ހަގީގީ ތެދުވެރި ވެރިންނަކީ އެވިދާޅުވާ އެއްޗެއްގައި ހިއްޕަވައި އެކަން ހަގީގަތަކަށް ހެއްދެވުމަށް ބުރަ، އިޚްލާސްތެރި މަސައްކަތް ކުރައްވާ ފަރާތްތައް ކަމަށް ހޯރަފުށި ދާއިރާގެ މެމްބަރު އަޙުމަދު ސަލީމް ވިދާޅުވެއްޖެއެވެ.

ހޯރަފުށީ އެއަރޕޯޓަށް 1 އަހަރު ފުރުމުގެ ގޮތުން ބޭއްވި ރަސްމިއްޔާތުގައި ވާހަކަ ދައްކަމުން ސަލީމް ވިދާޅުވީ, ހޯރަފުށީގައި އެއަރޕޯޓު އަޅަން މަސައްކަތް ކުރުމުން އެކަން ނުވާނެ ކަމަށް ބަޔަކު ބުނަމުންދިޔަ ކަމަށެވެ. ނަމަވެސް މިމަސައްކަތް ފުރިހަމަކޮށް، އެއަރޕޯޓަށް 1 އަހަރު ފުރިފައި ވާއިރު، މިއެއަރޕޯޓުގެ ސަބަބުން ހޯރަފުށީގެ އިތުރުން އެސަރަހައްދުގެ ރައްޔިތުންނަށް ގިނަގުނަ ފައިދާތަކެއް ވަމުން އަންނަކަން ސަލީމް ފާހަގަ ކުރެއްވިއެވެ.

އަދި މިކަމުގެ ސަބަބުން ދަތުރުފަތުރުގެ ނިޒާމަށް އޮންނަ އިތުބާރު އެތައް ތަނަކުން ބޮޑުވެގެން ގޮސްފައިވާ ކަމަށް ސަލީމް ވިދާޅުވިއެވެ.

މީގެ ފަސްދޮޅަހަކަށް އަހަރު ކުރިން، ރައީސް މުޙައްމަދު އަމީންގެ ވެރިކަމުގައި ހޯރަފުށީގެ ތަރައްގީއަށް ގެންގުޅުއްވި ވިސްނުންތަކުގެ ތެރެއިން އެންމެ ހިތްގައިމު މަސައްކަތަކީ ރަށްވެހި މަގުކަން ފާހަގަ ކުރައްވަމުން ސަލީމް ވިދާޅުވީ، އެމަގާ ގުޅިގެން ރައީސް ޞާލިޙު ހައްދަވާފައިވާ ނޫރަންމަގުން އަދި މާބޮޑަށް ދުނިޔެ ފެނިއްޖެ ކަމަށެވެ. އެހެންކަމުން ރަނގަޅު ވެރިޔަކު ފެނުމަށް ބައި ގަރުނަށްވުރެ ގިނަ ދުވަސް ފާއިތުވާއިރު، ކަން ހިނގަމުންދާ ގޮތަށް ރައްޔިތުން ވިސްނުން މުހިންމުކަން ސަލީމް ފާހަގަ ކުރެއްވިއެވެ.

ސަލީމް އިތުރަށް ވިދާޅުވީ މިއަދުގެ ސަރުކާރަކީ ރައްޔިތުން އިންތިޚާބު ކުރި, ރައްޔިތުންނަށްޓަކައި މަސައްކަތް ކުރާ، ރައްޔިތުންގެ ސަރުކާރެއް ކަމަށެވެ. އަދި ސަރުކާރަކާއި ރައްޔިތުންނާއި ގުޅިގެން މަސައްކަތް ކުރަން ވެއްޖެނަމަ އެކަމެއް ކާމިޔާބު ނުވެ ނުދާނެ ކަމަށާއި، މި އެއަރޕޯޓަކީ އެކަމުގެ ވަރަށް ރަނގަޅު ހެއްކެއް ކަމަށެވެ.