ޕާކިން ސްލޮޓުގެ ގުރުނެގުމުގެ މައްސަލަ ބެލުމާމެދު އަދި ވަކި ގޮތެއް ނުނިންމަން: އޭސީސީ
8 ޑިސެމްބަރު 2021 | ބުދަ 08:30މި ސްލޮޓަކީ އެ އުޅަނދެއް ދެމިއޮތްހާ ހިނދަކު އޮންނާނެ ސްލޮޓެއް
އޭސީސީ- ވަރަށް އަވަހަށް އެ މައްސަލަ ބެލުމާއިމެދު ގޮތެއް ނިންމާނެކަން އޭސީސީން ފާހަގަކުރޭ
ޕާކިން ސްލޮޓުގެ ގުރުނެގުމުގެ މައްސަލަ އެންޓި ކޮރަޕްޝަން ކޮމިޝަން (އޭސީސީ)އަށް ހުށައަޅާފައިވާއިރު، އެ މައްސަލަ ބެލުމާއި މެދު އަދި ވަކި ގޮތެއް ނުނިންމާކަމަށް އެ ކޮމިޝަނުން ބުނެފިއެވެ.
މާލެ ސިޓީ ކައުންސިލުން އިއުލާނު ކޮށްފައިވާ ޕާކިން ސްލޮޓްތަކުގެ ގުރުއަތުލުން ބާއްވާފައިވާއިރު, މި ގުރުލުން ކުރިއަށް ދިޔަ ގޮތާމެދު ވަރަށް ގިނަ ބަޔެއްގެ ހިތުގައި ވަނީ ސުވާލު އުފެދިފައެވެ. އަދި ޕާކިން ސްލޮޓްތަކުގެ ގުރުނެގުން ކުރިއަށް ގެންދިޔަ އުސޫލާމެދު ވެސް ހިތްހަމަޖެހުންތަކެއް ވަނީ އުފެދިފައެވެ. އެގޮތުން 211 ސްލޮޓަށް 969 މީހަކު ކުރިމަތިލާފައިވާއިރު މި ސްލޮޓްތަކަށް ކުރިމަތިލި ކޮންމެ ފަރާތަކަށްވެސް ސްލިޕެއް ހަވާލުކުރި ކަމަށް މާލެ ސިޓީ ކައުންސިލުން ވަނީ ބުނެފައެވެ. ގުރުއަތު ނެގުމަށް ބޭނުންކޮށްފައިވަނީ ސްލިޕް ނަންބަރު ކަމަށް ވެސް އެ ކައުންސިލުން ވަނީ ބުނެފައެވެ.
ބައެއް މީހުންނަށް ސްލިޕް ދޫކުރިއިރު ފޯމް ނަންބަރު ކައުންސިލުގެ ފަރާތުން ޖަހާފައި ނެތް މައްސަލަ ވެސް ވަނީ ފެންމަތިވެފައެވެ. އަދި މިފަދަ ގިނަ ސްލިޕްތަކެއް ވަނީ ސޯޝަލް މީޑީއާގައި ދައުރުވެފައެވެ. މިކަމާއި ގުޅިގެން މާލެ ސިޓީގެ ޑެޕިއުޓީ މޭޔަރ އަހުމަދު ނަރީޝް ވިދާޅުވީ, ނަންބަރުތައް ނެތް ސްލިޕް ހުރެދާނެ ކަމަށެވެ.
އެކަމާ ގުޅޭގޮތުން ރާއްޖެއެމްވީން ސުވާލު ކޮށްލުމުން އޭސީސީގެ މީޑިއާ އޮފިޝަލު ވިދާޅުވީ، އެ މައްސަލަ ބެލުމާއި މެދު އަދި ވަކި ގޮތެއް ނުނިންމަވާ ކަމަށެވެ. އެ މައްސަލަ ދިރާސާ ކުރަމުންދާކަމަށް އޭނާ ވިދާޅުވިއެވެ. އަދި ވަރަށް އަވަހަށް އެ މައްސަލަ ބެލުމާއިމެދު ގޮތެއް ނިންމަވާނެކަންވެސް ފާހަގަ ކުރެއްވިއެވެ.
މި ސްލޮޓްތަކާ ގުޅޭގޮތުން މާލެ ސިޓީގެ މޭޔަރ ޑރ. މުހައްމަދު މުއިއްޒު ވިދާޅުވީ، މާލެ ސިޓީ ކައުންސިލާއި އެ ސްލޮޓް ލިބޭ ފަރާތަކާމެދު ހެދޭ އެއްބަސްވުމެއްގެ ދަށުން، އެ ސްލޮޓަކީ އެ ވެހިކަލްގެ ގަރާޖުގެ ގޮތުގައި ކަނޑައެޅިގެންދާނެ ކަމަށެވެ. އަދި މިގޮތަށް ކަނޑައެޅުމަށް 25،000ރ. ކުލީގެ ގޮތުގައި ނަގާނެ ކަމަށް ޑރ. މުއިއްޒު ވިދާޅުވިއެވެ.
އޭގެ އިތުރުން، މި ސްލޮޓަކީ އެ އުޅަނދެއް ދެމިއޮތްހާ ހިނދަކު އޮންނާނެ ސްލޮޓެއް ކަމަށާއި، އެއީ މުސްތަގުބަލުގައި ހަދާ ޕާކިންގ ސްލޮޓަކުން ކަމަށް ވިޔަސް އެމީހަކަށް އެ ސްލޮޓް ކަށަވަރުވެފައި އޮންނާނެ ކަމަށް ޑރ. މުއިއްޒު ވިދާޅުވިއެވެ.
