ސްކްއިޑް ގޭމާ ހެދި މަރުގެ ހުކުމް!

ގިނަ މީހުންނަކީ އައު ސީރީޒެއް ނުވަތަ ފިލްމެއް ނުކުމެއްޖެނަމަ އެބަލާ ހިތްވާ މީހުންނެވެ. އެ ދުވަސްވަރެއްގައި އެންމެ ޓްރެންޑް ވެގެންދާ ނުވަތަ އާންމުންގެ ތެރޭގައި މަޤުބޫލު ފިލްމެއް ނުވަތަ ސީރީޒެއް ބެލުމުގެ ޝައުޤުވެރިކަން އިންތިހާއަށް އިތުރުވެގެންދެއެވެ.

ނެޓްފްލިކްސް އިން ގެނެސްދީގެން ބޮޑު ހިޓަކަށް ވެފައިވާ ދެކުނު ކޮރެއާގެ ސީރީޒް "ސްކްއިޑް ގޭމް" ގެ ވާހަކަ މުޅި ދުނިޔޭގައި މިހާރު ދަނީ ދައްކަމުންނެވެ. މި ސީރީޒަށް ވަރަށް ގިނަ ބައެއްގެ ތަރުހީބު ވެސް ވަނީ ލިބިފައެވެ.

ނެޓްފްލިކްސް އިން ސްޓްރީމް ކުރި ނުވަ އެޕިސޯޑްގެ ސީރީޒްގެ ޑައިރެކްޓަރު ހުވަންގް ޑޮންގް-ހީކް ބުނި ގޮތުގައި މިއީ ފަސޭހަ މަސައްކަތެއް ނޫނެވެ. "ސްކްއިޑް ގޭމް" އަކީ އޭނާ އަމިއްލަ އަށް ލިޔެ، ޕްރޮޑިއުސްކޮށް އަދި ޑައިރެކްޓް ވެސް ކުރި އެއްޗެކެވެ.

ހުވަންގް ބުނީ މި ސީރީޒަކީ އޭނާ ކުޑައިރު ކުޅުނު ގޭމަކާއި އޭރު ކުރަން ޖެހުނު އަމިއްލަ ތަޖުރިބާތަކެއްގެ މައްޗަށް ބިނާކޮށް ގެނެސްދިން އެއްޗެކެވެ. އަދި ސީރީޒްގެ މައިގަނޑު ދެ ކެރެކްޓާ ކަމަށްވާ ސިއަންގް ޖީ-ހޫން އާއި ޗޯ ސަންގް-ވޫ އަކީ ހުވަންގްގެ ކުޑައިރުން ފެށިގެން އެންމެ ގާތް ރައްޓެހިންގެ ނަންތަކެވެ.

އޭނާ ބުނި ގޮތުގައި "ސްކްއިޑް ގޭމް" އަކީ އެތައް ފިލާވަޅެއް ވެސް ލިއްބައިދޭ އެއްޗެކެވެ. އަދި މިއީ ނާކާމިޔާބު މީހުންނާ ބޮޑަށް ރިލޭޓްވާ އެއްޗެއް ކަމަށް ބުންޏެވެ.

މި ސީރީސް ބިނާ ކޮށްފައި އޮންނަނީ ފައިސާގެ ސަބަބުން ދިރިއުޅުމުގެ އެކި ހާލަތްތަކުގައި ދަތިތަކާއި ކުރިމަތިވެފައި ތިބި 456 މީހުން ވެގެން ބޮޑު ފައިސާގެ އިނާމެއް ލިބިގެންދާ ކުޑަކުދިން ކުޅޭ ގޭމް ތަކެއް ކުޅޭ ކުޅުމުގެ މައްޗަށެވެ. ކޮންމެ މީހަކުވެސް އެ ގޭމުން މޮޅުވާން މަސައްކަތް ކުރެއެވެ. އަދި އެ ގޭމުތަކުން ބަލިވާ ކޮންމެ މީހަކުވެސް މަރާލައެވެ. އެއް ވަނައަށް ދާ މީހަކަށް އުތުރު ކޮރެއާގެ 45.6 ބިލިއަން ވޮން ލިބެއެވެ.

އާންމުންގެ ތަރުހީބު މި ސީރީޒަށް ލިބިފައިވާއިރު އުތުރު ކޮރެއާގައި އަދިވެސް މި ސިރީޒް ދެއްކުން ވަނީ މަނާކޮށްފައެވެ. މިކަން މަނާކޮށްފައި އޮތްވާ ވެސް ދެކުނު ކޮރެއާގެ މީހަކު ވަނީ މި ސިރީޒްގެ ކޮޕީއެއް އެތެރެކޮށްފައެވެ. އޭނާ މި ސީރީޒް އެތެރެކޮށްފައިވަނީ ޔޫއެސްބީ ޑްރައިވްއެއްގައި ޗައިނާއިންނެވެ.

އެއާއެކު އެ ޤައުމުގެ ސަރުކާރުން ވަނީ އެމީހާއަށް މަރުގެ ހުކުމް އިއްވާފައެވެ. މި މީހާގެ އިތުރުން ވެސް މި ސިރީޒް ބެލި ހަ ސްކޫލު ކުއްޖަކަށް ވެސް ވަނީ އަދަބުތަކެއް ދީފައެވެ. މިދިޔަ އަހަރުގެ ޑިސެމްބަރުގައި އުތުރު ކޮރެއާ އިން ވަނީ ފިލްމާއި މިއުޒިކާއި ފޮތްތައް އެތެރެ ކުރުން މަނާ ކުރުމަށް ޤާނޫނެއް ވެސް ފާސްކޮށްފައެވެ.

ސީރިޒެއް ބެލުމަށްޓަކައި ކުރި މަސައްކަތުން މިއަދު އެމީހާއަށް ވަނީ މަރުގެ ހުކުމަކާއި ކުރިމަތިލާން ޖެހިފައެވެ. މިކަމާއި ގުޅިގެން ގިނަ ބަޔަކަށް ހައިރާންކަން ވަނީ ލިބިފައެވެ. ސްކްއިޑް ގޭމާ ހެދި މީހަކަށް މަރުގެ ހުކުމް އިއްވާފައިވާއިރު އުތުރު ކޮރެއާ އަކީ އަބަދުވެސް އެކި ކަންކަމުގައި ހަރުކަށި އުސޫލުތައް ގެންގުޅޭ ޤައުމެކެވެ.