ރާއްޖޭގެ ކުނި މެނޭޖުކުރުމުގައި ވެމްކޯއިން ކުރަމުން އަންނަ މަސައްކަތްތަކަށް ރައްޔިތުންގެ ފަރާތުން ވަރަށް ބޮޑު އެއްބާރުލުމެއް ބޭނުންވާ ކަމަށް ވެމްކޯގެ މެނޭޖިންގ ޑިރެކްޓަރ އާދަމް މުހައްމަދު ވިދާޅުވެއްޖެއެވެ.

ރާއްޖެ ޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން އާދަމް ވިދާޅުވީ ވެމްކޯއިން ކުރަމުން އަންނަ މަސައްކަތްތަކަށް އާންމު ރައްޔިތުންނާއި ހުރިހާ މުއައްސަސާއެއްގެ ފަރާތުން ވަރަށް ބޮޑު އެއްބާރުލުމެއް ބޭނުންވާ ކަމަށެވެ.

އެގޮތުން ބިލަށް ފައިސާ ނުދައްކާ ފަރާތްތަކަށް ޚިދުމަތް ދިނުމުގައި ވެމްކޯއިން ގެންގުޅެމުން އައި އުސޫލު އިތުރަށް ހަރުކަށި ކުރެވިފައިވީ ނަމަވެސް އޭގެ ސަބަބުން ކުންފުންޏަށް ލިބޭ އާމްދަނީއަށް އައިސްފައިވަނީ ވަރަށް ކުޑަ ބަދަލެއް ކަމަށް އާދަމް ވިދާޅުވިއެވެ. އާދަމް ވިދާޅުވީ ރައްޔިތުންނާ މެދުގައި ހަރުކަށި އުސޫލުތަކެއް ގެންގުޅުމުގެ ބަދަލުގައި ވެމްކޯގެ އަމާޒަކީ ރައްޔިތުންނާ ގުޅިގެން ކުނީގެ މައްސަލައަށް ރަނގަޅު ހައްލެއް ގެނައުން ކަމަށެވެ.

ބިލަށް ފައިސާ ދެއްކުމުގެ އިތުރުންވެސް ރަށުތެރެ ސާފުކޮށް ބެލެހެއްޓުުގައި އާންމު ރައްޔިތުންގެ ފަރާތުން ވަރަށް ބޮޑު އެހީތެރިކަމެއް ބޭނުންވާކަން އާދަމް ފާހަގަކުރެއްވިއެވެ.

އަދި ރައްޔިތުންނަށް ދޭން ނުޖެހޭ ކަހަލަ މެސެޖުތަކެއް ބައެއް މުއައްސަސާތަކުގެ ފަރާތުން ދެމުން އަންނަކަން ފާހަގަކުރައްވައި އާދަމް ވިދާޅުވީ، ރައްޔިތުންނަށް ފައިދާވާ ގޮތަށް ހެދިފައިވާ ގާނޫނުތަކާއި ގަވައިދުތަކަށް އަމަލުކުރުމަށް ހުރިހާ ފަރާތަކުންވެސް ބާރުއެޅުން މުހިންމު ކަމަށެވެ. މީގެ އިތުރުން ވެމްކޯއިން ކުރަން ރާވާފައިވާ ބައެއް ކަންތައްތަކުގައި އެންވާރަމެންޓް ޕްރޮޓެކްޝަން އެޖެންސީއާ ޔޫޓިލިޓީ ރެގިއުލޭޓަރީ އޮތޯރިޓީން ސާފުކުރަން ބޭނުންވާ ބައެއް ކަންތައްތައް ހުރުމުގެ ސަބަބުން އެމަސައްކަތްތައް ކުރުމުގައި ލަސްތަކެއް ދިމާވެފައިވާކަން ފާހަގަކުރައްވާފައިވެއެވެ.

އާދަމް ވިދާޅުވީ ކޮވިޑް-19ގެ ސަބަބުން ވެމްކޯގެ ގާތްގަނޑަކަށް 40 އާއި 50 އާއ ދެމެދުގެ އަދަދަކަށް މުއައްޒަފުން ކެނޑިފައިވާ ކަމަށެވެ. މީގެ ސަބަބުން ވެމްކޯގެ މަސައްކަތްތައް ހިންގުމުގައި ދަތިތަކެއް ދިމާވި ނަމަވެސް އެކަންތައްތައް މިހާރު ހައްލުކުރެވިފައިވާ ކަމަށެވެ. ހަމައެހެންމެ ވެމްކޯގެ މަސައްކަތްތައް އިތުރަށް ހަރުދަނާ ކުރުމަށްޓަކައި މުވައްޒަފުން ކުރަމުން އަންނަ ބުރަ މަސައްކަތް އާދަމް ވަނީ ފާހަގަކުރައްވާފައެވެ.