އެތަނަށް ވެއްދުމަށްފަހު ދެން ނެރެން ޖެހެނީ އެމީހާގެ ސަންދޯއް

ގިނަ ފަހަރަށް މި ކުޑަ މުޖުތަމައަށް ބަލާލިޔަސް އެކަކު އަނެކަކާމެދު އިހުމާލުވާތަން އެބަ ފެނިގެންދެއެވެ. ގިނަ ގުޅުންތަކަށް ބަލައިލިޔަސް ވާ އިހުމާލެއްގެ ބޮޑުކަމުން އެ ގުޅުމުގައި ކޮންމެވެސް އެކަކަށް ހިތާމަޔާ ކުރިމަތިލާން ޖެހެއެވެ. ދުނިޔޭގެ ބާކީ ދުވަސްތައް ވޭނުގައި ތަހައްމަލު ކުރަން ޖެހެއެވެ.

މުސްކުޅި މައިންބަފައިންނަކީ އެއްވެސް ބަޔެކޭ ހީނުކުރެވޭ ފަހަރުވެސް އާދައެވެ. އެމީހުންނަށް ދަރިންގެ އަޅާލުމާއި އޯގާތެރިކަން އެންމެ ބޭނުންވާ ދުވަހު އެމީހުން ބާކީކޮށް، ނިކަމެތިކޮށް، އެއްލާލައެވެ. މިއަދު އެމީހުން އުމުރުން ދުވަސްވެ، ގައިގެ ބާރު ދެރަވެ، އެނދުމަތިވި ނަމަވެސް އެމީހުންވެސް އެހިސާބަށް ގޮސް އެތިބީ ޒުވާން އުމުރަކަށް ފަހުގައެވެ.

ހަގީގަތަށް ބުނާނަމަ އިސް ރަށްވެހިންނަކީ ކޮންމެ ގައުމެއްގެވެސް އަގުބޮޑު ރައުސްމާލެކެވެ. މާޒީއަކީ މުސްތަގުބަލުގެ މޫނުބަލާ ލޯގަނޑޭ ބުނާ ބީދައިން އެމީހުންގެ ތަޖުރިބާއަކީ މިއަދުގެ ޖީލުތައް ބިނާ ކުރުމަށް ނުހަނު އަގުބޮޑު އެއްޗެއްވެސް މެއެވެ.

އެހެންނަމަވެސް މި ރައުސްމާލާ ދޭތެރޭ ފަރުވާ ކުޑަކުރެވޭތަން އެބައާދެއެވެ. އަޅާނުލެވޭ ތަން އެބައާދެއެވެ. ކުޑައިރު އިނގިލީގައި ހިފައިގެން އެމީހުން އަހަރުމެންނަށް މަގު ދައްކައެވެ. މަގުން ކައްސާލައިފިނަމަ ހެޔޮ މަގަށް އަނބުރާ ރުޖޫއަވަންދެން، އަލިމަގު ދައްކާ އެމަގަށް ދިޔުމަށް ހިތްވަރުދެއެވެ. އެކަމަކު މިއަދު އެމީހުން އަހަރުމެންގެ އިނގިލީގައި ހިފަން ބޭނުންވުމުން، އެ އިނގިލި ދިއްކޮށް ނުލެވޭތާ އެމީހުން ދުނިޔޭގެ ދިރި ތިބިތޯވެސް ބަލާނުލެވެއެވެ. އެމީހުން މަރުވުމަށްފަހު ވަޅުލުމުން ތިންމުށް ވެލި ލާންވެސް ނުދެވޭ މީހުން އެބައުޅެއެވެ. އެކަމަކު ތަރިކަ މުދަލުން ބައި ހޯދަން ވުމުން ކޯޓުގެ ދޮރުމައްޗަށް އެބަ ދެއެވެ. މިއީ ލަދުގަންނަން ޖެހޭ ކަމެކެވެ.

އެމީހުންނާމެދު ވެވޭ އިހުމާލު ބޮޑެވެ. އިސް ރަށްވެހިން ބާކީ ކޮށްލެވޭތަން އެބަ އާދެއެވެ. އެމީހުންގެ އުމުރު މައްޗަށް ދިޔުމުން އުމުރުގެ ދެން ބާކީ އޮތް ބައިގައި ވެސް އެމީހުން ބެލުމަކީ ބޮޑު ވޭނަކަށް ވެގެންދެއެވެ. ގިނަފަހަރަށް ސަރުކާރުން އެމީހުންނަށް ދޭ ފައިސާގެ ދަހިވެތި ކަމުގައި އެމީހުންނަށް ގޭގެ ކުޑަކޮޓަރިން ޖާގަ ދޭ ތަން ވެސް އެބަ ފެނެއެވެ. މިގޮތަށް އެމީހުންނަށް ލިބޭ ފައިސާގައި އެމީހުން ގެންގުޅޭއިރު ވެސް އެމީހުންނާއި ހިނިތުންވުމަށް ފަހު ހިތްހެޔޮކަމާއެކު ބަހެއް ނުބުނެވޭތާ، ބުނެލާ ރަހުމްކުޑަ ބަސްތަކުން އެމީހުންގެ އަޖަލު އަވަހަށް ޖެހިގެންދާނެ ނަމައޭ ހިތަށް އަރާ މީހުން ވެސް މަދެއް ނޫނެވެ. ދެ ފަހަރު އެއްކަމަކު އެމީހުން ބުނެފިނަމަ ކުނި މޫނު ދައްކައިގެން، އެއްތައް ހާސަރުތަކެއް ދެމުމަށްފަހު ނޫނީ އެބުނާ ކުޑަ ކަންތައް ވެސް ކޮށްދެވެނީ މަދު ފަހަރަކުއެވެ.

އެމީހުން ބަލަން ބޮޑު ވޭނަކަށް ވެގެން ސަރުކާރަށް ނަގާ މީހުންގެ އަދަދު ވެސް މަދެއް ނޫނެވެ. އެގޮތުން ޚާއްސަ އެހީއަށް ބޭނުންވާ މީހުންގެ މަރުކަޒަށް އިހުމާލުވެގެން ނަގާ މީހުންނާއި އާއިލާއިން ނުބަލައިގެން އެތަނަށް ނަގާ މީހުންގެ އަދަދު ގިނައެވެ. ގިނަ ފަހަރަށް އެތަނަށް އެމީހާ ލުމަށްފަހު، އެމީހާގެ ހާލު ބަލާކަށް ގުޅާ ވެސް ނަހަދައެވެ. އެމީހާ އެދިގެން އާއިލާއަށް ގުޅަން މަސައްކަތް ކުރިޔަސް ގިނަ ފަހަރަށް ގުޅޭތަނެއް ނާދެއެވެ. ގިނަފަހަރަށް މަރުކަޒަށް ލުމަށްފަހު އާއިލާއިން ހަވާލުވާ މީހުންގެ އަދަދު މަދުކަމަށް ވެސް ސަރުކާރުން ބުނެއެވެ.

ސަރުކާރުން ބުނާގޮތުން ނަމަ ޚާއްސަ އެހީއަށް ބޭނުންވާ މީހުންގެ މަރުކަޒަށް އެމީހާ ވެއްދުމަށްފަހު ދެން ނެރެން ޖެހެނީ އެމީހާގެ ސަންދޯކެވެ. މިއީ ނުހަނު ހިތާމަވެރި އަދި ލަދުގަންނަން ޖެހޭ ކަމެކެވެ. މިއަދު މައިންބަފައިންނާއި ދޭތެރޭގައި ވާ އިހުމާލަކުން، މާދަމާ ތިމާގެ ސަންދޯއް އެހާލަތުގައި ނެރެން ނުޖެހޭނެކަން އެނގެނީ ކިތައް މީހުންނަށް ބާވައެވެ؟