ކޮންމެ ބަޔަކު ކުރިއަސް، ކުޑަކަމެކޭ ކިޔައި، ސްޓޭޖަށް އަރައި އެކަމަށް މި ސަރުކާރުން ހަޖޫ ނުޖަހާނެ ކަމަށް ނާއިބުރައީސް ފައިސަލް ނަސީމް ވިދާޅުވެއްޖެއެވެ.
އާދިއްތަ ދުވަހުގެ ރޭ އޮތް، ޏ. ފުވައްމުލަކު ގޮނޑުދޮށް ހިމާޔަތްކުރުމުގެ މަޝްރޫއުގެ އަމަލީ މަސައްކަތުގެ އެއްބަސްވުމުގެ ސޮއިކުރުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަ ދައްކަވަމުން ނާއިބުރައީސް ވިދާޅުވީ، ކޮންމެ ބަޔަކު ކުރިނަމަވެސް ރަނގަޅު ކަމެއް ވިޔަސް ގޯސް ކަމެއް ވިޔަސް މި ސަރުކާރުން އެކަން ބަލައިގަންނާނެ ކަމަށެވެ.
މި ސަރުކާރުން މަސައްކަތް ކުރަނީ ރަނގަޅު ޕްލޭނަކާއެކު ރައްޔިތުންނަށް އެންމެ ބޭނުންވާ ކަންކަން ބަލައިގެން ކަމަށް ވެސް އެމަނިކުފާނު ވިދާޅުވިއެވެ. އަދި މި ސަރުކާރަކީ ކުރާ ކަންތައްތައް ނޭނގި ކުރާ ބަޔެއް ނޫން ކަމަށާއި، އެނގިގެން މަސައްކަތްތައް ކުރިއަށް ގެންދާ ސަރުކާރެއް ކަމަށް ވެސް ނާއިބުރައީސް ވިދާޅުވިއެވެ.
ގައުމަށް ކޮންމެވެސް އިރަކުން ހަމަޖެހުން އަންނަން ޖެހޭ ކަމަށާއި، ތަނެއްގެ ފުރާޅު ނަގުމާއި ޓިނު ނެގުމަކީ ނާތަހުޒީބު މީހުން ހިންގާނެ އަމަލެއް ކަމަށް އެމަނިކުފާނު ވިދާޅުވިއެވެ. މި ސަރުކާރަކީ ރައްޔިތުންގެ ފައިސާގައި އަތްލައި، އެ ފައިސާ ނުހައްގުން ބޭނުން ކުރާނެ ސަރުކާރެއް ނޫން ކަމަށް ވެސް އެމަނިކުފާނު ވިދާޅުވިއެވެ.
މި މަޝްރޫއަކީ ފުވައްމުލަކަށް ނުހަނު ބޭނުންވެފައިވާ މަޝްރޫއެއްކަން ފާހަގަ ކުރައްވައި، ފުވައްމުލަކު ރައްޔިތުންނަށް އެންމެ ބޭނުންވެގެން ދިޔަ މަސައްކަތަކީ ބަނދަރުގެ މަސައްކަތް ކަމަށާއި ބަނދަރު ލިބުމާއެކު ރަށް ވަރަށް ބޮޑަށް ތަރައްގީވެގެން ދިޔަކަމަށް ނާއިބުރައީސް ވިދާޅުވިއެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހަކީ އަތޮޅުތެރޭގެ ރަށްތަކަށް ތަރައްގީ ގެނެސްދެއްވައި، އެކަމަށް އިންގިލާބީ ބަދަލެއް ގެނެސްދެއްވަމުންދާ ބޭފުޅެއް ކަމަށް ވެސް ފައިސަލް ވިދާޅުވިއެވެ. މި ސަރުކާރުން، އުތުރުން ފެށިގެން ދެކުނަށް މަޝްރޫއުތައް ކުރިއަށް ގެންދާކަން ފާހަގަކުރައްވައި ފައިސަލް ވިދާޅުވީ، ކޮވިޑުގެ ހާލަތުގައި ވެސް އެތައް މަޝްރޫއެއް ސަރުކާރުން ކުރިއަށް ގެންދިޔަ ކަމަށެވެ.
ކޮވިޑުގެ ހާލަތުގައި ވެސް ރައްޔިތުންނަށް ޚިދުމަތް ކުރުމުގައި ރައީސް ސާލިހް ކުރެއްވި މަސްކަތްޕުޅު ގާތުން ފެނިވަޑައިގަތް ކަމަށާއި، އެމަނިކުފާނަކީ ރައްޔިތުންގެ ރައީސެއް ކަމަށް ފައިސަލް ވިދާޅުވިއެވެ. ކުދި ރަށްތައް ވެސް ދަންނަ ވެރިޔެއް ހޯދަން ޖެހޭ ކަމަށާއި، ލާމަޒުކަޒީ ނިޒާމު ދަންނަ ވެރިޔެއް ހޯދަން ޖެހޭ ކަމަސް ވިދާޅުވެ، އަދި އެ ރައީސްއަކީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ކަމަށް ވިދާޅުވިއެވެ.
މުޅި ފުވައްމުލަކު ސިޓީއަށް ބަލައިލިނަމަވެސް ތަރައްގީގެ ގިނަ މަޝްރޫއުތައް ސަރުކާރުން ކުރިއަށް ގެންދާކަން ފާހަގަކުރައްވައި ފައިސަލް ވިދާޅުވީ، ސަރުކާރުން ރާއްޖޭގެ އެކި ހިސާބުތަކުގައި ވަރަށް ގިނަ ތަރައްގީގެ މަޝްރޫއުތައް ކުރިއަށް ގެންދާ ކަމަށެވެ. މި ސަރުކާރު އެންމެ އިސްކަންދޭ ކަމަކީ މީހުން ބިނާކުރުން ކަމަށާއި، މި ސަރުކާރުން ކުރާ ކަންތައްތަކުގެ ވާހަކަ ދައްކާ ހުސްނުވާނެ ކަމަށް ފައިސަލް ވިދާޅުވިއެވެ.
