކެނޑި ކުރިއަށް ގެންދެވޭނީ ސްކޫލެއް ހިންގުމަށް އިމާރާތްކޮށްފައި ހުރިތަނެއްގައި ކަމަށް މިނިސްޓްރީން ބުނެފައިވެއެވެ. އަދި ވަސީލަތްތައް ވެސް ހުންނަންޖެހޭ ކަމަށެވެ.
މިކަންތައްތަކަށް ރިއާޔަތްކޮށް ތިން ކަމެއް ކުރުމަށް މިނިސްޓްރީން ވަނީ ނިންމާފައެވެ. އެގޮތުން އަރަބިއްޔާ ސްކޫލްގެ ދަރިވަރުންގެ ކިޔެވުން ވަގުތީގޮތުން އިއްޒުއްދީން ސްކޫލަށް ބަދަލުކުރަން އެޑިއުކޭޝަން މިނިސްޓްރީން ވަނީ ނިންމާފައެވެ. އަދި މިހާރު ހުޅުމާލޭގައި އިމާރާތް ކުރަމުންދާ ސްކޫލްތަކުގެ ތެރެއިން، އެއް ސުކޫލް އަރަބިއްޔާއަށް ޚާއްސަ ކުރުމަށް ވެސް ނިންމާފައިވެއެވެ. މީގެ އިތުރުން މިހާރު އަރަބިއްޔާ ސްކޫލް ހިންގާ އިމާރާތުގެ ސްޓްރަކްޗަރަލް އެސެސްމެންޓް ނިމުމުން، އެ އެސެސްމެންޓުގެ ރިކޮމެންޑޭޝަނާ އެއްގޮތަށް މައްސަލަތައް ހައްލުކުރާނެ ކަމަށް ވެސް އެޑިއުކޭޝަން މިނިސްޓްރީން ބުނެފައިވެއެވެ. އެ އިމާރާތަކީ އަބަދުވެސް އަރަބިއްޔާ ސްކޫލަށް ޚާއްސަކޮށްފައިހުންނާނެ އިމާރާތެއް ކަމަށް މިނިސްޓްރީން ބުނެފައިވެއެވެ.
