ޏ. ފުވައްމުލަކު ގޮނޑުދޮށް ހިމާޔަތް ކުރުމުގެ މަޝްރޫއުގެ އަމަލީ މަސައްކަތުގެ އެއްބަސްވުމުގައި ސޮއިކުރުމުގެ ރަސްމިއްޔާތު ބާއްވައިފިއެވެ.

އާދިއްތަ ދުވަހުގެ ރޭ ބޭއްވި ރަސްމިއްޔާތެއްގައި ޕްލޭނިންގ މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ ޕްލޭނިންގ މިނިސްޓްރީގެ ޕަރމަނަންޓް ސެކެޓްރީ ޒީނިޔާ އަހްމަދު ހަމީދެވެ. މި މަޝްރޫއުގެ ކޮންޓްރެކްޓަރ އެމްޓީ ހޯގާޑް މޯލްޑިވްސް ޕްރައިވެޓް ލިމިޓެޑްގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ ޕަރ ވިންތަ ލާސަންއެވެ.

މި މަޝްރޫއު އިފްތިތާހު ކޮށްދެއްވީ ޕްލޭނިންގ މިނިސްޓަރ މުހައްމަދު އަސްލަމާއި ނެދަލޭންޑްސްއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޓާންޔާ ގޮންގްރިޖްއެވެ.

ރަސްމިއްޔާތުގައި ވާހަކަ ދައްކަވަމުން ޕްލޭނިންގ މިނިސްޓަރ ވިދާޅުވީ، މި މަޝްރޫއުގެ ވާހަކަ އެންމެ ފުރަތަމަ ދެކެވެން ފެށީ 2009 ވަނަ އަހަރު ކަމަށެވެ. 2012 ވަނަ އަހަރު އެ ކުންފުންޏަށް ޕްރޮޕޯޒަލެއް ފޮނުވި ކަމަށް ވެސް ވިދާޅުވިއެވެ.

މި މަޝްރޫއުގެ އަމަލީ މަސައްކަތް ފެށުމުގެ ވާހަކަ ދެކެވޭތާ 10 އަހަރުވެފައިވާކަން ފާހަގަކުރައްވައި އަސްލަމް ވިދާޅުވީ، މި ޒާތުގެ ކަންކަން ކުރުމުގެ ކުރިން ޔޫރަޕްގެ ގައުމުތަކުން ވަރަށް ބޮޑަށް ބަލާ ކަމަށެވެ. އެގޮތުން ރައްޔިތުންނަށް ނަފާ ލިބުމާއި، ތިމާވެށީގެ ގޮތުން ވެސް ބަލަންޖެހޭ ކަންތައްތައް ހުންނާނެ ކަމަށާއި، އެ ގައުމެއްގެ ސިޔާސީ މަޝްރަހު އޮންނަ ގޮތް ވެސް ޔޫރަޕްގެ ގައުމުތަކުން ބަލާ ކަމަށެވެ.

ޔޫރަޕްގެ ގައުމުތަކުން ރާއްޖެއަށް އެހީ ދިނުމުގައި އެ ގައުމެއްގައި ސިޔާސީ މަޝްރަހު ރަނގަޅު ނޫން ކަމަށްވާނަމަ އެހީތެރިކަން ފޯރުކޮށްދިނުމަށް އެ ގައުމުތަކުން ފަހަތު ފަޔަށް ބުރަވާ ކަމަށް ވެސް އަސްލަމް ވިދާޅުވިއެވެ. އެހެންކަމުން މި މަޝްރޫއު ވެސް ލަސްވެގެން ދިޔަކަމަށް އަސްލަމް ވިދާޅުވިއެވެ.

މި މަސައްކަތް ފަށަނީ ބާރު ސްޕީޑުގައި ކުރިއަށްދާނެކަން ފާހަގަކުރައްވާ އަސްލަމް ވިދާޅުވީ ބަނދަރުގައި 2.6 ކިލޯމީޓަރުގެ ތޮށި މި މަޝްރޫއުގެ ދަށުން ލެވިގެންދާނެ ކަމަށެވެ. އަދި މިއީ ސަރުކާރުން ފަށާނެ ބިޔަ މަޝްރޫއެއް ކަމަށާއި 234 މަޝްރޫއެއްގެ އަމަލީ މަސައްކަތް މިހާރު ވެސް ކުރިއަށްދާ ކަމަށް އަސްލަމް ވިދާޅުވިއެވެ.

738 މިލިއަން ރުފިޔާގެ ގޮނޑުދޮށް ހިމާޔަތް ކުރުމުގެ މަސައްކަތް ސަރުކާރުން ކުރިއަށް ގެންދާ ކަމަށް ވިދާޅުވިއެވެ. ރާއްޖެއަކީ މިހާރު ފަގީރު ގައުމުތަކުގެ ލިސްޓުން ކެނޑި، ތަރައްގީވަމުން އަންނަ ގައުމުގެ ލިސްޓަށް އަރާފައިވާ ކަމަށް މިނިސްޓަރ ވިދާޅުވިއެވެ. އަދި ތަރައްގީވެފައިވާ ލިސްޓަށް ރާއްޖޭގެ ނަން އަރަންދެން މަސައްކަތް ކުރިއަށް ގެންދަވާނެ ކަމަށް ވިދާޅުވިއެވެ.    

މި މަޝްރޫއަކީ 300 މިލިއަން ރުފިޔާގެ މަޝްރޫއަކަށްވާއިރު، މި މަޝްރޫއަށް ފަންޑު ކުރަނީ ދިވެހި ސަރުކާރާއި ނެދަރލެންޑްސްގެ އިންވެޓްސް އިންޓަރނޭޝަނަލްއާ ކުވައިތު ފަންޑް ފޯރ އެރެބް އިކޮނޮމިކް ޑިވެލޮޕްމަންޓުންނެވެ.

މި މަޝްރޫއުގެ މަސައްކަތް 606 ދުވަހުގެ ތެރޭގައި ނިންމާ ގޮތަށް ވަނީ ހަވާލުކޮށްފައެވެ.

2003 ވަނަ އަހަރުން ފެށިގެން، ރަށްގިރުމުގެ މައްސަލަ އިތުރުވިމަށް އެ ރަށު ކައުންސިލުން ވަނީ ފާހަގަކޮށްފައެވެ.