ދުނިޔޭގެ ފިތުނަތަކަކީ އީމާންކަން ބަލިކަށިވާ ކަމެއް، އެފަދަ ކަންކަމުން ދުރުވޭ: ޚުތުބާ
3 ޑިސެމްބަރު 2021 | ހުކުރު 08:37އީމާންކަން ބަލިކަށިވުމުގެ ސަބަބުތަކުގެ ތެރޭގައި ނުބައިކަންތަކަށް ގޮވާލުމާއި ޖާހިލުކަން ހިމެނޭ
އިސްލާމީ މަރުކަޒުގައި ހުކުރު ނަމާދު ކުރުމަށް ޖަމާއަތް ހަދައިގެން،
ދުނިޔެއާއި ދުނިޔޭގެ ފިތުނަތަކަކީ އީމާންކަން ބަލިކަށިވާ ކަމެއް ކަމަށާއި، އެފަދަ އެންމެހައި ކަންކަމުން ދުރުވުމަށް ހުކުރު ޚުތުބާގައި ގޮވާލާއިފިއެވެ.
އީމާންކަން ހަރުދަނާކުރުން މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ހުކުރު ޚުތުބާގައި ބުނީ އީމާންކަމަކީ، އިންސާނާގެ ހަޔާތުގައި، ވަރަށް މުހިއްމު ކަމެއް ކަމަށެވެ. އިސްލާމީ އަގީދާގައި އީމާންކަމަކީ، ވަކި ވަކި ކަންތައްތަކެއް ހިތުން ތެދުކޮށް ގަބޫލުކުރުމާއި، ދުލުން ކިޔައި، އިގްރާރުވުމާއި، އަމަލު ކުރުންކަން ފާހަގަކޮށް ޚުތުބާގައި ބުނީ އީމާންކަން ބިނާވެގެންވަނީ، ރަސޫލާ ގެންނެވި ހުރިހާ ކަމެއް ހިތުން ތެދުކޮށް ގަބޫލުކުރުމާއި، ޝަހާދަތުގެ ދެކަލިމަ ދުލުން ކިޔައި، އިގުރާރުވެ، އީމާންވުމާއި، ގުނަވަންތަކުން ކުރެވޭ އަމަލުތަކުގެ މައްޗަށް ކަމަށެވެ. ޚުތުބާގައި ބުނީ އީމާންކަމަކީ ހަމައެކަނި ހިތުން ތެދުކުރުމެއް ނޫން ކަމަށާއި، ދުލުން އިގުރާރުވުމެއް ވެސް ނޫން ކަމަށެވެ. އަދި އީމާންކަން ފުރިހަމަވަނީ އަމަލު ކުރުމުން ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ ދުނިޔެއާއި ދުނިޔޭގެ ފިތުނަތަކަކީ އީމާންކަން ބަލިކަށިވުމުގެ ސަބަބުތަކުގެ ތެރޭގައި ހިމެނޭ މުހިއްމު އެއްސަބަބު ކަމަށެވެ. މާތްﷲގެ މަތިންނާއި، އާޚިރަތްދުވަހުގެ މަތިން ހަނދާން ނައްތާލައި، ދުނިޔެއަށް ދަހިވެތިވުމަކީ، އީމާންކަން ބަލިކަށިވާ ކަމެއް ކަމަށާއި ގުރްއާނުގެ ވަރަށް ގިނަ އާޔަތްތަކުގައި، މިކަން ބަޔާން ކުރައްވާފައިވާ ކަމަށް ޚުތުބާގައި ފާހަގަކޮށްފައިވެއެވެ.
މީގެ އިތުރުން ޚުތުބާގައި ބުނީ އީމާންކަން ބަލިކަށިވުމުގެ ސަބަބުތަކުގެ ތެރޭގައި، ނުބައިކަންތަކަށް ގޮވާލުމާއި ޖާހިލުކަން ހިމެނޭ ކަމަށެވެ. އިންސާނާގެ ނަފްސުގެ ތިން ބާވަތެއްވާކަން ފާހަގަކޮށް ޚުތުބާގައި ބުނީ އެއްބާވަތަކީ، އިންސާނާއަށް ނުބައި ކަންތައްތަކަށް ގޮވާލައި، މާތް ﷲ ހަރާމް ކުރައްވާފައިވާ ކަންތައްތަކާވީ ފަރާތަށް، އިންސާނާ ގެންދާ ނަފްސު ކަމަށެވެ.
ޚުތުބާގައި ބުނީ އީމާންކަމަކީ އިތުރުވެ އުނިވާ އެއްޗެއް ކަމަށެވެ. ހެޔޮ އަމަލުގެ ސަބަބުން އީމާންކަން އިތުރުވާކަމަށް ޚުތުބާގައި ފާހަގަކޮށްފައިވެއެވެ. އެގޮތުން ގުރުއާން ކިޔަވައި، އޭގެ އާޔަތްތަކާއި މެދު ވިސްނައި ފިކުރު ކުރުމަށް ޚުތުބާގައި ގޮވާލާފައިވެއެވެ.
