ވިލިނގިލީ މެޖިސްޓްރޭޓް ކޯޓުގެ ކުރީގެ މެޖިސްޓްރޭޓަށް ފިޔަވަޅު އަޅައިދިނުމަށް ޖޭއެސްސީން އެދިއްޖެ
15 ޑިސެމްބަރު 2021 | ބުދަ 19:04ފަނޑިޔާރުކަމުގެ ހައިސިއްޔަތު ނަހަމަ ގޮތުގައި ބޭނުންކޮށްގެން، ކަނޑައެޅިގެން ފާޅުކަން ބޮޑު ގޮތެއްގައި ގާނޫނާ ޚިލާފަށް ހިންގާފައިވާ ކަމެއް
ޖުޑީޝަލް ސަރވިސް ކޮމިޝަން
ވިލިނގިލީ މެޖިސްޓްރޭޓް ކޯޓުގެ ކުރީގެ މެޖިސްޓްރޭޓް އަހުމަދު ޝަކޫރަށް ފިޔަވަޅު އަޅައިދިނުމަށް ޖުޑީޝަލް ސަރވިސް ކޮމިޝަން (ޖޭއެސްސީ)ން އެދިއްޖެއެވެ.
ޖޭއެސްސީން ބުނީ، ވިލިނގިލީ މެޖިސްޓްރޭޓް ކޯޓުން ވިމަސް މޯލްޑިވްސް ޕްރައިވެޓް ލިމިޓެޑަށް ގާނޫނާ ޚިލާފަށް ފައިސާތަކެއް ދޫކުރިކަމަށް ބުނާ މައްސަލައެއް 2020 ވަނަ އަހަރުގެ އޮކްޓޯބަރު މަހު އެ ކޮމިޝަނަށް ހުށަހެޅުމުން، އެ މައްސަލަ ކޮމިޝަނުން ވަނީ ދިރާސާ ކޮށްފައިވާ ކަމަށެވެ.
އެ ކޮމިޝަނުން ކުރި ދިރާސާއަށް ފާހަގަވެފައިވާ ގޮތުގައި، އެ ކަމަކީ ވިލިނގިލީ މެޖިސްޓްރޭޓް ކޯޓުގެ ކުރީގެ މެޖިސްޓްރޭޓް އަހުމަދު ޝަކޫރު، ފަނޑިޔާރުކަމުގެ ހައިސިއްޔަތު ނަހަމަ ގޮތުގައި ބޭނުންކޮށްގެން، ކަނޑައެޅިގެން ފާޅުކަން ބޮޑު ގޮތުގައި ފަރުވާލެއް ނެތި ގާނޫނާ ޚިލާފަށް ހިންގާފައިވާ ކަމެއްކަން ވެސް ވަނީ ބުނެފައެވެ.
އަހުމަދު ޝަކޫރު ހިންގާފައިވާ ގާނޫނާ ހިލާފު އެ ކަންތައް ކޮމިޝަނަށް ފާހަގަވެފައި ވަނީ، ކޮމިޝަނުން ދިރާސާކުރި އެހެން ސުލޫކީ މައްސަލަތަކެއް އޭނާއާމެދު ސާބިތުވެ، މަގާމުން ވަކިކުރަން ރައްޔިތުންގެ މަޖިލީހަށް ހުށަހެޅުމަށް އެކޮމިޝަނުން ނިންމުމާ ގުޅިގެން، އަމިއްލައަށް މަޖިސްޓްރޭޓްކަމުގެ މަގާމުން އޭނާ ވަކިވެފައި ވަނިކޮށް ކަމަށް ޖޭއެސްސީން ވަނީ ފާހަގަކޮށްފައެވެ.
އެހެންކަމުން ކޮމިޝަނުން އެ މައްސަލާގައި ފާހަގަވި ކަންކަން ބަޔާންކޮށް، އެކަންކަން ބަލައި ފިޔަވަޅު އަޅައިދިނުމަށް އެދި އެންޓި ކޮރަޕްޝަން ކޮމިޝަނަށް 2021 ވަނަ އަހަރު ޖެނުއަރީ މަހު ވަނީ ހުށަހަޅާފައެވެ.
