ވ. ކެޔޮދޫއަށް އުފަން އުމުރުން 26 އަހަރުގެ ވޮލީބޯޅަ ކުޅުންތެރިޔާ އާދަމް ފައިރޫޒް ވޮލީ ކުޅެން ފެށީ 2013 ވަނަ އަހަރު އިންޓަ ރިސޯޓު ވޮލީބޯޅަ މުބާރާތުންނެވެ. އޭގެ ފަހުން ކޯޗުންގެ އިތުބާރު ހޯދާފައިވާ ފައިރޫޒަކީ ވޮލީގައި މިހާރުވެސް ވިދަމުން އަންނަ ތަރިއެކެވެ.
ރިސޯޓު ވޮލީ މުބާރާތުން ވޮލީގެ ތެރެއަށް ނުކުތް ފައިރޫޒަށް އޭނާ ކުޅުނު ފުރަތަމަ މުބާރާތަކީވެސް ކާމިޔާބު މުބާރާތެކެވެ. އެކަމަކު އޭނާ އެންމެ ބޮޑަށް ފާހަގަކުރާ ދެ ކާމިޔާބީއަކީ، 2015 ވަނަ އަހަރު ގައުމީ ޓީމުގައި ހިމެނި ރިހި މެޑަލް ހޯދުމާއި، 21 އަހަރުން ދަށުގެ މުބާރާތް ވީކޭއާއެކު ކާމިޔާބުކުރުމެވެ.
ގައުމީ ޓީމުގައި ހިމެނުމަކީ ކޮންމެ ކުޅުންތެރިއަކަށްވެސް ޝަރަފެކެވެ. ރާއްޖެޓީވީއަށް ދިން ހާއްސަ އިންޓަވިއުއެއްގައި ފައިރޫޒް ބުނީ ގައުމީ ޓީމުގައި ހިމެނުނު ފުރަތަމަ ދުވަހު އެކަން ގަބޫލުކުރަންވެސް ދަތިވި ކަމަށެވެ. އަދި ގައުމު ތަމްސީލުކުރަން ލިބުން އެއީ ލިބޭ ފަޚުރަކާއި ޝަރަފެއް ކަމަށާއި، އެހެންކަމުން އެކަމާ ވަރަށް ބޮޑަށް އުފާވި ކަމަށްވެސް ބުންޏެވެ.
ގައުމީ ޓީމުގައި ހިމެނުން އެއީ ލިބުނު ބޮޑު ހިތްހަމަޖެހުމެއް. ބުނެދޭންވެސް ނޭނގޭ ހިތްހަމަޖެހުމެއް ލިބުނު. ގައުމު ތަމްސީލުކުރަން ވިއްޔަ ލިބުނީ.ވޮލީ ކުޅުންތެރިޔާ އާދަމް ފައިރޫޒް
ފައިރޫޒުގެ ކެރިއަރުގައި މިހާތަނަށް އެންމެ ހިތްދަތިވި ދުވަހަކީ 2015 ވަނަ އަހަރުގެ ސެންޓްރަލް ޒޯން މުބާރާތުގެ ފައިނަލުގައި ތުރުކުމެނިސްތާން އަތުން ބަލިވި ދުވަހެވެ. ފައިރޫޒް ބުނީ ރާއްޖޭން ދެ ސެޓު ގެންގޮސް، ތައްޓާ ކައިރިއަށް ޖެހިފައިވަނިކޮށް ފަހަތުން އަރައި ތުރުކުމެނިސްތާނުން ތަށި ނެގުން އެއީ މިހާތަނަށް ވޮލީ ކެރިއަރުގައި އެންމެ ހިތްދަތިވި ދުވަސް ކަމަށެވެ.
ކެރިއަރުގައި އެންމެ އުފާވި އަދި އެންމެ ދެރަވި ދުވަހަކީވެސް 2015 ގެ ސެންޓްރަލް ޒޯން ފައިނަލް މެޗު. އުފާވީ ގައުމީ ޓީމާއެކު ފައިނަލެއްގައި ކުޅެން ލިބުމުން. ދެރަވީ ރާއްޖޭން ދެ ސެޓު ގެންގޮސްފައި އޮއްވަ ތުރުކުމެނިސްތާނުން ތިން ސެޓު ގެންގޮސްގެން މެޗު ނެގީ.ވޮލީ ކުޅުންތެރިޔާ އާދަމް ފައިރޫޒް
ފައިރޫޒުގެ މިހާރުގެ އަމާޒަކީ ގައުމީ ޓީމާއެކު ކާމިޔާބީއެއް ހޯދުމެވެ. ފައިރޫޒް ބުނީ ބަންގްލަދޭޝްގައި ކުރިއަށް އޮތް ސެންޓްރަލް ޒޯން މުބާރާތަށް ކުޅުންތެރިން ނުކުންނަނީ އެއް އަޒުމެއްގައި އެ މުބާރާތް ކާމިޔާބުކުރުމަށް ކަމަށެވެ. އަދި ކޮވިޑް-19 އާއެކު ކުޅުންތެރިންގެ ފިޓްނަސްއަށް ކޮންމެސް ވަރަކަށް އަސަރުތަކެއް ކުރި ކަމަށާއި، އެކަމަކު މުބާރާތުގެ ކުރިން އެކަން ހައްލުކުރެވޭނެ ކަމުގެ ޔަގީންކަން އެބައޮތް ކަމަށެވެ.
އަންނަ މަހުގެ 21 ވަނަ ދުވަހުން ފެށިގެން 29 ވަނަ ދުވަހުގެ ނިޔަލަށް ބަންގްލަދޭޝްގައި ސެންޓްރަލް ޒޯން ވޮލީބޯޅަ މުބާރާތް ބާއްވާއިރު، ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން މިހާރު ވަނީ 15 ކުޅުންތެރިންގެ ސްކޮޑެއް ފައިނަލް ކޮށްފައެވެ. ފައިރޫޒަކީ އެ ސްކޮޑުގައި ހިމެނޭ މުހިންމު ކުޅުންތެރިއެކެވެ.
ސެންޓްރަލް ޒޯން މުބާރާތަށް 12 ކުޅުންތެރިންގެ ސްކޮޑެއް ދާއިރު، މުބާރާތަށް ތައްޔާރުވާން ބަހްރޭނުގައި ކުރާ ކޭމްޕުގައި ބައިވެރިވާނީ މި ފަހަރު އެކުލަވާލި 15 ކުޅުންތެރިންގެ ސްކޮޑެވެ. އެހެންކަމުން މިހާރު އެކުލަވާލި ސްކޮޑުން އަދި ތިން ކުޅުންތެރިއަކު ބާކީވާނެއެވެ.
