ގަތަރަކީ ހަމަޖެހުން ގާއިމުކުރުމަށް މަސައްކަތް ކުރުމުގައި ނަމޫނާ ގައުމެއް: ޝާހިދު
9 ޑިސެމްބަރު 2021 | ބުރާސްފަތި 02:11ގައުމުތަކުން އެހީތެރިކަން ބޭނުންވި ކޮންމެ ހިނދެއްގައި ގަތަރުން އެހީތެރިކަން ފޯރުކޮށްދީފައިވޭ
އދ. ގެ އާންމު މަޖިލީހުގެ ރައީސް އަދި ރާއްޖޭގެ ފޮރިން މިނިސްޓަރ އަބްދުﷲ ޝާހިދު
ގަތަރަކީ ގައުމުތަކުގެ މެދުގައި ހަމަޖެހުން ގާއިމުކުރުމަށް މަސައްކަތް ކުރުމުގައި ނަމޫނާ ގައުމެއް ކަމަށް އދ. ގެ އާންމު މަޖިލީހުގެ ރައީސް އަދި ރާއްޖޭގެ ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.
ގަތަރުގެ ގައުމީ ދުވަހާއި އދ. ގައި ބައިވެރިވިތާ 50 އަހަރު ފުރުން ފާހަގަ ކުރުމަށް ބޭއްވި ޚާއްސަ ހަފްލާގައި ވާހަކަފުޅު ދައްކަވަމުން ޝާހިދު ވިދާޅުވީ ސަރަހައްދީ ބައިވެރިއެއްގެ ހައިސިއްޔަތުން މައްސަލަތައް ހައްލުކުރުމަށް މެދުވެރިއެއްގެ ރޯލު ގަތަރުން އަދާކުރާ ކަމަށެވެ. އަދި ގައުމުތަކުގެ މެދުގައި ހަމަޖެހުން ދެމިއޮތުމަށް މަސައްކަތް ކުރާ ކަމަށް ވިދާޅުވިއެވެ.
ގައުމުތަކުން އެހީތެރިކަން ބޭނުންވި ކޮންމެ ހިނދެއްގައި ގަތަރުން އެހީތެރިކަން ފޯރުކޮށްދީފައިވާކަން ފާހަގަކުރައްވައި ޝާހިދު ވިދާޅުވީ މުޅިއެކު 115 ގައުމަކަށް އެހީތެރިކަން ފޯރުކޮށްދޭ އިނޮވޭޝަން ލެބްސް އަކީ މިއަދުގެ ޖީލަށާއި އަންނަން އޮތް ޖީލަށް އަމާޒުކޮށް ގަތަރުން ހަދާފައިވާ ފްރޭމްވޯކަށް ވާސިލް ވުމަށް އެޅުނު މުހިންމު ފިޔަވަޅެއް ކަމުގައެވެ.
މި ލެބް މެދުވެރިކޮށް ދެމެހެއްޓެނިވި ތަރައްގީގެ ލަނޑުދަނޑިތަކަށް ވާސިލްވުމަށް މަގުފަހިވެގެންދާނެ ކަމަށާއި އެއިން ޑޭޓާތައް ލިބޭނެ ކަމަށް ވެސް ޝާހިދު ވިދާޅުވިއެވެ.
އުފެއްދުންތެރި އީޖާދީ ކަންތައްތަކަށް ގަތަރުން އިންވެސްޓް ކުރަމުންދާތީ ޝާހިދު ވަނީ އެކަން ފާހަގަކުރައްވައި ތައުރީފު ކުރައްވާފައެވެ. މީގެ އިތުރުން ކޮވިޑުގެ މި ހާލަތުގައި ބައިނަލްއަގުވާމީ ވެކްސިނޭޝަން ޕްރޮގްރާމަށް ގަތަރުން ދޭ އެހީތެރިކަން ފާހަގަކުރައްވައި އެކަމަށް ވެސް މަރުހަބާ ވިދާޅުވެފައިވެއެވެ.
