ގައުމީ ބިލިއާޑް މުބާރާތުގެ ޗެމްޕިއަންކަން އީގަލްސްއަށް

ރާއްޖޭގައި ފުރަތަމަ ފަހަރަށް ބޭއްވި ގައުމީ ބިލިއާޑް މުބާރާތުގެ ޓީމު އިވެންޓްގެ ޗެމްޕިއަންކަން ހޯދައި ރައީސުލްޖުމްހޫރިއްޔާގެ ވާދައިގެ ތަށި ކުލަބު އީގަލްސް އުފުލާލައިފިއެވެ.

މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ) އިން އިންތިޒާމުކުރި މި މުބާރާތަކީ ރާއްޖޭގައި ބޭއްވި އެންމެ އަގުބޮޑު ބިލިއާޑް މުބާރާތެވެ. "ލިޓަސް ގައުމީ ބިލިއާޑް ޗެމްޕިއަންޝިޕް 2021" ގެ ނަމުގައި ކުރިއަށްދިޔަ މި މުބާރާތުގައި ޖުމްލަ ހަ އިވެންޓެއް ކުރިއަށްދެއެވެ. އެއީ ޓީމު އިވެންޓާއި، ފިރިހެން ފުރަތަމަ ޑިވިޝަނާއި، ފިރިހެން ދެވަނަ ޑިވިޝަނާއި، އަންހެން ޑިވިޝަނާއި، ޑަބަލްސް އިވެންޓުގެ އިތުރުން މިކްސް ޑަަބަލްސްއެވެ.

މި މުބާރާތުގެ އެންމެ ފޯރިގަދަ އިވެންޓް ކަމަށްވާ ޓީމު އިވެންޓުގައި ފަސް ޓީމެއް ވަނީ ވާދަކޮށްފައެވެ. އެއީ އީގަލްސް އާއި، ކަސްޓަމްސް ރެކްރިއޭޝަން ކުލަބާއި، ބީޖީ ސްޕޯޓްސް އާއި، މާޒިޔާ ސްޕޯޓްސް އެންޑް ރެކްރިއޭޝަނުގެ އިތުރުން ދިވެހި ސިފައިންގެ ކުލަބެވެ.

ބުރާސްފަތި ދުވަހުގެރޭ ކުރިއަށްދިޔަ މި އިވެންޓުގެ ފޯރިގަދަ ފައިނަލް މެޗުގައި ކަސްޓަމްސް އަތުން އީގަލްސް މޮޅުވީ ސީދާ ތިން ގޭމުންނެވެ. އެގޮތުން ފައިނަލުގެ ޑަބަލްސް ކެޓެގެރީގެ ގޭމް އީގަލްސްއިން ކާމިޔާބުކުރީ 7-4 ފްރޭމުންނެވެ. އަދި އަނެއް ސިންގަލްސް ދެ ގޭމުގެ ތެރެއިން އެއް ގޭމް 7-4 ފްރޭމުން ކާމިޔާބުކުރިއިރު، އަނެއް ގޭމް އީގަލްސްއިން ކާމިޔާބުކުރީ 7-3 ފްރޭމުންނެވެ.

މި މަހުގެ އެއްވަނަ ދުވަހު ފެށި މި މުބާރާތޔގެ ނިމުމުގެ ރަސްމިއްޔާތު ބުރާސްފަތި ދުވަހުގެރޭ ގައުމީ ބިލިއާޑް ސެންޓަރުގައި ބޭއްވިއިރު، މި ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙެވެ. އީގަލްސް އާއެކު އެކި ކެޓެގެރީތަކުން ޗެމްޕިއަންކަން ހޯދި ކުޅުންތެރިންނަށް ރައީސް ވަނީ އިނާމު ހަވާލުކޮށްދެއްވާފައެވެ.

މި މުބާރާތުގެ ފިރިހެން އެއްވަނަ ޑިވިޝަންގެ ޗެމްޕިއަންކަން ހުސައިން ފަޔާޒް ހޯދިއިރު، އަންހެން ސިންގަލްސް ޗެމްޕިއަނަކީ ދީނާ އަޙްމަދެވެ. އަދި މިކްސް ޑަބަލްސް ޗެމްޕިއަންކަން ދީނާ އާއި އަލީ ފަޔާޒުގެ ޕެއާއިން ހޯދިއިރު، ފިރިހެން ޑަބަލްސް ޗެމްޕިއަނުންނަކީ ހުސައިން ފަޔާޒާއި އަލީ ޝާވިންގެ ޕެއާއެވެ. މީގެ އިތުރުން މި މުބާރާތުގެ ދެވަނަ ޑިވިޝަންގެ ސިންގަލްސް ޗެމްޕިއަންކަން ހޯދީ އައްބާސް ސައީދެވެ.

ރާއްޖޭގައި ބޭއްވި އެންމެ އަގުބޮޑު ބިލިއާޑް މުބާރާތުގެ ގޮތުގައި މި މުބާރާތް ފާހަގަކޮށްލެވޭއިރު، ޖުމްލަ ހަ ކެޓަގެރީއަކުން އެތުލީޓުން ވާދަކުރި މި ބާރާތުގެ އިނާމުގެ ގޮތުގައި ކަނޑައަޅާފައިވާ އަދަދު 150،000 (އެއް ލައްކަ ފަންސާސް ހާސް) އަށްވުރެ މައްޗަށް އަރައެވެ.