މަސްވެރިންނަށް ހަމައަގު ލިބޭނީ ބާނާ މަސް ރާއްޖޭގައި ޕްރޮސެސްކުރެވިގެން: ފައުޒީ
ރާއްޖޭގައި މަސް ޕްރޮސެސްކުރެވޭނެ ނިޒާމަކަށް ދަނީ ތައްޔާރުވަމުން
މިފްކޯގެ މެނޭޖިންގ ޑައިރެކްޓަރ އިސްމާއީލް ފައުޒީ ރާއްޖެޓީވީގެ ފަލަސުރުޚީ ޕްރޮގްރާމުގައި
މަސްވެރިން ބާނާ މަހަށް ހަމަ އަގު ލިބޭނީ ބާނާ މަސް ރާއްޖޭގައި ޕްރޮސެސްކުރެވިގެން ކަމަށް މިފްކޯގެ މެނޭޖިން ޑައިރެކްޓަރ އިސްމާއީލް ފައުޒީ ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ފައުޒީ ވިދާޅުވީ، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ވައުދުފުޅާ އެއްގޮތަށް، ރާއްޖޭގައި ބާނާ މަސް ރާއްޖޭގައި ހިފެހެއްޓި، އެ ޕްރޮސެސްކުރެވޭނެ ނިޒާމަކަށް މިހާރު ތައްޔާރުވަމުންދާކަމަށެވެ. މި ނިޒާމު ގާއިމްކުރުމުގެ މަސައްކަތް މިހާރު ފެށިފައިވާކަމަށާއި، މި މަސައްކަތް ނިމޭއިރު ރާއްޖޭގައި ބާނާ މަސް އެހެން ގައުމުތަކަށް އެކްސްޕޯޓުކުރެވޭނީ ރާއްޖޭގައި ޕްރޮސެސްކުރެވިގެން ކަމަށް ފައުޒީ ވިދާޅުވިއެވެ.
މި ނިޒާމަށް ތައްޔާރުވުމަށް މިހާރުން ފެށިގެންވެސް ދުނިޔޭގެ ނަން މަޝްހޫރު ބްރޭންޑުތަކާ އެއްކޮށް މަޝްވަރާތައް ކުރަމުންދާކަމަށް ފައުޒީ ވިދާޅުވިއެވެ. އަދި އެމީހުންނަށް މަސް އެކްސްޕޯޓުކުރުމުގެ މަސައްކަތްވެސް ކުރަމުންދާކަމަށް ފައުޒީ ވިދާޅުވިއެވެ. އޭޝިއާ މާރކެޓުވެސް މީގެ ތެރޭގައި ހިމެނޭކަމަށް ފައުޒީ ވިދާޅުވިއެވެ.
މި ނިޒާމު ފަށައިގަނެވުމުން މަސްވެރިން ބާނާ މަހަށް ހަމަ އަގު ލިބޭނެ ކަމަށް ފައުޒީ ވިދާޅުވިއެވެ. މީގެ އިތުރުން ޔޫރަޕް މާކެޓުން ރާއްޖޭގެ އުފެއްދުންތަކަށް ޑިއުޓީ ނަގަން ފެށި ހިސާބުން ހަމަ އަގު ލިބުމަށް ދަތިވާކަމަށް ފައުޒީ ވިދާޅުވިއެވެ. އެހެންނަމަވެސް މިކަން ހައްލުކުރުމަށްވެސް ސަރުކާރުން މަސައްކަތްތަކެއް ކުރަމުންދާކަމަށާއި، މިކަމަށް ހައްލެއް ލިބޭއިރު، މަސްވެރިން ބާނާ މަހަށް ހަމައަގު ލިބިގެންދާނެ ކަމަށް ފައުޒީ ވިދާޅުވިއެވެ.
ފައުޒީ އިތުރަށް ވިދާޅުވި ފްކޯގެ ހަޔާތުގައި މަސްވެރިންނަަށް އެންމެ ގިނައިން ފައިސާ ދެވިފައިވާނީ 2019 ވަނަ އަހަރު ކަމަށެވެ. 2019 ވަނަ އަހަރު އެކުންފުންޏަށް 49،000 ޓަނުގެ މަސް ކިރާފައިވާކަމަށާއި، އެއަހަރު މަސްވެރިންނަށް ދިން އާމްދަނީ 903 މިލިއަން ރުފިޔާއާ ކައިރިކުރާނެ ކަމަށް ފައުޒީ ވިދާޅުވިއެވެ.
2020 ވަނަ އަހަރު، ކޮވިޑާއި ގުޅިގެން ހުރި ދަތިތަކާއެކުވެސް 48،000 ޓަނުގެ މަސް ކިރާފައިވާކަމަށް ފައުޒީ ވިދާޅުވިއެވެ. އެއަހަރު މަސްވެރިންނަށް ދިން އާމްދަނީ 898 މިލިއަން ރުފިޔާއަށް އަރާނެ ކަމަށް ފައުޒީ ވިދާޅުވިއެވެ. މިއަހަރުގެ މިހާތަނަށް 45،000 ޓަނުގެ މަސް ކިރާފައިވާކަމަށާއި، މަސްވެރިންނަށް ދިން އާމްދަނީ 698 މިލިއަން ރުފިޔާއަށް އަރާނެ ކަމަށް ފައުޒީ ވިދާޅުވިއެވެ.
