މުސީބާތްތަކުން ސަލާމަތްވުމަށް އިސްލާމީ ވަހުދަތުގެ ބިންގާ ވަރުގަދަކުރަންޖެހޭ: ޚުތުބާ
އިސްލާމްދީން ބަބުޅައިގަތީ އިސްލާމީ ވަހުދަތުގެ ސަބަބުން
ހުކުރު ޚުތުބާ
އިސްލާމީ އުންމަތާ ކުރިމަތިވެފައިވާ މުސީބާތްތައް ގިރާކުރެވޭނީ އިސްލާމީ ވަހުދަތަށް ބޭނުންވާ ބިންގާ ވަރުގަދަކޮށްގެން ކަމަށް ހުކުރު ޚުތުބާގައި ބުނެފިއެވެ.
"އިސްލާމީ ވަހުދަތާއި އެއްބައިވަންތަކުގެ މުހިންމުކަން" މި މައުޟޫއަށް ރާއްޖޭގެ އެކި ކަންކޮޅުތަކުގައި އިއްވި ހުކުރު ޚުތުބާގައި ބުނީ އިސްލާމް ދީނުގެ އިރު ދުނިޔޭގެ މައްޗަށް އަރައި، އަލިވެ އުޖާލާވެ، ބަބުޅައިގަތީ އިސްލާމީ ވަހުދަތުގެ ސަބަބުން ކަމަށެވެ. އިސްލާމީ ފުތޫހާތުތައް ދުނިޔޭގެ އިރުމައްޗަށާއި، ހުޅަނގަށް ފެތުރިގެން ދިޔައީ، މި އިސްލާމީ އެއްބައިވަންތަކަމުގެ ސަބަބުން ކަމަށާއި، އިސްލާމީ ދައުލަތުގެ ސިންގާސަނާއަށް ދުނިޔޭގެ ގައުމުތައް ބޯލަނބައި، ކިޔަމަންގަތީ، މި އިސްލާމީ އެއްބައެއްވަންތަކަމުގެ ސަބަބުން ކަމަށް ޚުތުބާގައި ބުނެފައިވެއެވެ. އެހެންނަމަވެސް މުސްލިމުންގެ ތެރޭގައިވާ މި ރީތި އާދަތައް ނެތިޔަ ހިސާބުން އެކި އެކި ފަރާތްތަކުން ނުފޫޒު ފޯރުވަންފެށިކަމަށް ޚުތުބާގައި ބުނެފައިވެއެވެ.
އިސްލާމީ އުއްމަތާ މިއަދު ކުރިމަތިވެފައިވާ މުސީބާތްތައް ގިރާކޮށްފައި ދެވޭވަރުގެ ގާބިލުކަން އިސްލާމީ އުއްމަތުގެ ވަހުދަތުގައާއި، އެއްބަނޑުއެއްބަފައިކަމުގެ ގެތުންތަކުގައި އެބަ ހުރި ކަމަށާއި، މިކަމަށް އެންމެ ފުރަތަމަ ކުރަންޖެހޭ ކަމަކީ އިސްލާމީ ވަހުދަތަށް ބޭނުންވާ ބިންގާ ވަރުގަދަ ކުރުން ކަމުގައި ޚުތުބާގައި ބުނެފައިވެއެވެ. ދެވަނައަށް ކުރަންޖެހޭ ކަމަކީ މުސްލިމުންގެ ހިތްތައް އެކަތިގަނޑަކަށް ހެދުމަށް ހިތްތަކުގައި އޯގާވެރިކަމާއި، ކުލުނުވެރިކަމާއި، ހިތްހެޔޮކަމުގެ ޝުއޫރުތަކުގެ އޮށް އިންދައި، އެއަށް ފެންދީ ހައްދައި ބޮޑުކުރުމަށް މަސައްކަތް ކުރުން ކަމަށް ޚުތުބާގައި ބުނެފައިވެއެވެ.
އިސްލާމީ ވަހުދަތު ހަރުދަނާކުރުމަށް ކީރިތި ގުރްއާން އަޅުގަނޑުމެންނަށް ގޮވައިލަނީ، މުސްލިމުން އެއްބަޔަކު އަނެއްބަޔަކަށް ވާގިވެރިވެ، ނަސްރު ދީ، މުސްލިމުން އެއްބަޔަކު އަނެއްބަޔަކަށް އަޅާލުމަށް ކަމަށް ޚުތުބާގައި ބުނެފައިވެއެވެ. އިސްލާމީ ވަހްދަތު ގާއިމުކުރުމަށް ބޭނުންވާ ކަންތައްތަކުގެ ތެރޭގައި ދެބަސްވުންތަކާއި، އަރާރުންތަކާ ދުރުހެލިވުން ވާކަމަށާއި، އިސްލާމީ ވަހުދަތާއި، އީމާންކަމުގެ އުޚުއްވަތްތެރިކަން ގާއިމުކުރެވޭނީ، އަމިއްލަ މަސްލަހަތުތަކާއި ދުނިޔަވީ މަންފާތަކަށްވުރެ އުއްމަތުގެ މަސްލަހަތުތައް އިސްކުރެވިގެން ކަމަށް ޚުތުބާގައި ބުނެފައިވެއެވެ.
އިސްލާމީ ވަހުދަތަކީ ވަކި ސަގާފަތަކަށް، ވަކި ގައުމަކަށް، ވަކި ފަންތިއަކަށް ނުވަތަ ވަކި ޖިންސަކާ ދެކޮޅަށް މުސްލިމުން އުފުލާ ޝިއާރެއް ނޫން ކަމަށް ޚުތުބާގައި ބުނެފައިވެއެވެ. އެއީ އެއްވެސް މުޖްތަމައަކަށް ނުރައްކަލެއް އޮތް ކަމެއްވެސް ނޫން ކަމަށާއި، މިއީ ހެޔޮ ކަންތައްތަކަށް އަމުރުކުރުމަށާއި، ނުބައި ކަންތައްތައް މަނާކުރުމުގެ ތަރަހައިގެ ތެރޭގައި އޮތް ކަމެއް ކަމަށް ބުނެފައިވެއެވެ.
